لڤین
سەڵاحەدین بەهادین، ئەمینداری گشتی یەكگرتوی ئیسلامی و عەلی باپیر، سەرۆكی كۆمەڵی دادگەریی كوردستان لە كۆبونەوەیەكی نێوانیاندا گفتوگۆیان لەبارەی ئەنجامەكانی هەڵبژاردنی پەرلەمانی كوردستان كرد.
ئێوارەی ئەمڕۆ دوشەممە، سەڵاحەدین بەهادین ئەمینداری گشتی یەكگرتوی ئیسلامی كوردستان بەیاوەری هادی عەلی، سەرۆكی ئەنجومەنی سەركردایەتی سەڵاحەدین بابەكر، كارگێری ئەنجومەنی جێبەجێكردنی یەكگرتو سەردانی عەلی باپیر، سەرۆكی كۆمەڵی دادگەریی كوردستانیان كرد.
بەپێی راگەیەندراوی نوسینگەی ئەمینداری گشتی یەكگرتو، لە دیدارەكەدا بارودۆخی ناوخۆ و عێراق و شەڕی غەززە و دەرئەنجامەكانی هەڵبژاردنی پەرلەمانی كوردستان گفتوگۆیان لە بارەیەوە كرا.
وەك لە راگەیەندراوەكەدا هاتوە، “لەسەرەتادا هەردولا هاورابون كە بارودۆخ و رەوشی ناوچەكە لە گۆڕانكاری خێرادایە و دەبێت بەرپرسیارانە بروانینە دۆخەكە و رەوشی موسڵمانانی غەززە دەبینین كە رۆژانە دەیان و سەدان شەهید و بریندار هەیە و رژێمی زایۆنی زۆر بێ رەحمانە كاولكاری ئەنجامدەدات، وڵاتانی نێودەوڵەتیش بە بێ دەنگی بەدیار ئەم دەستدرێژیانەوە رۆڵی تەماشاكار دەبینن.”
بەپێی راگەیەندراوەكە، لە بەشێكی تری دیدارەكەدا پرسی ئەنجامدانی هەڵبژاردنی پەرلەمانی كوردستان و دەرئەنجامەكانی گفتوگۆی پێویستیان لە بارەیەوە كرا.
