كاندیدە دەرنەچووەكانی سەركردایەتی یەكێتی

ئاران غەفوور
29.12.2019

پاش ١٠ ساڵ لە سەدان هەوراز و نشێو و كێشەی گەورە و كارەسات و هێرشی فراوان و بەربڵاو، بۆسەر یەكێتیی نیشتیمانی كوردستان، كۆنگرەی ئەو حزبە بەسترا، ئامادەكاری و كۆنفڕانسە ناوخۆییەكانی یەكێتی گڕوتینێكی نوێی بەخشی بە كادرەكانی ئەو حزبە، پاشان بۆ سەركردایەتی یەكێتی نزیكەی نیوەی ئەندامانی كۆنگرە كە هەزار كەس بوو خۆیان كاندید كرد.

كۆنگرەیەك پاش ١٠ ساڵ، پاش ئەو هەموو كێشەیە و لە غیابی مام جەلالدا ببەسترێت بێ كەم و كورتی نابێت، بەڵام پاش ئەو هەموو ئاستەنگەش، كۆنگرەی یەكێتی لە كۆنگرەی سەرجەم حزبە كوردستانییەكانی دیكە باشتر و دیموكراسیانە تر بوو و دەبێت، دیارە ئەنجومەنی گشتی یەكێتی لە ١٢١ ئەندام پێك دێت، واتە ئەگەر ٥٠٠ كاندید هەبێت ٣٧٩ كاندید ناتوانن بگەنە سەركردایەتی یەكێتی، ڕەنگە لەو ١٢١ كەسەی سەركەوتون كەسانی وای تێدا بێت كە شیاوی ئەو پلە و بەرپرسیارییەتیە نین، كەسانێكی دیكەش لەو ٣٧٩ كاندیدەدا هەبێت كە شیاو بوون بۆ ئەو بەرپرسیارێتییە، بەڵام هەندێ پێشهات و كاریگەری زاڵ بوون بەسەر بەشێك لە بارودۆخەكەدا، ئەمەش لە هەموو هەڵبژاردنێكی دیموكراسیترین وڵاتەكاندا ڕوئەدات.

هەر لە ڕۆژی دیاری كردنی كۆنگرەی چوارەمی یەكێتییەوە، پارتی و دەزگای هەواڵگری ئەو حزبە لە هەوڵی چڕدا بوون ئەو كۆنگرەیە نەكرێ، چەندین ملیۆن دۆلاریشیان لەو پێناوەدا سەرف كرد، چونكە دڵنیا بوون كە ئەنجامی كۆنگرە بە دڵی ئەوان نابێت، و بڕیاری سیاسی یەكێتی ئەمجارە لە دەستێكی پۆڵاینی خاوەن ئیرادەدا ئەبێت، پاش شكست هێنانی هەوڵەكانیان وەك هەموو جارێك! كەوتنە دنە دانی ئەو كەسانەی سەركەوتوو نەبون بۆ گەیشتن بە ئەنجومەنی سەركردایەتی.

زۆرینەی ئەوانەی سەركەوتوو نەبون بە ڕۆحێكی فراوان و بیرێكی سەردەمیانەی دیموكراسیانە ئەنجامەكانی قبوڵ كرد، كە تێیاندا بوو شایستەی ئەو پلەیە بوون، بەڵام بەشێكی تریان بە مەبەست بێت یان بێ مەبەست سواری ئەو شەپۆلە بەدە تەشویشە هەواڵگرییە بوون.

كێن ئەوانەی ئەنجامەكان قبوڵ ناكەن؟

تەركیز بكەنە سەر ئەوانەی ئەنجامەكان قبوڵ ناكەن، ئەو كەسانە چەندین ساڵە خاوەن پلە و پۆستی حزبی و حكومین، لە (وەزیر، پەرلەمانتار، ڕاوێژكار، بەڕێوبەری گشتی، ئەندامی سەركردایەتی، و ئەندامی مەكتەبی سیاسی...هتد) یان تێدایە، بەیارمەتیتان ئەتوانین بزانین بۆچی پێویستە ئێوە بچنەوە ئەنجومەنی سەركردایەتی یەكێتی؟ یەعنی ئێوە پێشتر لە پلە و پۆستی حزبی و حكومیدا چ خزمەتێكتان بە وڵات و شار و حزب و كادرەكانی حزب كردوە تاكو خۆتان بە زەروڕەتی ئەم قۆناغە حاسمەی یەكێتی بزانن؟ ئەتوانن ئێوە مێژووی سەروەری خۆتان هەڵبدەنەوە و ئێمەش مێژووی گەندەڵی و ئابڕوبەری ئێوە هەڵبدەینەوە و بزانین كێ شایەنی متمانە و كێ شایەنی دادگایی كردنە؟

