پێشمه‌رگه‌ له‌ سێ قۆڵه‌وه‌ هێرشه‌كانی داعشی تێكشكاند

شەوی رابردوو چەكدارانی داعش لە سێ میحوەرەوە لە نزیك شاری مووسڵ هەوڵیان دا هێرش بكەنەسەر شوێنەكانی پێشمەرگە بەڵام هەر سێ‌ هێرشەكە بە تێكشكاوی كۆتایی هات.

دەرنگانی شەوی رابردوو، هێزەكانی پێشمەرگە لە سێ‌ میحوەرەوە لە باكووری شاری مووسڵەوە سێ‌ هێرشی چەكدارانی داعشیان تێك شكاند كە خەریكبوو دەكرایە سەر بنکە و سەنگەرەکانی هێزی پێشمەرگەی کوردستان.
 
بەپێی ئەو زانیارییانەی كە سەرچاوەیەك لە هێزەكانی ئاسایشی كوردستان لە میحوەری به‌ ده‌ستگه‌شتوون "دەرنگانی شەوی رابردوو لە میحوەری گردی ئەسقەف سەربە قەزای تلكێف كە بە 25 كم دەكەوێتە باكووری مووسڵەوە، چەكدارانی داعش هەوڵیان دا هێرش بكەنەسەر شوێنەكانی پێشمەرگە بەڵام هێرشەكە تێك شكێنراو و هێزەكانی پێشمەرگەش توانیان ژمارەیەك لەو چەكدارانە بكوژن و ئەوانەی دیكەشیان ناچار كرد را بكەن و هەڵبێن".
 
سەرچاوەكە ئاماژەی بەوەش دا هەر شەوی رابردوو، چەكدارانی داعش هەوڵیان داوە هێرش بكەنە سەر شوێنەكانی هێزی پێشمەرگە لە میحوەری باعشیقە كە بە 17 كم دەكەوێتە باكووری رۆژهەڵاتی مووسڵ و بەڵام هێرشەكە بە پشتیوانی فڕۆكەکانی جەنگی هێزی هاوپەیمانان، لەلایەن هێزی پێشمەرگەوە تێكشكێنراوە هەروەها ژمارەیەك چەكداری داعش كوژراون و برینداربوون و دوو ئوتۆمبێلی سەربازیی جۆری هامەریش كە چەكدارەكانی داعش لە هێرشەكەدا بەكاریان هێنابوو، سووتێنران.

سەرچاوەكە هەروەها راشیگەیاند، لە میحوەری ناوەران كە بە 15 كم لە باكووری رۆژهەڵاتی مووسڵەوە دوورە بۆ هێرشكردن، چەكدارانی داعش لە شوێنەكانی پێشمەرگە نزیك بوونەوە بەڵام پێشمەرگە رووبەڕوویان بوونەتەوە و توانیان هەم هێرشەكە تێك بشكێنن و هەم ژمارەیەك چەكداری داعشیش بكوژن و برینداریان بكەن.

بەپێی زانیارییەكانی سەرچاوەكە، چەكدارانی داعش لەو هێرشانەی شەوی رابردوودا سوودیان لە كەشوهەوای ناوچەكە وەرگرتبوو. بەو پێیەی شەوی رابردوو بەهۆی ئەوەی ئاسمان هەور و تەم و مژاویی بوو، چەكدارانی داعش كەشوهەواكەیان وەك هەل بۆ هێرشكردنەسەر بنکە و شوێنەكانی پێشمەرگە بۆ خۆیان قۆستبۆوە.
AM:11:41:20/02/2015

ئه‌م بابه‌ته 1985 جار خوێنراوه‌ته‌وه‌‌
زیاتر ...
وتار
وەرزش
گۆڤاری لڤین
318
ژمارە
گۆڤاری لڤینی نوێ
بەشداریکردن