لالۆ پێنجوێنی و پاشكەكەوتەكەی مەلا بەختیار

محەمەد رەئوف
13.02.2020


"ئەو دوو ساڵەی توشی پاشەكەوتی موچە و ئەو كێشانە هاتین لەگەڵ عێراق، ئەوەی حكومەتی هەرێمی كوردی مێژوو رۆژێك لە رۆژان دەینوسێت، بارتەقای هەموو ئەو خەباتە سیاسیەیە كە ئێمە لە 40 ساڵی رابردوو كردوومانە" ئەمە دەقی ئەو قسانەیە كە مەلا بەختیار لە پانێڵی زانكۆی لوبنانی فەرەنسی لە هەولێر كردی ( هەرچەندە بە رونكردنەوەیەك وتی قسەكانم شێوێنراوە)
لەحزەی دوو ساڵی پاشكەوتی موچە ناشرینترین لەحزەی سیمای حوكمڕانی هەرێمی كوردستان بوو، گەر 40 ساڵی خەباتی شاخ و پێشمەرگایەتی هاوشێوەی دوو ساڵی حوكمڕانی ناشرینترین ئەزمونی حوكمڕانی هەرێم بێت ( نێچیرڤان بارزانی دانی بەخراپی بڕیارەكەدا ناو سوپاسی ئارامی خەڵكی كرد لەبەرامبەر ئەو بڕیارەی داویانە)، ئەوا خەباتی شاخ جگە لە چەوسانەوەی میللەت هیچی دیكە نەبوو.
لالۆ عەبدولڕەحمان پێنجوێنی ( 1933 -2012) یەكێكە لەو پێشمەرگانەی كە لە ساڵی 1979 دەچێتە شاخ و بەیەكێك لە پێشمەرگە هەرە دڵسۆز و ئازاكان دەناسرێت، لە ساڵی 1982 رژێمی بەعس ژن و سێ منداڵەكەی دەگرن و دەیانخەنە زیندان لە ئەمنی پێنجوێن، لەو ساَلەدا دەزگای ئیستخباراتی بەعس لە رێگەی خزمێكی خۆیەوە نامەیەك بۆ لالۆ پێنجوێنی دەنوسێت و سێ بژاردەی دەخاتە بەردەست بۆ ئازادكردنی ژن و سێ منداڵەكەی بە پێچەوانەوە لەناو زینداندا دەیانكوژن:
- وازهێنان لە پێشمەرگایەتی و تەسلیم بوونەوە
- یان مانەوە لە شاخ و زانیاریدان بە ئیستخبارات
- یان لە گوندێك دابنیشەو هەقی شۆڕشت نەبێت
لالۆ پێنجوێنی بە نامەیەك وەڵامی بەعس دەداتەوەو لە نامەكەدا دەنوسێت:
" من بۆ رزگاركردنی هەموو ژن و منداڵانی كورد چومەتە شاخ و بومەتە پێشمەرگە، ئێستا ئێوە داوای ئازادكردنی تەنها 4 كەس لە من دەكەن، بۆیە داواتان لێدەكەم بە گەیشتنی ئەم نامەیەی من یەكسەر ژن و سێ منداڵەكەم بكوژن"
كەس بەم وەڵامی لالۆ پێنجوێنی نازانێت تەنانەت سەركردەكانی شۆرشیش ئاگادارناكاتەوە بەتایبەت ( مام جەلال و كاك نەوشیروان) كە لە نزیكەوە دەیانناسی و بەرپرسی بوون، لەدوای راپەڕینی بەهاری 1991 و دەستگرتن بەسەر زۆرێك لە بەڵگەنامەكاندا و پاشان ناردنیان بۆ ئەمریكا، ئەو بەڵگەنامانە لە ئەمریكا جیادەكرێنەوە، لەناو بەڵگەنامەكانی بەعسدا ئەو نامەیەی لالۆ پێنجوێنی دەدۆزرێتەوە دەكەوێتە بەردەست ( شۆڕش حاجی) كە ئەو یەكێك بوو لەو تیمەی بۆ ماوەی دوو ساڵ لە ئەمریكا كاریان لە جیاكردنەوەو پۆلێنكردنی ئەو بەڵگەنامانەدا كردووە، بە بینی نامەكە زۆر سەری دەسوڕمێت كە پێشمەرگەیەك بە دەستوخەتی خۆی نامە دەنێرێت بۆ بەعس و بێمنەتییان لەبەرامبەردا نیشاندا دەدات كە ژن و منداڵەكانی بكوژن، دواتر نامەكە كۆپی دەكات و دەینرێت بۆ ژن و منداڵەكەی لالۆ پێنجوێنی و ئێستاش نامەكە ماوە.
لە پاڵ دەموچاوە ناشرینەكانی شۆڕشدا كە ئەمڕۆ زۆرینەیان بونەتە بازرگان و مافیا و سەرمایەدارو بەپێچەوانەی ئامانجەكانی شۆرش میللەت دەچەوسێننەوە، رەنگە ئەو لەنامەیەی لالۆ پێنجوێنی جوانترین لەحزەی شۆڕش و پاكترین روحی شۆڕشگێڕی بوبێت.
ئایا چواندنی لەحزەی دوو ساڵی پاشەكەوت كە رەمزی چەوساندنەوەو قوربانیدانی موچەخۆرانی هەرێمی كوردستان بوو، بە بارتەقای تەواوی خەبات و شۆڕش و شەهید و ئەنفال و هەڵەبجەو بارزانییەكان و لەسێدارەدانی ئەبوغرێب و ئەمنی عامە، چی لێكدانەوەیەك هەڵدەگرێت..؟؟

copyright 2019, All Rights Reserved Developed by TeraTarget for Digital Intelligence and IT Innovations