یەعنی بەشێك لە ئێوە كوڕ و نەوەكانتان ١٠ ساڵە چەتەیی و ڕێگری، دزی و فزی، بازرگانی ناشەریفانە ئەكەن بەسەر خوێنی خەڵك و كادرانی یەكێتی و هاوڵاتیانەوە، ئێستا چاوەڕێن هاوڕێ و كەسوكاری ئەو بەشمەینەتانە لە كۆنگرەیەكی چارەنوسسازدا متمانەی كاری نوێتان پێ بدەن؟

مشتێك لە خەرواری مێژوی بەرپرسیاریەتیتان

هەموو ئەوانەی ڕەخنەی نابەجێ ئەگرن و دەیانەوێت ڕەخنەكانیان تێكەڵی ڕەخنە شیاوەكان بكەن، كادرانی یەكێتی زۆر باش مێژو و هەڵسوكەوتی كارە نابەجێكانتان لە سەردەمی بەرپرسیارێتی ئێوەدا بیر ماوە، من وەك خۆم سەدان وردەكاری ئێوەم لەبیر ماوە، كە چۆن كاری خۆتان و منداڵ و نەوەكانتان بووە هۆی پاشەكشێی بەرچاوی یەكێتی، لێرەدا ڕەنگە خۆتان بناسنەوە و ئیتر بێدەنگی هەڵبژێرن.

كاتێك نەوە و كەسە نزیكەكانتان، لە كارمەندی فەرمانگە و دەزگا ئەمنییەكان ئەدەن و فەرمانیان بەسەردا دەكەن، كاتێك سەرقاڵی دەیان بازرگانی ناشەریفانە و قەدەغەكراون، كاتێك جاسوسی بۆ ئەملا و ئەولا ئەكەیت، كاتێك دەیان ڕوداوی دەسترێژی ئەخلاقی و تەحەڕوش ئەنجام ئەدەن، كاتێك خۆتان و كوڕ و كەسەنزیكەكانتان بە پارەی دزراو سەرقاڵی كڕینی باخ و شوقە و سەیارە و مۆبایلی گرانبەهان بۆ چەند لەشفرۆشێك، كاتێك كادری حزبەكەت ئەبێ سەد واستە بكات تا بتبینێت و كارێكی بۆ ڕابپەڕێنی، كاتێك پێش بەرپرسیارییەتیت دینارێك پێ نەبوو و پاش بەرپرسیاریەتیت نازانی خاوەنی چەند ڤێلا و سەیارەی، كاتێك كادری یەكێتی سەرقاڵی جۆزە هەڵدانەوەیە و تۆش بە ملیۆن دۆلار لە قومارخانەكانی قوبڕسدا ئەدۆڕێنی، كاتێك كوڕ و كچەكانی تۆ سەرمەستی ئەحلا كردنی ناو باڕودیسكۆكانن، و كادری یەكێتی پاش ٧٠ ڕۆژ چاوەڕێی موچە ٤٠٠ هەزاریەكەیەتی، كاتێك ڤێلا و شوقە و باخی چەپەكت هەیە و بە ڕاست و چەپدا بانگێشتی ئەم كچ و ئەو خانم ئەكەی بۆ خواردنەوەی شەرابی سور. چاوەڕێی چ ئەنجامێك ئەكەیت؟ هێشتا چاوەڕێی متمانە وەرگریتەوە تا قەڵەوتر بیت؟ یان چاوەڕێی چاكسازی و پاكسازیت لێ بكەین؟

ئەو هەموو غەدر و ناهەقییەی كە ١٠ ساڵە دەیكەیت لە كێت كردوە؟ ئەگەر ڕاستەوخۆ لە ئەندامانی ناوكۆنگرەت نەكردبێت، خۆ لە خزم و كەسوكار و هاوڕێی ئەندامانی كۆنگرەت كردووە، هێشتا ڕوی ئەوەت هەیە بڵێی غەدرم لێ كراوە؟ ئەبێ چاوەڕێ بیت ڕۆژێك لەسەر ئەو كارانەت دادگایی بكرێت، ئەوانەشی كە هاوشێوەن و لە سەركردایەتیدان لە ئێستادا، هەر دەبێت چاوەڕێی شكاندنێكی باش بكەن، و باجی كارەكانیان وەربگرن.

لە كۆتایدا ئەوەی ماوە، ئەم وشانە دەستپێكن، پێبەپێ لەگەڵ تەشویش و چەواشەكاریەكانی ئێوەدا زیاتر دەچینە ناو قوڵایی كار و كردەوە و مەبەستەكانی ئێوەوە.

copyright 2019, All Rights Reserved Developed by TeraTarget for Digital Intelligence and IT Innovations