پارچە پارچەكردنی سلێمانی

ئاران غەفوور
18.09.2020

یەكێك لەو كەسانەی زۆر خەمی شاری سلێمانی بوو هێرۆ ئیبراهیم ئەحمەد بوو، بیری لە هەندێك شت دەكردەوە ئەستەمە ئەم بەرپرسە حزبی و حكومیانە بە ١٠٠ ساڵی تریش بیری لێ بكەنەوە، چەندین جار تەلەفونی بۆ بەهرۆز قەشانی پارێزگاری سلێمانی كردوە وتویەتی; بەهرۆز لە فڵان جادە گڵۆپی عەمودێك سوتاوە بە كوڕەكان بڵێ بیگۆڕن!

چالاكوانێكی ئەوروپی لە باسی مۆزەخانەی ئەمنەسورەكەدا لە گۆڤارێكدا دەڵێت; یەكەم جارە ببینم جەلادخانەیەك بەجۆرێك كرابێت بە مۆزەخانەیەكی نیشتیمانی خەڵك ئەوەندە دڵی پێی خۆش بێت خانوەكەی لە نزیك ئەو جەلادخانەیە نۆژەن بكاتەوە، كەچی هەر هێرۆخان دوركەوتەوە ڕێكخراوە مرۆییەكانیان كرد بە سەنتەری بازرگانی و دیواری ئەمنەسورەكەیان شكاند و كردیان بە كافتریا و بەردەركی سەرایان كرد بە چایخانە، هێرۆخان زۆری بۆ سلێمانی و خەڵكەكەی كرد بەڵام قەدریان نەزانی یەكەمین كەس ئەوانەی هێرۆخان هاوكاری كردبون جنێویان پێ یا و هەرە كەسە نزیك و یەكەمەكانی كەوتنە بازرگانی بە ناو و ناوبانگ و سەرمایە مەعنەویەكەیەوە.

لەبری ئەوەی زەوی و جێگە ستراتیژییەكانی سلێمانی بخرێتە خزمەتی گشتییەوە ئێستا كۆمپانیای قەیوان و شاسوار عەبدلواحید پڕۆژەیان تاكو تەنیشتی ماڵی مام جەلال بردوە، كەس نازانێت لەبەرامبەر چی كۆمپانیاكان بوون بە خاوەنی سلێمانی؟ شەڕەكە هەر لەسەر زەوی دارسنۆبەرەكانی ڕاپەڕین نییە، لەپشت باخی مەلیكەوە زەویەكی فراوان دراوە بەقەیوان بۆ یەكەی نوێی نیشتەجێبوون، شتێكی باشە ئەگەر بۆ خزمەتی گشتی بێت بەس تو ویژدانتان شوقە بە ١٠ دەفتەر و ١٥ دەفتەر بۆ خزمەتی گشتییە؟ هەر ئەوەش نا بینای دادگای كۆنی سلێمانیش دراوە بە بازرگانێكی دیكە، پەلە مەكەن ئەمنەسورەكەش سبەی ئەدرێ بە بازرگانێكی دیكە.

نەحكومەت نە نوێنەرەكانی یەكێتی لە حكومەت خەمی سلێمانیان نییە و خەریكی بازرگانی خۆیانن، كاتی ئەوەیە ئەم ستافە نوێیەی یەكێتی لە هاوسەرۆك و مەكتەبی سیاسی قۆناغێكی ئنتیقالی نیشتیمانی ڕابگەیەنن ئەم پاشاگەردانییە ڕابگرن، ئەم بازرگان و هاوبەشانەیان بە دەروازە سنوریەكان و نەوت و جگەرە و دوگ تێرناخۆن، زەوی تا ئاسمانی سلێمانیش داگیرئەكەن، خەڵكی ئەمانەیان بیرناچێتەوە دوو ڕۆژی تر هەڵبژاردنە، ئەگەر خەڵك ئێستا تاقەتی نەمابێت قسە بكات و ناڕەزایی دەربڕێت سبەی لە هەڵبژاردندا تاقەتی هەیە سزاتان بات، هەركەسێك لە پشت ئەم كارانەوە بێت خەڵك یەخەی ئێوە ئەگرێت چونكە ئێوە بە حاكمی ئەم سنورە ئەزانێت.

copyright 2019, All Rights Reserved Developed by TeraTarget for Digital Intelligence and IT Innovations