حەشدی سووتاو

عەتا کەریم
30.08.2019

سوپا، لە عێراقی نوێدا، سوپایەكی بێهێز و دابەشبووی ناو گێژاوی ئەتنی و مەزهەبی، بێمتمانەیی تەواودایە، بێشكۆی ترساوی ناڕێكخراو، پەرتبووی دەستی هێزە سیاسییە فرە ناكۆكەكانی عێراقە، بۆیە ئێستا ئەم هێزە بەربووه‌تە وێزەی خۆی، هێندەی لە كۆنتڕۆڵی هێزی مەزهەبیدایە، بۆیە لە غیابیدا هێزگەلی وەك حەشدی شەعبی سەریان هەڵداوە.

سەرباریش ئەم دەوڵەتە، خاوەنی وەزارەتەكانی بەرگری، ناوخۆ و دامەزراوەی ئەمنی و هەواڵگرییە، بەڵام جبەخانەی هێزەكانی حەشدی شەعبی بە بۆردوومان دەسووتێنرێن، هێشتا سەرچاوەكەی نادیار و شاراوەن، ناتوانرێت هۆكارەكان لانیكەم لەسەر ئاستەكان یەكلا بكاتەوە كە ئایا ناوخۆیین، یان دەرەكین.
لەسەر ئاستی شیمانەی دەرەكی، پەنجەی تۆمەت بۆ دەوڵەتی ئیسڕائیل ڕادەكێشترێت و لایەنی تۆمەتباریش ڕەتی ناكاتەوە و نایەتە سەر خەتی ئاشكرا، هەرچەند نەتانیاهۆ حەشدی شەعبیی عێراق بە ئێرانەوە‌ گرێ دەدات و لە ناوەڕاستی ئەم مانگە و لە گەرمەی سووتانی جبەخانە سەربازییەكاندا لە ئۆكرانیا بوو، وڵاتەكەیشی بە هێرشەكان تۆمەتبار دەكرا، بەڵام ئەو بە ئاپۆرەی ڕۆژنامەنووسانی وت: ״ئێران لە هیچ جێیەك پارێزبەندیی نییە‌، لە هەر كات ‌و شوێنێكدا پێویست بكات هەنگاوی سەربازی دەنێین״ تۆمەتباری دووەمی دەرەكی ئەمه‌ریكا بوو، كە هەندێك لایەنی مەزهەبی پەنجەیان بۆ ڕاكێشا، بەڵام هەر زوو كاربەدەستانی كۆشكی سپی و نزیكەكانی سەرۆك ترامپ ڕەتیان كردەوە.

هۆكاری سەرەكیی تۆمەتباركردنەكەی ئیسڕائیلیش پەیوەستە بەو میراتە خراپەی پەیوەندیی نێوان بەغدا و تەلئەبیب كە سەرەتاكەی لە 1948ـەوەیە كە عێراق دانی بە دەوڵەتی ئیسڕائیلدا نەناوە و ئەم پەیوەندییە خراپەش دەستاودەستی كردووە لە عێراقی نوێشدا وەك خۆیەتی و دەست بەو میراتە خراپەوە گیراوە! هەرچەند ئاماژەكان بۆ ئەوەن لەو 4 جبەخانە سووتاوەی حەشد یەكێكیان بە بۆردوومانی فڕۆكەی بێ فرۆكەوان بووە و بە دەستی تەلئەبیب ناو دەبرێت!، لەگەڵیشیدا نزیكی و سپۆنسەری تاران بۆ حەشد، دەشێت پاڵنەری گورزەكەی تەلئەبیب بن! كە پێشوەخت بە سووتاندنی حەشد، فووی كوژاندنەوە لە ئاگرگرتنی خۆی دەكات.

