بایکۆتی کاڵای تورکی

ئارام هادی
20.10.2019

ڕای بازرگانەکانی هەرێمی کوردستان، لەسەر بایکۆتی کاڵای تورکی، کەپێشتر ناوە ناوە قسەمان لەگەڵ کردون، دەڵێن، ئێمە ناچارین کاڵای تورکی هاوردەی هەرێم بکەین، چونکە ئیران توانای دابینکردنی پێداویستیەکانی بازاڕی نیە و هاوکات عیراقیش بەو بارودۆخە لەرزۆکەوە ناتوانێت ئەمنیەتی سنورەکانی لەگەڵ ئەردەن و سعودیە دەستەبەربکات لە گواستنەوەی کاڵا لەو وڵاتانەوە بۆ شارەکانی هەرێم، هەروەها دەڵێن حکومەتیش جدی نیە لە بەرهەم هێنانی بەرهەمی ناوخۆیی، دیارە ئەمانەش تەنها بیانویەکن، گەرنا تەنها لە بەندەری ئاویی بەصرەوە لەبری هاوردەکردنی کاڵای تورکی دەتوانرێت پێداویستی ئەو بەشە بەزیادەوە پڕبکاتەوە و چیدی پێویست بە تورکیا نەکات.

ئێستاش خۆشبەختانە، هەڵمەتی بایکۆتی کاڵای تورکی تادێت فراوان دەبێت، ئەمەش وەک هەڵوێستێکی (نەتەوەیی. نیشتمانی. مرۆیی)، پێویستە لەسەر تاک بەتاکی خەڵکی کوردستان کەهیچ کاڵایەکی تورکی نەکڕن، ئەوکات بازرگانەکانیش ناچاردەبن کاڵای تورکی هاوردەی ناو بازاڕەکانی هەرێمی کوردستان نەکەن و ئەمەش وادەکات حکومەتیش سەرجەم گرێبەستەکانی لەبواری هێنانی کاڵا لەگەڵ تورکیا هەڵوەشێنێتەوە.

کاتێک دەبینی دەوڵەتی تورکیا هێشتا هێزەکانی لە باشورن و هێرشی داگیرکاریش دەخاتە سەر ڕۆژئاوای کوردستان، هیچ زەحمەتیەک لە بایکۆتەکە نامێنێت و بە ئەرکی سەرشانتی دەزانی.
دیارە ئێمە وەک بەشێک لە چالاکوانەکان لە 2015ەوە لە (تۆڕی ناڕەزایەتیەکانی باشور) ئەو هەڵمەتەمان ڕاگەیاند، هاوکات کۆنفرانسێکیشمان لەسەر ئەنجامدا و لەڕووی میدیایشەوە بایکۆتەکەمان لەقاودا، ئەوە تائێستاش بەردەوامین و بەهۆی هێرشەکانی تورکیا بۆسەر ڕۆژئاوای کوردستان و هاتنەناوەوەی سوپاکەی و جێگیربونیان لەخاکی باشوری کوردستان، هەڵمەتی بایکۆتەکە چڕتربۆتەوە، ناکرێت و ناشێ ئێستاش بازرگانەکان هەمان بیانوی چوارساڵ پێش ئێستایان هەبێت، وەک چۆن ناکرێت بەردەوامبن لەسەر هێنانی کاڵای تورکی، گەرنا حەقە، چەند ڕێکارێک لە دژی هاوردەکردنی کاڵای تورکی بگرینه بەر.

1. هەڵمەتی بایکۆتکردنەکە فراوانتر و بەهێزتربێت، بەجۆرێک جارێکیتر سەردانی ژوورە بازرگانەکانی شارەکانی هەرێم بکرێتەوە و لەم بارەوە کۆبونەوەیان لەگەڵ سازبدرێت و فشاریان لەسەر بکرێت، کەچیدی کاڵای تورکی هاورده نەکەن.

2. هەر یەکه لای خۆیەوە بایکۆتی کاڵای تورکی بکات و چیدی کەس کاڵا تورکیەکان بەگشتی نەکڕێت.

هەرچەندە بایکۆتکردنی کاڵای وڵاتی بەرهەم هێنەر لە وڵاتی بەکاربەردا کەمێک ئاستەنگیشی دێتە پێش، بەڵام کاتێک دەبینی دەوڵەتی تورکیا هێشتا هێزەکانی لە باشورن و هێرشی داگیرکاریش دەخاتە سەر ڕۆژئاوای کوردستان، هیچ زەحمەتیەک لە بایکۆتەکە نامێنێت و بە ئەرکی سەرشانتی دەزانی.

copyright 2019, All Rights Reserved Developed by TeraTarget for Digital Intelligence and IT Innovations