لڤین
ئەنجوومەنی سووریای دیموکرات “مەسەدە” پێشوازیی لە رێککەوتنی نێوان مەزڵوم عەبدی و ئەحمەد شەرع کرد و رایانگەیاند، ئەو رێککەوتنە لە ساتێکی یەکلاکەرەوەی مێژووی سووریا و بە گیانی بەرپرسیارێتییەوە ئەنجامدراوە.
مەسەدە لە راگەیەندراوێکدا دەڵێت ” هیوادارین ئەم رێککەوتنە هەنگاوێکی بنەڕەتی بێت بۆ بنیادنانی سووریایەکی نوێ، دەوڵەتێکی دیموکراسی و فرەیی، کە رێز لە مافەکانی هەموو پێکهاتەکانی سووریا بگرێت”.
ئەنجوومەنی سووریای دیموکرات راشیگەیاند، ئەم رێککەوتنە ببێتە بنەما بۆ دەستوورێک، کە گوزارشت لە ئیرادەی ژنان و پیاوانی سووریا بکات و کۆمارێکی مۆدێرن دابمەزرێت، کە لەگەڵ خواست و قوربانیدانی گەلی سووریادا بگونجێت.
مەسەدە جەختی لەوە کردەوە، ئەم رێککەوتنە رەنگدانەوەی پێویستی بەپەلەی قۆناغێکە، لەسەر بنەمای هاوبەشی نیشتمانی و دانپێدانانی یەکتر و دادپەروەری سیاسی، دەشڵێن هەموو سوورییەکان بەبێ جیاوازی مافی خۆیانە چارەنووسی خۆیان لە رێگەی بەشداریی سیاسی راستەقینەوە دیاری بکەن، کە یەکسانی و کەرامەت و ئازادییە بنەڕەتییەکان فەراهەم بکات.
ئەوەشیان دووپاتکردووەتەوە، کە سەرکەوتنی ئەم رێککەوتنە پەیوەستە بە پابەندبوونی هەموو لایەنەکان بە رۆحی گۆڕانکاریی راستەقینە و کارکردن بۆ بنیادنانی دەوڵەتێکی دیموکراتی مۆدێرن.
لە کۆتایی راگەیەندراوەکەدا هاتووە، “سووریا بۆ هەموو سوورییەکانە و دەوڵەتێکی دیموکراسی، فرەیی، لامەرکەزی، شایستەی قوربانیدانی گەلەکەیەتی”.
