وەفدی ئیمرالی دەم پارتی بۆ ئەنجامدانی دیداری دوەم داواکارییان پێشکەش کرد

لڤین

بە مەبەستی ئەنجامدانی دیداری دووەم لەگەڵ عەبدوڵا ئۆجەلان، وەفدی ئیمرالی دەم پارتی داواکارییان پێشکەشی وەزارەتی دادی تورکیا کرد.

بەگوێرەی میدیاكانی باكوری كوردستان، هێشتا ناوی ئەو کەسانە نازانرێت کە بۆ جاری دووەم سەردانی ئیمرالی دەکەن بۆ دیدار لەگەڵ ئۆجەلان.

وەفدی دەمپارتی  لە 28ـی کانونی یەكەمی 2024، كە پێكهاتبون لە پەروین بوڵدان و سری سورەیا ئۆندەر، سەردانی ئۆجەلانیان كرد لە ئیمرالی، دوای دیدارەکە و لەسەر داوای ئۆجەلان، وەفدەكە لەگەڵ ئەحمەد تورک، هاوسەرۆکی شارەوانی گەورەی مێردین، کە قەیوم لە جێگەی دانراوە، لەگەڵ سەرۆكی پەرلەمانی توركیاو پارتە سیاسییەکان و سیاسەتمەدارە زیندانییەکان كۆبونەوەی جیاجیان ئەنجامدا.

رۆژی 17ی ئەم مانگە وەفدەكەی دەمپارتی لە راگەیەندراوێكدا ئەنجامی كۆبونەوەكانی خستۆتەڕو و جەختی كردەووە كە سەرجەم كۆبونەوەكانیان لەگەڵ سەرۆكی پەرلەمان و لایەنە سیاسییەكان راشكاوانە بوون و پڕبوون لە هیوای ئەرێنی.

وەفدەكەی دەم پارتی ئاماژەی بەوەشدا “بە هەموو تێڕوانین و هەڵسەنگاندنە ئەرێنییەكانمانەوە، بەم نزیكانە سەردانی ئۆجەلاین دەكەینەوە، ئەوپەڕی هەوڵ دەدەین بۆ گەرەنتیكردنی ئەوەی كە پڕۆسەكە بگاتە ئاشتی و دۆزینەوەی چارەسەر ئەوەش لەڕێگەی میكانیزمی بەهێز و كاریگەرەوە.”

جەختیشی كردەووە كە “پشتیوانی گەل بۆ ئەم دیدار و كۆبوونەوانە، گرنگترین فاكتەرە بۆ بونیادنانی ئاشتی و گەیشتن بە چارەسەر.”