بیری كوردستانی ئەوسا دەكەم

تاڤگە محەمەد
12.02.2020


بیرم دێت ساڵی نەوەدەكان هەرزەكار بووم، هیچ رێگایەكی تر نەبوو بۆ سەرقاڵی جگە لەكۆڕی فەلسەفی‌و شیعر‌و سەیركردنی شانۆگەری‌و سازدانی فێستیڤاڵی میوزیك‌و گۆرانی‌و پێشانگای شێوەكاری‌و چەندین چالاكی جۆراوجۆری رۆشنبیریی، ئەوكات شار (شێركۆ بێكەش‌و شێرزاد حەسەن‌و بەختیار عەلی‌و مەریوان وریا قانع‌و ئاراس فەتاح )‌و تادوایی، لەگەڵ چەندین نووسەری گەنجی خاوەن فكرو پڕ لە وزەی تێدابوو كە بە هەزاران كەس گوێگرو بینەریان بوون، بە جۆرێك  زۆربەی جار سەرتەختەی شانۆكانیش پڕ پڕ ئەبوون لە گوێگر، ئەم چالاكیانە ببونە هەوێنی پێگەیاندنی نەوەیەكی وریاو رۆشنبیر..

گەنجی ئەوكات سەرقاڵی خوێندن‌و خوێندنەوە بوون، ئەوەش دەزانم كە لەسەرەتاكانی راپەڕیندا بووین‌و هێشتا نەشوەی راپەڕین‌و رزگاربوونمان لەدەستی رژێمێكی دڕەندەی وەك بەعس بەرینەدابووین‌و حەزو خۆشیی رزگاری‌و ئازادی سەرگەرمی كردبووین، تەنانەت سیاسییەكانیشمان وەك مرۆڤی ناوازەو رزگاركەر تەماشا دەكران‌و خەڵك ئارەزووی ئەوەی دەكرد ئەگەر لە دووریشەوە بێت تەنها چاویان پێیان بكەوێت یان بواری سڵاوێك بدۆزنەوە.

بیرمدێ‌ لەو سەروبەندەدا وەك سیاسییەكی خوێندەوارو رۆشنفكر(مەلا بەختیار) كە ناوبەناو كۆڕی دەكردو لەگەڵ زۆرێك لە نووسەرەكانی ئەوێ‌ رۆژێ‌ دیبەیتی دەكرد، هەموو كۆڕو دیبەیتێكی ئەوان هۆڵەكان جمەیان دەهات‌و گەنج‌و پیرو ژن‌و پیاو بە تامەزرۆییەوە گوێیان رادەدێرا، ئەمە جگە لەوەی هەندێجاریش لێرەو لەوێ‌ هەندێ‌ سیاسی تر دەچوونە ناو خەڵك‌و كۆڕو سیمیناریان دەكردو بە باشی گوێ لەهەموویان دەگیرا، بەڵام بەداخەوە پاش بۆنكردنی نەوت‌و دۆلارو چاوسوربوونی گەورە سیاسی‌و دەسەڵاتدارەكانی ئەم هەرێمە‌و دروستبوونی شەڕی ناوخۆو براكوژی‌و پەرتكردنی ئەم هەرێمە بۆ دوو زۆن‌و چەندین كارەسات‌و رووداوی نەخوازراوی دیكە، دۆخێكی تری خوڵقاند بەجۆرێك كە هەم رۆشنبیرو هەمیش هاووڵاتی‌و تاكی ئەم وڵاتە پاشەكشەیەكی بەرچاویان كردو كۆڕو دیبەت‌و زنجیرە سیمینارە رۆشنبیرییەكان گۆڕدران بە:

-سەرقاڵكردنی خەڵكی بە شەڕو ململانێ‌و دووبەرەكی‌و ناوچەگەرێتی‌و سازكردنی فێستیڤاڵی خێڵ‌و عەشیرەت‌و تۆخكردنەوەی هێڵ‌و خەتە بە زۆركێشراوەكانی چینایەتی

-خەڵك سەرقاڵكرا بە پارەپەیداكردن‌و ئەو بارگرانییە زۆرەی خرایە سەرشانی

-سەرقاڵكرا بە نەبوونی كارەباو ئاوو نەبوونی سەرەتاییترین خزمەتگوزاری‌و تا دەگات بە نەبوونی موچەو نەوت‌و ئەوانی تر

-رونتر خەڵكی بە دۆخێكی پڕ لە ناخۆشی‌و نائومێدی سیاسی‌و كۆمەلایەتی‌و ئابووری گوزەر دەكات‌و تا ئێستاش ئەم دۆخە نەخوازراوە درێژەی هەیە..

بەداخەوە ئەم دۆخە وایكرد شار خامۆش بوو لەو چالاكییە رۆشنبیرییانەو هەلی رەخساند بۆ سەرهەڵدانی ئیسلامی سیاسی‌و چەندین حزب‌و حزبۆكەو شانەی نوستو، كە پێموایە ئەگەر ئەم دۆخە بەردەوامی‌و درێژەی هەبێت بەجۆرێك نمایش دەكەن‌و دەبنە بارێكی گەورە بەسەر شانی خەڵكەوە كە داعش لەچاویان جێ باس نەبێت!

ئێستا پایتەختی رۆشنبیریی بەهۆی ئەو دۆخەی كوردستانی تێكەوتووە لەو گوڕو تینە رۆشنبیریی‌و هونەرییە كە لەسەرەتاكانی راپەڕین هەیبو پاشەكشەیەكی مەترسیداری كردووەو ئێستا لە بری ئەوەی هۆڵەكانی شانۆو سینەماو كۆنسێرتەكانی گۆرانی‌و میوزیك‌و كۆڕو كۆبوونەوە رۆشنبیرییەكان پڕببن لەگوێگرو بینەرەكانیان، كەچی لەسەردەمی فراوانی خوێندنگەكان‌و گەشەی زانستدا، حوجرە زیندوو كراوەتەوە بە بەرگێكی سەلەفی‌و مزگەوت‌و حوجرەی سەلەفیەكان جمەیان دێت، بەناوی خوداو ئاینەوە هەندێ‌ لە مەلاكان سوكایەتی بە هەموو ئەوانە دەكەن كە وەك خۆیان بیرناكەنەوە، ئەمە جگە لەوەی دینداری‌و ئاینەكەی ئێستای خەڵكی تەواو جیاوازە لەو ئاین‌و دیندارییەی خەڵك لە پێشوودا هەیبوو، كە بەجۆرێكە بەناوی ئاین‌و خوداو پیرۆزییەوە سیاسەت دەكەن‌و توندوتیژی‌و بیری توندوئاژۆیی بڵاو دەكەنەوەو هەر رۆژەو چینێكی ئەم كۆمەڵگەیە دەكەن بەگژ یەكدا..

نایشارمەوە پڕ بەدڵ بیریی ساڵی نەوەدەكان دەكەم كە هێشتا لەسەرەتای بەهای راپەڕیندا بووین، كە هێشتا پڕبوون لە جوانییەكانی ژیان‌و دەتوانرا زۆر لەوە جوانتری بكەین پێكەوە، بەڵام بەداخەوە نەك نەمانتوانی جوانتری بكەین بەڵكو ئەو كەمە جوانییەی ئەو سەردەمشمان گۆڕی بۆ ناشرینییەك كە هەمومان ئێستا لێی بێزاربین....

زیاتری نوسەر

copyright 2019, All Rights Reserved Developed by TeraTarget for Digital Intelligence and IT Innovations