کورد نەتەوەیەکی ئازایە یان ترسنۆک!

ماجد خەلیل
25.02.2020

هەڤالی شۆرشڤانم، هەڤالی بارگرانم!
کورد نەتەوەیەکی ئازایە یان ترسنۆک!

بەدڵنیاییەوە تفەنگێک بدەیتە دەست هەریەکەمان، بێ یەکودوو لولەکەی روودەکەینە بەرامبەرەکەمان!
 ئەمە شتێکی سروشتییەو سڕڕەکەی لە جیناتی جەوان و پیرماندا ئامادەیی هەیە.

دەستپێکی نەوەدەکانم خاس لەیادە، بەرپشتوێنی هەر لاوێکی لاتوپاتت بگرتایە، گەر دەمانچەیەکی پێوە نەبووایە، ئەها بەپۆزی پارچە پەڕۆیەکی سەوزو سورو زەردو شینی ئاسمانییەوە پێچرابوو، ئەوا حەوت مەغزەنی لە پشت دەبوو، گەر سەرسنگی هەریەکێکیان وێنەیەکی تاڵەبانی پێوە نەبووایە، ئەوا بێسێودوو وێنەیەی بارزانی پێوەدەبوو، ئەو وێنەیەی کە دەسی لەکەلەکەی داناوەو قاتێکی کەتافی تۆختۆخی لەبەردایە، وەیا وێنەی ساڵح یوسفی و مەحمود سۆرانیش هیچیان کەمتر نەبوو لەوانی دی. 

مەیل و میزاجی ئەو دەمە وەهابوو، کێبڕکێ و کەوکوژی دانیشتن بۆیەکتری و شەڕەکۆڵان و یەکڕاماڵین دیارترین دیاردەکانی شاربوون. 

ئەودەم باوترین ڤۆکابولەری سەر زاری کورد وشەی گوندە بوو، فڵانی گوندەو فیساری گوندە. گوندە کەسێ بوو بێ سڵەمینەوە دەیدا بەمل دێیەکدا دەیسوتان، گوندە کەسێ بوو پیاوی بە بیجامەوە لەماڵ دەردەهێناو بە فیشەکێک ساردی دەکردەوە، گوندە کەسێک بوو بازگەی دادەناو گومرگی دەسەندو کێی بویستایە رووتی دەکردەوە، گوندە کەسێک بوو دە دکسی جامڕەشی بێ ڕەقەم بەدووایەوە بوون و سەت کەس پاسەوانی بوون و بە زەوقی گونی خۆی گونی گونداری دەردەهێناو گەڕی بە عاڵەمێ دەفرۆشت و کەسیش پێی نەدەگوت کەرت بە چەندە.

پاش سی ساڵ حوکمی حزبی بەعس، پاش دەیان ساڵ بندەسی و بڕینەوەی باڵای شەڵاڵی نەتەوەکەمان، کەوتین بەمل فەرهودو فەلسەفەی براکوژیدا.
 کەوتین بەمل گردێ گوندەی سەربەمۆرو نەدیوبدیدا.

 پاش سی ساڵ ئەنفال و ئەجداد دەرهێنانمان لە ڕەگەوە، ڕامانکردە سەر ڕەبایەکانی یەکتریی و ئاڕبیجیمان بە پەیکەری شەهیدەکانی یەکترییەوە نا.

 پاش دەیان ساڵ یەسیەم پێکردنمان لەلایەن بەعسەوە، بە لەتە بلۆک سەری یەکتریمان پانکردەوەو لاشەی  بەجێماوی لای یەکتریمان بەشوێن ماشینەوە ڕاکێشا. 

ئەمانەی ئەم کورەی کڵپەو بڵێسەیان بۆ یەکتریی سازدابوو، کوڕانی ئازای شاخ و کوڕانی ڕۆژی تەنگانەی شارو کوڕانی چاپوکسواری شۆڕش بوون. 
ئەوانەی بەستە بەرد بزوێنەکانی شڤان پەروەر، ئەوەی لە رادیۆکانی شاخەوە هاواری دەکرد":هەڤالی شۆڕشڤانم، هەڤالی بارگرانم. ئەوانەی هۆکاکی پێشمەرگەکەی حەمەجەزایان بە دەستڕێژی گولەوە دەچزاند بە تەپڵی سەری یەکترییەوە. 

ئیدی ئەزمونێکی خەستەو خراپیان وەکو شاشەی ئێجدی، وەکو رۆژی ڕووناک نیشانی ئەم هەرێمەدا.

ئەو پێشخوان خواردنەی ناسیۆنالیزم و ئایندارییەی عەرەب و تورک و فورس لەلایەک، سفرەدڕی و سپڵەیی و خیانەت و خۆخۆریش لەلایەکیتر بابوەستێ.
ئایا ئەم ترسوبیمو دڵەڕاوکێیە بۆ؟ ئەم ترسنۆکییەی کورد لە چارەی چ نەتەوەیەکیتردا وەها ڕەنگیداوەتەوە؟ 

ئەم بێئیرادەیی و بێ ئۆقرەیی و بێ سەبرو سەلوانییەی کورد لە کام کانی کرۆمۆسۆمەوە هەڵتۆقیوە؟

لەوپەڕی موحیتەوە مەغریب و جەزائیر تا ئەمپەڕی خەلیج جەنگی زلهێزترین زاڵم کرا. لەوپەڕی ڕۆژهەڵاتی دورەوە ڤێتنام و کۆریا کێوی ورەیان نیشاندا دژ بە فەڕەنساو ئەمەریکا.

