پۆرترەیتی تاڵەبانی

ئیبراهیم شێخ وەسانی
30.05.2020


(لەساڵیادی دامەزراندی ٤٥ ساڵەی یەکێتی، ئەو پۆرترەیتە دووبارە بڵاو دەکەمەوە، تەنها دەمەوێت بەبیرتان بینمەوە، کە پێویستە کورد لە تاڵەبانی و، تاڵەبانیزم بناسێ) 

                        (١) 

دوای ڕاپەڕین مامەكانم لەئێران گەڕانەوە، لەژێر كاریگەری ئەوان ئێمەش گوتمان 
 ”قەڵای ئێمە شورەی پشتمان سەنگەرمان...
هێزی گەلە (ی .ن. ك) ڕابەرمان...”، وێنەی مامجەلالمان لەماڵەوە هەڵواسی و، لەماوەیەكی زۆركەم یەكێتی و مام بوونە بەشێك لەژیانی ئێمە، منی زارۆك بەجۆرێك گۆشكرام، ئەوەندەی لەخەمی یەكێتی و مامجەلال بووم، لەخەمی وانەكانم دانەبووم، بەهەموو شێوەیەك بانگەشەم بۆ یەكێتی و مامجەلال دەكرد....
لەبیرمە بەبرادەرە هاوپۆلە پارتیەكانم دەگوت ”مەسعود بارزانی تەنها كوردی دەزانێت 
بەڵام مامجەڵال بیستوهەشت زمان دەزانێت”
( بێئاگابووم لەوەی مامجەلال جگە لەكوردی تەنها عەرەبی و فارسی و ئینگلیزی دەزانی، بارزانيش بەهەمانشێوە!!)......

                         (٢)

 مزگەوت و مەلا، كاریگەری ئیسلامیەكان، دواتریش كتێب و ئەفكاری خۆشمەزەی ماركسی، دەوروزەمان منیان لە مامجەلال و حیزبەكەی دوورخستەوە، ئێستاش وەك جاران بەكەسایەتی ئەو سەرسام نیم، بەڵام ئەو زاتە زۆر كاریگەری لەسەر ژیانی من هەبووە، ئەوەندەم باسی ئەو لاكراوە، گوناحە قسەیەك لەسەر مردنی نەكەم . 

                         (٣)

    بێگومان  
ئەگەر من بەتاڵەبانی سەرسامبم یان نا، ئەوا هیچ لەو ڕاستیە كەمناكاتەوە كە ئەو :
سەركردەیەكی خاوەن كارێزما و، شۆڕشگێر و، سیاسەتمەدار و، فێڵزان و، نوكتەچی و، قسەزان و، بەرگریكاری دۆزی كوردیبوو.

                          (٤)

  تاڵەبانی زۆر عاشقی سیاسەت بوو، لەهەشتاو چوارساڵی تەمەنیدا، نزیكەی حەفتا ساڵ بەسیاسەتەوە خەریكبوو.
ئەوەی لەبارەی ژیانی تایبەتی 
  ئەو بەدروستی زانراوە، تەنها ئەوەیە كەیێژن زۆر حەزی لە قەل و، ماسی و، كفتە بوو، خۆشترین میوەش لای ئەو ترێ بووە.

                          (٥)  

 ساڵی چل و حەفت لەتەمەنی چواردە ساڵیدا، پشتی كردە تەكیەی باوكی، وازی لەتەریقەت و شێخایەتی هێناو، بووە پارتی.
ساڵی پەنجاش بەهۆی هەستی نەتەوایەتیی و كێشەی كوردەوە،خەونی منداڵی خۆی پشتگوێخست و، وازی لە كۆلێژی پزیشكی هێناو چووە كۆلێژی یاسا. 

                           (٦)

 لەشەشتو چواریش توانی بەرامبەر  بەهێزترین سەركردەی شۆڕش مەلا مستەفای بارزانی بوەستێ و، لایەك لەپارتی بكاتەوە و، جەلالی و مەلایی دروستبكات. 

                          (٧)

دوای نسكۆی حەفتاو چواریش ئەندازیاری دەستپێكردنەوەی شۆڕشی نوێ یەكێتی و ڕاپەڕینەكان بوو، به‌دۆسته‌كانی گوت ” ئێمه‌ پێويسته‌ حیزبێكی جیاواز لەپارتی بنیاتبنێین كەهیچكات كۆلنەدا”، یەكێتی نیشتمانی كوردستانی دامەزراند.

