لڤین
په‌رله‌مانی عێراق له‌ڕێگه‌ی پرۆژه یاسای به‌ره‌نگاربوونه‌وه‌ی جگه‌ره كێشان و سنوورداركردنی ده‌یه‌وێت باج بخاته سه‌ر جگه‌ره و هاوشێوه‌ی ڤه‌یپ كار بۆ قه‌ده‌خه كردنی بكرێت و ته‌نیا به كه‌سانی سه‌روو 18 ساڵ بفرۆشرێت.
لیژنەی تەندروستی و ژینگە لە پەرلەمانی عێراق باس له‌وه ده‌كات، ڕه‌شنووسی یاسای بەرەنگاربوونەوەی جگەرەکێشان به ئامانجی پاراستنی كۆمه‌ڵگه له قۆناخی كۆتاییدایه و دوای په‌سه‌ند كردنی پرسی جگه‌ره كێشان و به‌كارهێنانی ڤه‌یپ به یاسا ڕێكده‌خرێته‌وه، هاوكات پرۆسه‌ی هاوردەکردنی پاکەتی جگەرە، مادەکانی نێرگەلە و ڤەیپ باجی زیادییان ده‌خرێته سه‌ر.
به‌گوێره‌ی ورده‌كاریی ره‌شنووسی پڕۆژه یاسای به‌ره‌نگاربوونه‌وه‌ی جگه‌ره كێشان بێت، ئه‌گه‌ر له شوێنه گشتییه‌كان جگه‌ره بكێشیت، به 50 هه‌زار دینار سزا ده‌درێیت، جگه له‌مه‌ش هه‌ر فرۆشیارێك جگه‌ره به كه‌سانی خوار 18 ساڵ بفرۆشێت به 6 مانگ زیندانی یاخود به پێبژاردنی 250 تا 500 هه‌زار دینار سزا ده‌درێت.
