لڤین
لەمیانی کۆبوونەوەیان لەگەڵ محەمەد شیاع سودانی سەرۆکوەزیرانی عێراق، باڵیۆزانی یەکێتیی ئەوروپا و باڵیۆزانی وڵاتانی ئەندامی هەمیشەیی ئەنجوومەنی ئاسایش، پاڵپشتی خۆیان بۆ چارەسەرکردنی کێشە ئیدارییەکانی نێوان هەردوو حکومەتی فیدراڵ و هەرێمی کوردستان دووپاتکردووەتەوە.
نووسینگەی راگەیاندنی محەمەد شیاع سودانی سەرۆکوەزیرانی عێراق بڵاویکردەوە، سودانی جەختیکردووەتەوە، حکومەت سەرقاڵی چارەسەرکردنی دۆسییە ناوخۆییەکانی وڵاتە لە رێگەی یاسا و دەستوورەوە بە شێوەیەکی دادپەروەر و یەکسان لە نێوان تەواوی هاوڵاتییانی عێراقدا بەبێ جیاوازی.
بە گوێرەی راگەیەندراوەکە، باڵیۆزەکان ئاماژەیان بە رۆڵی هەرێمایەتی و نێودەوڵەتی عێراق کردووە و هەوڵ و دەستپێشخەریەکانی سەرۆکوەزیران لە بەڕێوەچوونی لوتکەی عەرەبی لە بەغداد بە گرنگ و کاریگەر زانیوە بۆ بەهێزکردنی پەیوەندییە ئابووریەکانی عێراق و وڵاتانی ناوچەکە و وڵاتە ئەوروپییەکان.
ئاماژەی بەوەشکردووە، باڵیۆزانی یەکێتیی ئەوروپا پاڵپشتی خۆیان بۆ سیاسەتەکانی حکومەتی عێراقی دووپاتکردەوە لە پرسی چارەسەرکردنی کێشە ناوخۆییەکان و دۆسییە ئیدارییەکانی نێوان حکومەتی فیدراڵ و حکومەتی هەرێمی کوردستان، هەروەها جەختیشیان لە مافی کەمەنەتەوەییەکان و ئاشتیی کۆمەڵایەتی و ژیانێکی شایستە بۆ تەواوی عێراقییەکان کردووەتەوە.
