لڤین
دواى واژۆکردنى رێککەوتنەکەى نێوان مەزڵوم عەبدى و ئەحمەد شەرع، گوتەبێژی هێزەکانى سووریاى دیموکرات رایگەیاند، رێککەوتنەکە بە نێوەندگیریی ئەمریکا بووە.
فەرهاد شامی، لە راگەیەندراوێکدا ئەو دەنگۆیانە رەتدەکاتەوە کە باس لەوە دەکەن، هێزەکانی دیمەشق بێنە حەسەکە و دەڵێت، ئەوە راست نییە، بەڵام رەنگە هێزەکانی دیمەشق لە سنوورەکانى نێوان رۆژئاوا و تورکیا بڵاوەیان پێبکرێت.
راشیگەیاند، ئەو لیژنانەی کە دروستکراون پرسی زیندانییەکان یەکلایی دەکەنەوە و لیژنەیەکى تایبەتیش بە خۆبەڕێوەبردن و پەروەردە و خوێندن بە زمانی کوردی پێکهێنراوە.
فەرهاد شامی گوتیشى، هیچ گۆڕانکارییەک لە دۆسیەی داعشدا نەبووە و دۆسیەى داعش لە دەستی هێزەکانى سووریاى دیموکراتدایە.
گوتەبێژەکەى هەسەدە ئەوەشى راگەیاند، ئامانجی سەرەکییان وەستاندنی شەڕ و گەڕاندنەوەی ئاوارەکانى عەفرین و سەرێکانی و گرێ سپییە بۆسەر ماڵ و حاڵى خۆیان.
ئەوەش لەکاتێکدایە، شەوى 10ـى ئازار، مەزڵوم عەبدى و ئەحمەد شەرع لە دیمەشق، رێککەوتنێکى هەشت خاڵییان واژۆکرد و بەگوێرەى رێککەوتنەکە، مافەکانى کورد لە چوارچێوەى دەستوور پارێزراوە و کورد پێکهاتەیەکى سەرەکى دەوڵەتى سووریایە.