     
                            (٨)  

 لەسەردەمی زێڕینی ماركسیەتیش بۆئەوەی خۆی لەشوعیەكانی سەر بەسۆڤیەت جیابكاتەوە، بووە ماوی چینی، كە ماركسیەتیش باوینەما، چووە سەر ڕێبازی سۆسیال دیموكراتەكانی ئەوڕوپا.

                             (٩)

 هیچكات چارەنوسی خۆی بەتەواوی بەحیلفێكی نێودەوڵەتی یان ئیقلیمی نەدەبەستەوە، بۆ كورد خەباتی دەكرد، بەڵام بەگوێرەی بارودۆخ خۆی لەگەڵ داگیركەرانی كوردیش دەگونجاند، هاوڕێی حافز ئەسەد بوو، لەشەشتو شەشیش لەدژی مەلا مستەفا هانای بۆ حكومەتی ئێراق برد، لەدوای ڕاپەرینی نەوەدویەكیش یەكەم سەركردەی سیاسی كوردبوو كەدەستی خستە ناودەستی سەدام و یەكتریان ماچ كرد، دەشڵێن لەسەر گۆری ئیمام خومەینیش گریاوەو، بەچەپكە گوڵیشەوە بۆسەر گۆری ئەتاتورك چووە. 

                           (١٠)

لەگەڵ نەیارەكانی بەگوێرەی بارودۆخ دەگۆڕا، هەندێكجار موعتەدڵ، جارجارەش توندڕەو، وتارە ئاگرینەكانی لەكاتی شەڕو ئاشتیدا وەك شمشێری دوودەم وابوون، دەیتوانی لەئاشتی شەڕ دروستبكات و، لەگەرمەی شەریش ئاشتی بخولقێنی.

                          (١١) 

ساڵی نەوەدو هەشت، دوای شەڕێكی خوێناوی لەگەڵ پارتی، بەبێ پرس و ڕاوێژ بەمەكتەبی سیاسی حیزبەكەی، لەئەوڕوپاوە بەدەروازەی ئیبراهیم خەلیلەوە گەڕایەوە كوردستان و، چووە سەری ڕەش، یێژن هەر لەئەوروپاشەوە لەڕێگەی تەلەفون بەحەمایل خانی دایكی مەسعود بارزانی گوتبوو "لەمێژە خواردنی دەستی تۆم نەخواردوە، من داوەتی تۆم" 
كەلەوێشەوە گەڕایەوە بۆ هەرێمی سەوز، لەسەر دواكاری خۆی كۆمەڵێك ئۆتۆمۆبێڵی مۆدیل نوێی بارزانی  بەدیاری لەگەل خۆی بردەوە.

                          (١٢)
                                   
تاڵەبانی زۆرجار زیرەكانە ئۆباڵی كردەوەكانی دەخستە ئەستۆی ئەوانی دیكە، لەنەوەدەكان كاتێك لەگەڵ پارتی لەگەرمەی شەری براكوژیدابوون بەمەسعود بارزانی گوت
 ” ئەوانە كوڕانی مەلای خەنجەر تیژی ژەهراوین”، بەڵام دوای ئەوەی لەگەڵ پارتی ئاشتبوونەوەو، بزوتنەوەی گۆڕان دروستبوو، ئۆباڵی شەڕی ناوخۆی هەموو خستە ئەستۆی نەوشێروان موستەفا.
كاتێكیش زانی مەسعود بارزانی لەكتێبەكەی (بزوتنەوەی ڕزگاری خوازی كورد) هێرشیكردۆتە سەر ئەو، كوردێكی ڕۆژهەڵاتی كوردستانی نزیك لەكۆماری ئیسلامی بەنێوی عیرفانی قانعی فەردی داڵدەدا، كە خەریكی نوسینی كتێبێك بوو لەبارەی مێژوی كورد بۆ نامەی دكتۆراكەی، تاڵەبانی وەڵامی وشەكانی بارزانی بەوشەكانی قانیعی فەرد دایەوەو، تۆڵەی خۆیكردەوە، كە كتێبەكەی قانعی فەردیش بڵاوبوەوە، خۆی لەقسەكانی ناو كتێبەكە بێبەری كردو گوتی
 ”  عیرفانی قانعی فەرد كەسێكی ڕاستگۆنیە، نوسینەکانی پڕن لەهەڵە و قسەی هەڵبەستراو. خۆ من قەڵەمم هەیەو كوردی و عەرەبیش دەزانم بۆ خۆم ئەو شتە مێژووییانە دەنووسم، بۆ دەچم بەوی بنووسم؟!، ڕاستناكات".

