دۆخەکە بەرەو تەمومژ، گەریلا هەر سەربەرز لە کەژ

هاوژين زيبا
28.05.2020

شەهیدکردنی گەریلاکانی ماوەت، بۆ دەسەڵات و خەڵکی باشوور وەک هەواڵێکی ئاسایی تێپەڕی.  ئەم ئاساییبوون و بێباکییە، ئەم ڕاهاتنەی گوێ و چاوی دەسەڵات و خەڵک، تێپەربوونی ڕووداوە مەرگەساتەکان،  سەردەمێکە دوور لە ئاکاری مرۆڤبوون و هەست بە بەرپرسیارکردن، کە دەسەڵات لەناو خەڵکیدا چاندوویانە. 


تەنها ڕاوەستان لەسەر ئەو هەژموونەی لەواندا جێماوە، پێمان دەڵێت ئێمە چەند بێباک و بێشعوورانە دەرهەق بە مەرگی ئەوان مامەڵە دەکەین. 


لەوان کۆڵەپشت و کیسەخەو و چادرێک، چەند وێنەیەک بەجێماون.  ئەوان لەپێناوی ئێمەدا؛ دوور لە شارنشینیی و رەفاهیەتدا، دوور لە سایەی  ماڵ و کەسوکاردا، لەبری کەوتنە شوێن ژیانی شەخسی و هەڵپەهەڵپ و چێژی کاتی، ژیانێکی ماڵ بە کۆڵ و کۆچەرییان هەڵبژاردووە، ژیانێکی لەخۆبوردوانەی پڕ لە مەینەت، بەڵام سەربەرزانە و لێوانلێو لە بەرخوردان و ئاوەزی خۆیبوون، کوردبوون...


هەریەك لەو گەریلایانە، بەرهەمی پەروەردەیەكی دوور و درێژن، لە ڕۆژانی سەخت، لە ژیانێکی ڕەهێڵە و سەرماوسۆڵەی تاقەتپڕوکێن، بەڵام سیخناخ لە ئیرادەی پۆڵاین و تێکۆشان. ئەوان هەمیشە لە لوتكە و دامێنی شاخەکاندا دەدرەوشێنەوە و دەبریسکێنەوە...


دۆخەکە تادێت خراپتر ئەبێت. دەوڵەتان لە کاتی قەیراندا ماسکە مرۆڤدۆستانەکەیان فڕێ دەدەن. ئەوەی جاران بە شاراوەیی دەیانکرد، ئەمێستا بە ئاشکرایی دەیکەن. گوێیان لێ نییە، بە چی تۆمەتبار دەکرێن. ئەم قەیرانی ئابووریی جیهانییە، ئەگەر خەڵک هەر سەرکز و خۆشباوەڕ بێت،  نەخشە سیاسییەکان بەرەو دۆخێکی مەترسیدارتر دەبات. 


ئەلێرەشدا پێشوەختە زەمینەکەی بۆ خۆشکراوە، دوو دەزگای ئەمنی، کە لە هەردوو زۆنەکەوە دەسەڵاتیان گرتۆتە دەست، دوورن لە پڕەنسیپ و بەهای ئەخلاقیی،  ئامادەن لەناو گەمە سیخوڕییەکاندا،  لەئێستا خراپتر تاڵانفرۆشمان بکەن، بە ئاشکرا بمانفرۆشن.

copyright 2019, All Rights Reserved Developed by TeraTarget for Digital Intelligence and IT Innovations