گەندەڵی، خوی شیریی پیرە سیاسییەکانی عێراق

ماجد خەلیل
06.10.2019

چەند رۆژێکە شەقامەکانی بەغداد جمەیان دێ.
 جارنییە لە جوڵانەوە مەدەنییەکانی عێراقدا، خیابانەکان خەڵتانی خوێنی خەڵک نەبن. 
جارنییە جوڵانەوەکان نەبنە قوربانی قوماری قەمبورە سیاسییەکانی ناوخۆ.
 جارنییە جەوانەکانی شار، جاحێڵە خێر لەخۆنەدیوەکانی چنگپڕ لە وردەبەردی نەفرەت، نەبنە سوتووی سوپرایزی شەهوەتی مەرجەع و مەلاو موریدەکانی میزاجی خۆرئاوا. 
راستە، چەند رۆژێکە شەقامەکان، شان لەشانی شۆڕش دەدەن.
 چەند رۆژێکە دروشم و دێڕەکانی ئازادی، دنەی دنیایەکی نوێ دەدەن.
 چەند رۆژێکە لە کەڕادەو کەرخدا، لە بابولشەلجی و پردی رەسافەدا، رەنگی بەیانیان، لە بەیانیانی دارولحیکەمەو شارەکەی مەنسور دەکا.
 چەند رۆژێکە دیجلە هەستاوەتە سەرپێ، چەند رۆژێکە دیجلە، داروبەردی ئەوێ رەنگدەکات.
ئەم خۆپیشاندان و خەباتە، رەگێکی قوڵی مێژووی تێکەڵە. رەگێک لەدەرەوەی فەلسەفەی فسکی موقتەدا، لە دەرەوەی سیاسەتی هاروهاجی هادی عامریی.
 رەگی ئەم خەباتە لە دەرەوەی چەلەحانێی چەپۆکی ئیسرائیل و ئێران. لەدەرەوەی نەریتی نەشیش بسوتێ و نەکەبابی عادل مەهدی و دەیان رەوتی رقئەستوری حەشدی شەعبی. 

دروشمەکان بەدەستوخەتی عێراقییەکان نوسراون، هاوارەکان لە قورگی عێراقییەکانەوە دێنە دەرێ، لافاوی راماڵینی روخسارەکان، لەدیجلەو فوراتەوە تەقیوە