                          (١٣)

هەرچەندە لەگەڵ ئەندامانی حیزبەكەی خراپ هەڵدەچو، تەنانەت هەندێكجار ئەگەر پێویستی كردبا گۆچانەكەشی بەكاردەهێنا، بەڵام لەسەر شاشەی تیڤیەكان و، لەكاتی پەیوەندیە دبلۆماسیەكانیدا هەردەم دەم بەخەندەو پێكەنین بوو.

                           (١٤)

 سیاسەتی خۆی زیاتر لەسەر ئیدارەدانی كێشەكان بەڕێوە دەبرد، نەك چارەسەركردنیان، بۆیەش كاتێك ئەو لە(یەكێتی و عێراق) دووركەوتەوە، هەردووكیان توشی لێكترازان و بێسەروبەری زۆر هاتن.
   

                           (١٥)

كەسایەتیەکی زۆر گرینگی سیاسی كورد بوو، دەورێكی زۆر كاریگەری (بەچاك و خراپ) هەبووە لەسەر دۆزی كورد، ڕەنگە چاڵاكترین کەسایەتی نێو بزوتنەوەی ڕزگاری خوازی كورد بوبێت لەماوەی چل ساڵی ڕابردوو، دەڵێن نوسەرێكی عەرەبیش لەبارەی ئەوەوە  گوتویەتی ” ئەو ڕێوی سیاسیەتە”، هەرواشبوو، بەتەنها چووە ناو پارتی، كە لەپارتیش چووە دەرێ، نیوەی زیاتری سەركردایەتیەكەی لەگەڵ خۆیبرد، چەند جارێكیش لەگەڵ پارتی كەوتنە شەڕێكی خوێناوی بۆ لەناوبردنی یەكتر، بەڵام سەكەوتوو نەبوون، ئەو پارتی و سەركردایەتیەكەی بەبنەماڵە پەرست و خێلەكی وەسفدەكرد، وەلی هیچكات نەیتوانی حیزبەكەی والێبكات كە لەپارتی نەچێت، بۆیە لەدوا ساڵەكانی تەمەنیدا بەتەواوی دەستبەرداری دروشمەكانی ڕابردووی خۆی بوو، هەنگاوی مەزنی نا بۆ بەبنەمالەیكردنی یەكێتی و، تەسلیمكرنی حیزبەكەی بەژن و كورەكانی. 

                         (١٦)

جەلال تاڵەبانی پەیوەندیەكی بەرفرەوانی نێودەوڵەتی هەبوو، هاوڕی و هاوکاری زۆركەسی نەیاری یەكتربوو، لەیەك كاتدا دۆستی كۆماری ئیسلامی ئیران و ولایەتە یەكگرتوەكانی ئەمەریكاش بوو،
  ئەگەر تەمەن بواری دابایە، ڕەنگە بشبوایە سكرتێری گشتی نەتەوە یەگرتوەكان 
بەڵام مرد 
ئەویش مرد
هەموومان دەمرین
ئەوەی ماوەتەوە تەنها مێژوەكەیەتی.


*‌ئەو وتارە لە ٣ گەڵاڕێزانی ساڵی ٢٠١٧ نووسراوە، كاتێک گوێبیستی هەواڵی كۆچی دوایی جەلال تاڵەبانی بووم، تەزویەکی سارد بەلەشمداهات، به‌خومم گوت: پێويسته‌ شتێك بنووسی..
بێگومان بایۆگرافیای تاڵەبانی شایەنی ئەوەیە بەوردی دیراسەبكرێت.
ڕاستە ئەگەر مرۆڤ مرد شەیتانیش دەستی لێدەشواو، باشنیە بەخراپە باسیبكرێت، بەڵام ئەم عورفە هەرگیز سیاسیەكان ناگرێتەوە، بێگومان تالەبانی لایەنی سلبی بەرچاویشی هەبوو، بەڵام من لەو وتارە نەچویمەتە ناو مێژوی دوور و درێژی ئەو، بۆ ئەوەی حوكم لەسەر چاكی و خراپی کردەوەکانی بدەم، ئەوە كاری من نیە، ئەوە بۆ مێژوو جێدێڵم...
تەنها پۆرترەیتێكم لەڕوانگەی خۆمەوە بەوشە بۆ تاڵەبانی كێشاوە، دەزانم زۆر شت ماوە بگوترێت
بەڵام ئەوەی من پۆرترەیتە، پۆرترەیتیش واتە نیوە وێنە.....

copyright 2019, All Rights Reserved Developed by TeraTarget for Digital Intelligence and IT Innovations