لڤین
بەڕێوەبەرایەتیی ئاسایشی هەولێر دەستگیرکردنی تۆمەتبارێکی راگەیاند کە لە زیندانەکانی بەغدا هەڵهاتبوو.
بەڕێوەبەرایەتیی ئاسایشی هەولێر رایگەیاند، “تۆمەتبار(ع ، س، ع ) لەشاری بەغدا بەتۆمەتی سپیکردنەوەی بڕی 35 ملیار دیناری عێراقی و ساختەکردنی چەکی بانکی، هەروەها چەند فەرمانێکی گرتنی هەبووە لە شاری بەغدا، لەکاتی بردنی بۆ دادگا لەگەل ئەفسەرێکی پۆلیس هەماهەنگی کردوە و بەرلەوەی بگاتە دادگا هەڵاتوە، خۆی گەیاندووەتە شاری هەولێر”.
ئاماژە بەوەکراوە، “دوای ماوەیەکی کەم و بەڕێگەی پەیوەندییەکانی وەزارەتی ناوخۆی حکومەتی هەرێمی کوردستان توانیمان شوێنی تۆمەتبار بە ماوەیەکی کەم ئاشکرا بکەین و بەفەرمانی دادوەری لێکۆڵینەوەی ئاسایشی هەولێر دەستگیرمان کرد”.
جێگەی ئاماژەیە تۆمەتباری ناوهاتوو هەوڵی ئەوەی دابوو کە بە جلوبەرگی ئافرەتانەوە لە شاری هەولێرەوە هەڵبێت.