لەدەرەوەی لێوی هەزار ساڵ هەڵقرچاوی ئازادی سونەو شیعەدا.
 ئەمجارە سینەزەنییەکانی نەجەف و سەفاومەروای سیاسەتی سونەکان نەهاتووەتە حاجەت. 
ئەم جارە هیچ تۆنێکی تیرۆرو تۆقاندنی جیهادو رەوتی سەلەف و سەدام لە گۆڕێدا نییە.
 ئەوەی لە بەغدادو تەواوی پارێزگاکانی سونەو شیعە دەگوزەرێ، زمان و شێوەزاری خەڵکی عێراقە.
دروشمەکان بەدەستوخەتی عێراقییەکان نوسراون، هاوارەکان لە قورگی عێراقییەکانەوە دێنە دەرێ، لافاوی راماڵینی روخسارەکان، لەدیجلەو فوراتەوە تەقیوە.
 ئەوڕۆ عێراق، عێراقی خویخوێن و خەتا، عێراقی فیتنەو فەلسەفەی فەوزا، عێراقی مەقاشی هەزاران مەهدی و موقتەدا، عێراقی کارگەی کەلتوری سەربڕین و سێکس و ستەم، ئێراقی شانۆی شەرەقۆچی کۆیلەکانی گەعدەو بەزمی سەرمایەداری خۆرئاواو رۆژهەڵات. 
ئەوڕۆ عێراق، لەژێر باری سەروەت و سامان و نەوتی تاڵانکراویدا، لەژێر ژانی هێشتا سەندنەوەی خوێنی عوسمانیدا، لەناو قەسوەتی قەنارەی شاهو گەداکانیدا، لەناو ئازاری نەسرەوتوی شۆڕشی بیست و گەیلانی و بەرچەپی ساڵح جەبرەکاندا، لەناو ئەلبومی یادەوەری هەڵواسینی عەبدلئیلاو نوری سەعیدو مەلیکە چکۆلدا، لەناو پلانی بێکەسکوژیی قاسم و قاودانی مافەکانی کوردا،  لەناو کەپتی کەلتوری ئازادی ساڵەهای ئەدەبیاتی هێشتا زیندوی حزبی بەعسدا، لەناو مۆتەکەو خەلافەتی وەک قارچک هەڵتۆقیوی بەغدادییەکەی داعشدا، هێشتا دەناڵێنێ.
 هێشتا  عێراق عاری عەیبەکانی مافی مرۆڤە، هێشتا عێراق عەشقی سەربڕین و مەیدانی سینەزەنی ملیۆنان مرۆڤی دوهەزارو نۆزدەیە، هێشتا عێراق زیباترین زەوقی هونەرمەندانە لەلایان، رەقسی شمشێرەکانی جیهادە.  
ئەمڕۆ عێراق، وڵاتی ئەفەندییەکانی سەدەی بیستەم، وڵاتی وێستگەی شارستانییەت و شانازی، وڵاتی سەدەی زێڕینی رۆژهەڵات، وڵاتی حیکایەتی حامورابی و هەزاران رێسای رووبەڕووبونەوەی گەندەڵیی، وا بووەتە دەستکەلای سیاسییەکانی چون سیستانی و مالیکی و عەلاوی و عەمارەکانی خێڵی حەکیم.  
بەڵام پێناچێ ئیدی هەم بۆ عێراق و هەم بۆ هەر سیستەمێکی سیاسی ئەم رۆژهەڵاتە، ئەو سیستمانەی حەتمییەتی بوونیان لە سێبەری خواو کونفەیەکونی ئیعازی خۆرئاواوە وەرگرتبوو، پێناچێ بەملەونە ڵێڵەی رابردوو بۆیان بچێتە سەر، پێناچێ زەبری زلەی تۆڕە کۆمەڵایەتییەکان، کەلتوری کلاسیکیانەی سیاسەتیان کاس نەکات.
پێناچێ رەوەندی ملیۆنان پەنابەرو ئاوارەی هەندەرانیان ئاوڕێ لە مەرارەتی وڵاتیان نەداتەوە.
 پێناچێ ئەم دەیجوری گەندەڵییەی عێراق نەبڕێتەوەو ئەم خووە شیرییەی شەڕو کوشتن و دزی و گەندەڵی تەرک نەکرێ.
 ئەوەتانێ سودان، تونس، میسر، جەزائیر، واخەریکە سوریاو ئێران و تەواوی جیهانی ئیسلامی، بەکاوەخۆ، کاژی مێژوو فڕێ دەدەن. ئەوەتانێ کاژی هەزار ساڵەی سیاسەتی کۆنخوازی کاڵدەکەنەوە، ئەوەتانێ بۆ هەوەڵجار دروشمی ئایدیۆلۆژیا، هاوارو تەکبیری بێجا، خۆڵکردنە چاوی ناسیۆنالیزم و خۆکردن بە خوا کۆتایی دێ.
 ئەمڕۆ ژیان، تەنهاشتێ دەیخاتە سەرپێیانی خۆی، عێراقی هەزاران ساڵ، تەنها شتێ لە گڕوگاڵی گەندەڵیدا، گرەوی لێدەباتەوە، شتێک چوون ئەودروشمانەی دلاوەرانی شەقامەکانی بەغداد دەیڵێنەوە. 
بۆخۆم گوێیانلێدەگرم، مەوتینییە راستەقینەکەی (ئیبراهیم تۆقان)، لە تەوێڵی ئەوان نوسراوە، ئاوازەکەی (موحەمەد فلیفل) رێک بەباڵای ئەو  لاوە تەراکسود لەپێ و شەحاتە تۆزاویانەوە دوراوە.

ئیتر کاتی ئەوە هاتووە، عێراق هەستێتەوە، ئیدی  کاتی ئەوە هاتووە عێراق هۆزە پێپەتییەکانی عروبەی ئال سەباح و ئال سعودو ئال هاشم و ئال زیاد و تەڵاڵ تێهەڵدا


 ئەمانە، لەوڕۆژدا، پەرلەمان و حکومەتیان خستە سەرخەت، ئێرانیان مۆنکردو ئەمەریکایان تاودا. 
گەر وابڕوا، دەبنە مێژوو، دەبنە تابلۆی جوامێریی و دەبنە نەخشی سەربەردی دیرۆکی ئەوێ.
 گەر وابروا، بەغداد دەبێتەوە بە ناوەندی گۆڕانکاریی رۆژهەڵات، هاوکێشەکان دەگۆڕێن.
 ئیتر کاتی ئەوە هاتووە، عێراق هەستێتەوە، ئیدی  کاتی ئەوە هاتووە عێراق هۆزە پێپەتییەکانی عروبەی ئال سەباح و ئال سعودو ئال هاشم و ئال زیاد و تەڵاڵ تێهەڵدا.
 پێویستە عێراق، وەک چۆن تونسی و مەغریبی و جەزائیرییەکان، کەڵکیان لە هزری ئازادیخوزیی ئەمازیغ و بەڕبەڕ وەرگرت، وەکچۆن لە لوبناندا کریستان و دروز و بارونی،  وەک چۆن لەسوداندا باشورو دارفور، وەختە ببنە سیمبوڵی رۆحێکی مرۆڤانە، بەو جۆرەیش عێراق، پێویستە، ئاوڕێک لە مێژوی مەنازیرەو مەنتیقی کوردەواریی بداتەوە، تەنها بەم شێوە، شەوگاریی دەیجوری گەندەڵی کۆتایی پێدەهێنێ.

copyright 2019, All Rights Reserved Developed by TeraTarget for Digital Intelligence and IT Innovations