لڤین
تونجەر باكرهان، هاوسەرۆكی پارتی یەکسانی و دیموکراسیی گەلان (دەم پارتی) ڕایگەیاند، هیوادارن بە زوترین كات شاندەكەیان سەردانی ئیمرالی بكەنەوە و كۆبونەوەی دوەم ئەنجامبدەن، دەشڵێت، “لە توركیا کێشەی کورد و دیموکراتیزەکردن هەیە كە بە لەناوچون چارەسەر ناکرێن، دەبێت دەرگاکان بکرێتەوە”.
تونجەر باكرهان، دوای کۆبونەوەی گروپی پەرلەمانی حزبەکەی لە وەڵامی پرسیاری ڕۆژنامەنوسان ڕایگەیاند، نازانن کەی شاندەكەیان لێدوان دەدات بۆئەوەی جارێكی دیكە سەردانی ئیمرالی بكەنەوە و كۆبونەوە ئەنجامدەدەن، بەڵام هیوادارە بە زوترین کات ئەوە ڕوبدات و داواكاری ئەوانیشە.
سەبارەت بە داواکاری باخچەلی بۆ کۆبونەوەی دوەم و “دەستبەرداربون لە چەک”، هاوسەرۆكی دەم پارتی دەڵێت، لێدوانەکەی بەڕێز باخچەلی سەبارەت بە “گرفتەکان بە پشتگوێخستن چارەسەر ناکرێن” گرنگە. لە ئێستادا کێشەی کورد هەیە، کێشەی دیموکراتیزەکردنی تورکیا هەیە كە بە لەناوچون چارەسەر ناکرێن.
ئاماژەی بەوەشكرد، “ئێمە نازانین هەڵوێستی ئیمرالی لەبارەی چەك دانانەوە چۆت دەبێت، پێویستەكە شاندەکە بچێتەوە ئەوێ. دەبێت دەرگاکان بکرێتەوە. بەڕای من پێویستە ئەم پرسیارە لە حکومەت بکرێت”.
