بەر لەوەی ئەوان ئاڵاكەمان بسوتێنن

رۆزا تاتانی
18.10.2020

ئاڵای حكومەتی هەرێم لە بەغداد دەسوتێنرێت لە غیابی گفتوگۆی بنەبڕكردنی ناسیۆنالیزمدا لە عێراق. هاوڵاتیانی ئەم هەرێمە موچە وەرناگرن و حكومەت لە جێی چارە باس لە قەرزداری خۆی دەكات. لە یادی لەدەستدانی كەركوكدا باس باسی "ڕێكەوتنی بەڕێوەبردنی شەنگال"ە لە كاتێكدا كەركوك و هەموو ناوچەی ١٤٠ لە دەستی هێزە سەربازییە نا كوردەكاندان.

لێرە پرسە نیشتیمانیەكان بێ بەها و بازاڕی جنێوفرۆشی مەزادخانەی سیاسەتن، هەموو بەهاكان كراونەتە ماڵی حیزب. مرۆڤ، ئاڵا، خاك و زمان ناسنامەی حیزبن. هاوڵاتی تا دەتوانێت دەیەوێت خاڵی بێت لە هەموو ئەمانە، كەواتا لێرە ژیان لەكوێی نیشتیمانە؟ ژیان، دەمێكە كێلێكی بێ ناوی بێ ئاڵایە لەم نیشتیمانە.

ژیان بارێكە بەسەر شانی مرۆڤەكانەوە، ماندوو ماندوو وەك عەزابێك ڕایدەكێشن. لە تەزبیح فرۆشەكانی بەردەم مزگەوتی گەورەوە، تا مەلۆدی هاواری تەماتە فرۆشەكانی سەیداوا و دەستە زبر و ماندووەكانی عەرەبانەچیەكانی كەلار هەمان پرسیار دەكەن وەك ئەوەی شێركۆ بێكەس كردی "ئێمە چیمان لە نیشتیمان دەویست؟" ئێمە تەنها ژیانمان دەویست. بەڵام ئێستا بێ دوو دڵی جێی دەهێڵین! بە خوێن، خەون و ڕەنجی هەموومان ئەم حكومەتە بنیادنرا. بەڵام خەون، رەنج و هیوا لەم وڵاتە یەكسانبوونەوە بە سفر. شێوازی ژیان ڕابردووی تێنەپەڕاند. سەدامی دادگایی كرد، سەدامبوونی تێنەپەڕاند.

چونكە لەم وڵاتە هەموو هاوڵاتیەك سكاڵا تۆماركەرە و دادوەر غیاب. هەموو دادوەرێك تاوانبارە و تاوان مەجهول. حكومەت لێرە گەندەڵە چونكە نانەوا فرۆشەكانیش سەرە بە خزمەكانیان ناگرن! دز لێرە زۆرن چونكە هاوڵاتیان بۆ موچە گڵكۆی شەهیدەكان دەسوتێنن. چونكە ئێمە وەك هاوڵاتی لە دێر زەمانە وایان لێكردووین بۆ هونەری ژیان نەگەڕێین. چاومان پڕە لە تۆزێكی غەریب، داستانی پڕ تەمی مەرگێك دەگێڕینەوە لەهەر نیگایەكدا. گەر لە چاوی هەر مرۆڤێكدا خەمێكی قوڵی بێ تنۆك لە هیوا دەبینین ئەوكات زۆر شتی گەورەترمان لە خاك، ئاڵا و موچە لەدەستداوە. 


ئێمە ژیانمان لەدەست داوە لە نیشتیماندا. لە مێژە خەون بە بوونی خۆمانەوە نابینین، بۆیە خۆمان بە تەنافی دامەزراندنەوە هەڵدەواسین، بێ ئەوەی پەلەقاژەی پڕۆژەیەك بكەینە خەمی ڕەنجمان.  خوێنەریی، ئێستاتیكا، ئافرێنەریی، ڕەنج بە بەرهەمی و ئەنتی ڕۆتین و بیرۆكراسی شتگەلێكن لای ئێمە لە ژیاندا جێگایان زۆر كەمە.  غیابی ئەمانە لە غیابی نەك موچە، بەڵكو نیشتیمانیش زیاتر دەبنە هۆی لەدەستدانی ژیان و بێ واتا بوونی ئاڵا.


بەر لە دزینی موچە، كاتێك ڕێگای پەرتوكخانەكان كوێربوونەوە بۆریە نەوتەكانیش دادۆشران. فشقیات كە جێی بە داكۆكیكردن خۆشكرد دەسەڵاتداران جدیەتیان فڕێدایە زبڵدانی گەندەڵیەوە. كاتێك جدیەتی پیشەیی و بەدیهێنانی خەون كۆڵەوار بوون دام و دەزگا پوچ دەبنەوە، پوچبوونەوە كوشتنی هەموو بەهاكانە بە ئاڵاشەوە. بێ بەهابوونی بەهاكان وادەكات بەقەد مردوێك كاریگەریمان هەبێت لە گۆڕینی ڕۆتین، تەقالید، سیاسەت، ڕوانینگە و شێوازی ژیانی ئەم كۆمەڵگایە. كاتێك هەموو ئەمانە لە خەڵك جیابوونەوە ئاڵا چ واتایەكی دەبێت؟

مردووەكان بێ ئاڵان، ئێمە چاوەكانمان پرژەی مەرگی واتای بەركەوتووە و بەرلەوەی ئەوان ئاڵاكەمان بسوتێنن ئێمە لێی تۆراوین. تۆراوین چونكە هەموو شتێك لە پەرجوی حیزب ئاڵاوە و ئێمەش چەوساوەی دەستی حیزب. بونە چەوساوە خۆی تاوانێكە لە سوتاندنی ئاڵا قورستر و ڕوخێنەرتر.

تابلۆی ژیانی ناو چاوەكانمان زۆر پێش ئاڵاكەمان سوتا و ئیدی سوتانێك نییە سنوری ئازاری ئەم سوتانە ببەزێنێت تا پێی ڕاچڵەكین. چاوەڕێ مەبە سەرۆك بۆ ئاڵاكەمان لە بەغدا ڕاناچڵەكێین! چونكە چیاكانمان دەمێكە لەژێر پۆساڵی توركەكاندان. باپیرەم دەیگوت سەدام وتویەتی "ئەوەی چیاكانی شیمال كۆنتڕۆڵ بكات حكومداری عێراقە" چیاكانی شیمال دەمیكە ئاڵاكەی ئێمەی لێ نیە.

زیاتری نوسەر

copyright 2019, All Rights Reserved Developed by TeraTarget for Digital Intelligence and IT Innovations