وەیا هەرگیز مێژوو ناتوانێ جوامێریی  ئەمریکای لاتین بنوسێتەوە لە سەدەی نۆزدەوە تا ئەمڕۆ، ئەوان ئازابوون و ئازادن. 

ئەدی کورد، ئایا ئازان؟ ئایا ئازادن؟

لەمێژە دەوترێت کورد ئازایە، ئایا ئەمە لەقەبێکی قەشمەرانەیە یان قانونێکی مێژوویی؟ ئەرێ بەڕاست پێناسەیەکی ئاوەژووکراو نەبڕاوە بە بەژنی ئازایەتی کوردا؟ هەر بەڕاست کورد ئازان؟

لەکوێ و کەی؟ 

ئایا سایکۆلۆژیامان سیخناخ نییە بە ترسو تۆقین؟ ئایا ئیرادە لەکوێی مێژووماندا خۆیمەڵاس داوە.

هەر پێرێ بوو ئەزموونی سی ساڵ حوکمڕانی کوردی بە خۆی و هەولێری پایتەختییەوە لەبەرامبەر هەمەرێکی داعشدا کە هاتبوونە کن بەنزینخانەیەک بەنزین تێبکەن، کۆڕەوێکی ملیۆنی پێخستینەوە!

با هەمەرەکەی داعش لەشوێنی خۆی بووەستێ.

  ئەم ئازایەتییەی کورد رووداوێکی بیرخستمەوە. پیالەیەکی پڕ چەرمەسەری لای ئێمە، کەتاقی بڕابوویەوە، دەیوت:" داخی هەرچی پەتپەتی ژیانە لەلام دڵم دەرچووە، وەلێ داخی تڕەکانی فڵانە کەسم لەیاد ناچێ. تومەز لەو چەموچوخڕەی ئاوایدا پیرێژنێکی تەنگەتاو دەبینێ، وەلێ ئەو ئەم نابینێ، پیرەژنە بێ خەمو خەتەر خۆی هەڵدەماڵێ، ئیدی نەیەکو نەدووان حەشرو نەشری خۆی دەکاتن، ئەمیش لەولاوە بڕست لەخۆ دەبڕێ، ئەوساو ئێستەیشی لەگەڵدابێ هەروا ئەو سڕە لە ناخیدا گنگڵدەدا!

وەلێ منیش سڕی ئەوەم پێهەزم نابێ کە بەچ غرورو غەدرێکەوە کوردەواری بە جووەکان دەڵێن ترسنۆک هههههه. ئەیا ئەم ناتۆرە نانەجیبەی کورد چ لەرووی فسیۆلۆجی و بایەلۆجییەوە چ جیاوازییەکی لەتەک خۆهەڵماڵینی پیرەژنەکەدا هەیە، ئەمیان بەدەم دەیڵێ و ئەویان بەویتر.

بەڵێ ئەو جووانەی بە چەند ملیۆنێکەوە هەشت ملیار مرۆڤ بە کۆنتڕۆڵ و دوگمەی وان هەڵدەکرێن و دەکوژێنەوە. ئێمە پێیا دەڵێین ترسنۆک و بۆخۆیشمان ئازاین. ئێمە گیپاڵی عەبادی مەگەر خوا بزانێ چ مەخسەرەیەکی مێژوو بەخۆوەنەدیوی پێوەکردین. 

ئێمە ئەسراری ئیمان و ئیرادەی نەبوومان لەترسەوەیە تانوپۆی تەنیوین، ترسنۆکترین تاپاری سەر رووی زەمینین. تەماشای ریزە دەبەو ماشینی بەنزینمان، تەماشای پشت سندوقی پڕ لە رۆنی ئاڵتونساو برنجی ئەحمەدو مەحمودمان، تەماشای پەلەپەلو پەلەقاژێی کەمامەو قیناعمان، تەماشای ورەی سفری ئەنفلۆنزاو کۆرۆنامان، تەماشای دیقی دینارو دۆلارو موچەی وەک گێسکی هەیاسمان، تەماشای ورگ و وزەی پڕکالۆری نەسوتاومان، تەماشای مێشکی کاسوکولی وەک کابولی  کیژو ژنکوژ و دەستدرێژیی سەر زاڕۆمان، تەماشای بەیاننامەی باکردووی پڕ لە پاروی خێڵ و ناوچەو نیپۆتیزم و مەزهەبی ئیستیرادکراوی سەربڕینی شانۆکانمان، تەماشای سوتانی تابلۆو تەکبیری تیرۆرمان، تەماشای نزای ئیگۆر و خۆپیشاندانی غەزەو حزبوڵامان، تەماشای هەڵۆ و مەزهەرو ماشەڵامان!

copyright 2019, All Rights Reserved Developed by TeraTarget for Digital Intelligence and IT Innovations