له‌مشه‌وه‌وه‌ به‌فرو بارانبارین ده‌ستپێده‌كات

لڤین

به‌شى پێشبینیه‌كانى وەزارەتی گواستنەوەو گەیاندنی هەرێم ئاشكرایكرد، درەنگانی ئەمشەو شەپۆلێکی باران‌و بەفر لەدەریای ناوەڕاستەوە دەگاتە هه‌رێمى کوردستان‌و زۆربەی ناوچەکان دەگرێتەوەو دوو ڕۆژیش بەردەوامدەبێت.

به‌گوێره‌ى ئه‌و زانیاریانه‌ى به‌شى پێشبینییەكانی وەزارەتى گواستنه‌وه‌و گه‌یاندنى هه‌رێم ئاشكرایكردوه‌، بارانبارین زۆربەی ناوچەكانی هەرێم دەگرێتەوەو لەناوچە شاخاوییەكانیش پێشبینی بەفر بارین دەكرێت، بۆیە پلەكانی گەرماش بەنزیكەیی 2 بۆ 4 پلەی سیلیزی دادەبەزن، هەربۆیە دەستپێکى کاریگەریى ئەم نزمە پاڵەپەستۆیە لەسەر سنورى پارێزگاى دهۆک دەبێت، لەکاتەکانى ئێوارەدا.

سه‌باره‌ت به‌سبەینێ هەینیش به‌شى پێشبینیه‌كان ده‌ڵێت:”سبه‌ینێ ئاسمان بەگشتىی هەوری تەواو دەبێت، کاریگەرى شەپۆلى بارانبارین لەسەر ناوچەکە زیاد دەکات‌و سەرجەمى ناوچەکە دەکەوێتە ژێرکاریگەرى ئەم شەپۆلە بەتایبەت لەکاتەکانى دواى نیوەڕۆى ڕۆژى هەینى، بارانبارین بەشێوەى بارانى مامناوەندو هەندێ ناوچە لێزمەبارانى پچڕپچڕ هەورە تریشقەی لەگەڵدا دەبێت، بەتایبەت لەبەشێک لەسنورى پارێزگاى دهۆک‌و بەشێک لەئیدارەى ڕاپەرین، هەروەها هەندێکاتیش خێرایی با زیاد دەکات.