لڤین
سبەی کاتژمێر 10:00ـی بەیانی دەستپێکی یەکەم رۆژی فێستیڤاڵی هەنارە و بە وتەی بەڕێوبەری گشتی کشتوکاڵی هەڵەبجە تەواوی ئامادەکارییەکان بۆ فێستیڤاڵەکە کۆتایی هاتووە و بڕیارە بۆ ماوەی سێ رۆژ بەردەوامی هەبێت.
ئەمڕۆ چوارشەممە 30ی تشرینی یەکەم، ستار مەحمود، بەڕێوبەری گشتی کشتوکاڵی هەڵەبجە پەیوەست بە فێستیڤاڵەکە رایگەیاند، “سبەی کاتژمێر 10:00ی بەیانی دەستپێکی یەکەم رۆژی دەیەمین فێستیڤاڵی هەڵەبجە دەبێت و تەواوی ئامادەکارییەکان ئەنجامدراوە، هاوکات لە نێو فێستیڤاڵەکەدا چەندین جوتیار و باخەوان و خاوەن کارە دەستییەکان بەشداربووانی دیکە بەرهەمەکانیان ساغدەکەنەوە.”
مەحمود ستار وتیشی، “بۆ ئەم ساڵ ئامادەکارییەکی زۆر باشمان ئەنجامداوە بە شێوەیەک گفتووگۆی زانستی پەیوەست بە چۆنییەتی بەرهەمهێنان و بەبازار کردنی هەنار و بەرهەمەکانی دیکە بەڕێوەدەچێت، و بڕیارە کۆمەڵێک چالاکی دیکەش ئەنجامبدرێت.”
شایەنی باسە لەم فێستیڤاڵەدا، هەناری هەڵەبجە و هەورامان، هەنگوینی ناوچەکە، دۆشاو، مێوژ، گوێزی هەورامان، خواردنە کوردەوارییەکان، بەرهەمە کولتوورییەکان و کارە دەستییەکانی خانمان، بە بازارکردنیان پێوەدەکرێت.
