لڤین
کەشناسیی عێراق پێشبینیدەكات کەشێکی گەرمی هاوینە تەواوی ناوچەكانی عێراق بگرێتەوە و لە هەرێمی کوردستانیش باران ببارێت.
بەگوێرەی پێشبینییەکانی کەشناسی، ئەمڕۆ کەشێکی گەرمی هاوینە تەواوی عێراق دەگرێتەوە، لە ناوچە شاخاوییەکانی پارێزگاکانی سلێمانی و هەولێر و دهۆکیش باران دەبارێت.
لەبارەی کەشوهەوای رۆژانی داهاتووش پێشبینیدەكات، سبەی و دووسبەی ئاسمان ساماڵ و پەڵەهەور بێت، سبەی پلەكانی گەرما هاوشێوەی ئەمڕۆ بێت، بەڵام دوو سبەی لە ناوچەکانی ناوەڕاست و باشوور بەراورد بە باکوور زیاتر بەرزدەبنەوە.
لەبارەی کەشی رۆژانی هەینی و شەممەی داهاتووش، کەشناسیی عێراق پێشبینیدەکات ئاسمان ساماڵ و کەشوهەوا بەتەواوەتی گەرم بێت، هەینی لە ناوچەکانی باکوور و باشوور پلەی گەرما زیاتر بەرزدەبێتەوە، بەڵام شەممە لە ناوچەکانی باکوور بەراورد بە باشوور و ناوەڕاست بەرزتر دەبێتەوە.