بۆیە بەشێكی گومانەكان بۆ ئەوەیە كە لێدانی ناوەكیی هێزە سیاسییەكانە بۆ لاوازكردنی هێزی سەربازیی حەشدی شەعبی تاوەكو هەیمەنه‌ی سەربازی بهێننە خوارەوە و تا هەژموونی سیاسیی و حکومڕانیشی دابەزێت، چونكە سەرچاوەی هێزەكەی لە حەشدەوە سەرچاوە دەگرێت

لەسەر ئاستی شیمانەی ناوخۆیی، گومان و تۆمەتەكان زۆر زیادترن، چونكە پێكهاتەی سیاسی، مەزهەبی، سەربازی و تەواوی جومگەكانی عێراق، لەسەر هێڵی گەرمی ناكۆكی و بەریەككەوتنی بەردەوامدان، توانای سووتانی هەیە!، بۆیە بەشێكی گومانەكان بۆ ئەوەیە كە لێدانی ناوەكیی هێزە سیاسییەكانە بۆ لاوازكردنی هێزی سەربازیی حەشدی شەعبی تاوەكو هەیمەنه‌ی سەربازی بهێننە خوارەوە و تا هەژموونی سیاسیی و حکومڕانیشی دابەزێت، چونكە سەرچاوەی هێزەكەی لە حەشدەوە سەرچاوە دەگرێت.
گومانی دیكەیش، دیسانەوە پەیوەستە بەو گەندەڵی و بەهەدەردانی بودجە قەبەیه‌وە هەیە لە بواری چەك و تەقەمەنیدا، بۆ شاردنەوەی پەنا براوەتە بەر سووتاندنی بە ئەنقەستی جبەخانەكان، كە ئەم حاڵەتە چەند بارەیە و لە هەرێمی كوردستانیش لە ساڵانی ڕابردوودا لە هەولێر و سلێمانیش هەبوون، كە نزیكترینیان سووتانی جبەخانەیەك بوو لە 27ی مانگی ڕابردوو كە ڕۆژێك دوای هێرشەكەی سەر كافتیریای هۆقەباز بوو لە هەولێر.
گریمانەیەكی دیكەیش كە ئەمه‌ریكایشی خستووه‌تە سەر خەتی گومانەكە كە ״داعش״ لە پشتی سووتاندنی جبەخانەكانی حەشدەوە بن، دواجاریش كە ئەبوبەكر بەغدادی خۆی دەرخستەوە، ئاماژەی بە پەلامار و خۆڕێكخستنەوەی شانەی نووستوو و پەڕاگەندەكان داوە، كە شێوازی هێرش و پەلامارەكانیشی گۆڕیوە و كار لەسەر دنەدانی ناكۆكییەكان لە عێراق دەكات! گریمانەیەكی دیكەیش بەرزبوونەوەی پلەكانی گەرمایە، كە لە مانگی ئابدا لە هەندێك ناوچەی عێراق گەیشتووه‌تە سەروو پەنجا پلە، كە ئەوەش یارمەتیدەرە بۆ نەگونجاویی عەمباری چەكەكانی حەشد لە عێراق.

هەموو تینی سێ سەرۆكایەتییەكەش هەر ئەوەندە بوو كە ״چیتر قبووڵی ناكەن بەبێ ڕەزامەندییان سنووریان ببەزێندرێت״، ئەوەیش وەك كاردانەوەیەكی بە پەلە بۆ ئەو گوزارشتە لە كۆتایی ئەم مانگەدا كۆبوونەوە


لە دیوی هەر شیمانەیەكەوە سەیری سووتانی عەمبارەكانی چەك بكرێت، تێڕوانینەكان بۆ ئەو ئەنجامە كێشت دەكات كە عێراق، لە ڕووی سەروەری، حکومڕانی، دامەزراوەی سەربازی و ئەمنییەوە لاوازە و ئاسایشه‌ نیشتیمانییەكەی لە ئاستی ناوخۆ و دەرەوە لاواز و پێكراوە. هەروەها سووتانی جبەخانەكانی حەشدی شەعبی، سووتانی كارتی فشارە سیاسییەكەیەتی كە دەیتوانی هێز بە پاڵپشتەكانی بدات، بۆیە ئێستا ئەم هێزە پاڵپشتیی مەزهەبی ماوە، بەڵام هێزە سەربازی و سیاسییەكەی دەسووتێت.
هەموو تینی سێ سەرۆكایەتییەكەش هەر ئەوەندە بوو كە ״چیتر قبووڵی ناكەن بەبێ ڕەزامەندییان سنووریان ببەزێندرێت״، ئەوەیش وەك كاردانەوەیەكی بە پەلە بۆ ئەو گوزارشتە لە كۆتایی ئەم مانگەدا كۆبوونەوە.

copyright 2019, All Rights Reserved Developed by TeraTarget for Digital Intelligence and IT Innovations