زوبێر و پەیامی پارتی و هەڵوێستی میدیاكاران

هاوژین غەریب
12.08.2019

پارتی لە ماوەی رابردوو گوشارێكی زۆری خستە سەر عەشیرەتی برادۆستیەكان و لە رووداوی هۆقەبازدا چەند كەسایەتیەكی دیاری ئەو عەشیرەتەی دەستگیر كرد ئەوە جگە لەوەی كە لێرە و لەوی چەندین خەڵكی سەر بەو عەشیرەتە رووبەڕوی گوشاری هێزە ئەمنیەكان بوونەوە، ئەوەی بۆمن زۆر جێگای نیگەرانیە دەستگیركردن و بێسەروشوێن كردنی میدیاكارێك بوو كە لەو عەشیرەتەیە.

زوبێر برادۆستی، میدیاكارێكی نزیك لە پەكەكەیە ئەو ئەگەرچی لە ماوەی رابردوودا وەك ئەركی سەرشانی روماڵی شەڕ و ئاڵۆزیەكانی ناوچەكەی كردووە، ئەگەر بەهۆی ئەو هاوپەیمانێتیە رانەگەیەندراوەی نیوان پارتی و توركیاشەوە بێت ئەو میدیاكارە خاتری پارتی نەگرتبێت ئەوە بووەتە هۆی ئەوەی پارتی دەستی لێ نەپارێزێت و بێسەر و شوێنی بكات، ئەو لە 21ی تەمووزەوە لەلایەن هێزێكی پێشمەرگەی سەر بەپارتیەوە بانگهێشتكراوە و لەو كاتەوە بێسەرو شوێن كراوە.

زوبێر لە ناو عەشیرەتی برادۆستیەكانەوە دەستگیر دەكرێت و بەبێ رونكردنەوەی هۆكاری دەستگیركردنەكەی ماوەی نزیكەی یەك مانگە بێسەروشوێنە، پارتی لە رابردووشدا لە ژێر فەرمانرشەوایەتی ئەو لە دهۆكدا وەدات حسێن تیرۆر كرا و تا ئێٍستاش بكوژەكەی نەك دەستگیر نەكراوە بەڵكو كەس تۆمەتبار نیە، ئەمەش بەبیرمان دەهینێتەوە كە دەڵێن لە هەرشوێنێك بكوژ نەدۆزرایەوە ئەوە دەسەڵات خۆی بكوژەكەیە.

لە راستیدا زوبێر برادۆستی ژیانی ئەگەر لەدەست نەدابێت ئێٍستا لە مەترسیدایە، لە هەر كات و ساتێكدا ئەگەری ئەوەی هەیە ژیان لەدەست بدات، لەبەر ئەوەی لە سنوری ئیدارەی زەرد، بە درێژایی مێژووی فەرمانڕەوایەتی كوردی بێسەروشوێن كردن زۆر بووە، ئیتر كێ لێی بەرپرسە بێگومان پارتی وەك فەرمانڕەوای یەكەمی ئەو ناوچانە بەرپرسیارێتی یاسایی و ئەخلاقی و كۆمەڵایەتی و عەشیرەتیشی دەكەوێتە سەرشان، پارتی تا ئێٍستا بەرپرسیارێتی خۆی لە دەستگیركردنی زوبێر بە شێوەیەكی فەرمی رانەگەیاندووە، ئەمەش هۆكارَێكە بۆ ئەوەی بڵێین ژیانی ئەو كوڕە میدیاكارە ئەگەرچی بەهۆكارێكی سیاسی دەستگیر كرابێت یان میدیایی لە مەترسیدایە و لە هەر سات و كاتێكدا ئەگەری تیاچونی هەیە.

لەم هەرێمی كوردستانە حزب هەموو شتێكی ناشیرین كردووە، لەبەر ئەوەی زوبێر میدیاكارێكی نزیك لە لایەنێكی سیاسیە ئیتر بۆ میدیا و میدیاكاران نەهاتووە لە دەرەوەی ئەو حزبە قسەی لەسەر بكەن، خۆیان بێ بەری دەكەن و بە ئەركی خۆاینی نازانن بیریان چووە وەك هاوپیشە پێویستی بە پشتیوانی و هەوڵی رزگاریە، ئیتر لەم هەرێمی كوردستانەشدا تەنها دوو سەنتەر و رێكخراو هەیە بۆ پشتیوانی لە رۆژنامەنوسان، یەكیان سەندیكایە كە تا ئێٍستا بە وشەیەكیش بەرچاوم نەكەوتووە بەشێوەیەكی فەرمی پشتیوانی لەو رۆژنامەنوسە كردبێت و داوای دیاریكردنی چارەنوسی بكات، شوێنێكیتر سەنتەری میترۆیە كە تەنها لەچوارچێوەی تیۆری و كاغەزدا دەتوانێت پشتیوانی بكات و كردویەتی.

حزبی سیاسیش بەهۆی ئەوەی بە میدیاكاری دەزانێت و نایەوێت دۆسیەی میدیاكارەكانی بكاتە دۆسیەی سیاسی خۆی لێبەری دەكات و هیچی لەسەر ناڵێت بۆیە رۆژنامەوان و میدیاكار لەو بەینەدا دەبێتە قوربانی، ئەمە بۆ هەموو لایەنەكانیش دروستە ئیتر میدیاكاری نزیك لە هەر حزبێكە نۆرماڵە هەمان دۆخ رووبەڕوی ببێتەوە، میدیاكارێكی روداو لە رۆژئاوا دیار نامێنێت بۆ میدیاكانی پەكەكە نەهاتووە هیچی لەسەر بڵێن لەبەر ئەوەی لایەنی سیاسی ئەو میدیایە پارتیە پێچەوانەكەشی بۆ هەموو حزبەكانیتر راستە.

ئەگەرچی دەستگیر كردنی زوبێر زۆرتر دەستگیركردنێكی سیاسی و عەشایەریە هەم پەیامە بۆ عەشیرەتی برادۆستیەكان كە ناهێڵین لەژێر فەرمانڕەوایەتی بارزانیەكاندا وەك عەشیرەت بیرلەوە بكەنەوە ناڕەزایەتی دەرببڕن، هەم پەیامە بۆ هەموو ئەو كەسانەی نزیكن لە پەكەكە و پەیوەندێكی دۆستانەیان هەیە لەگەڵیدا، پارتی بەو دەستگیر كردنەی دەیەوێت بڵێت سنوری فەرمانڕەوایەتی پارتی وەك حزب ئارام نابێت بۆ ئەوەی دژی بەرژەوەندیەكانیان بجوڵێنەوە بۆیە دێن لە نێوان گەنجەكاندا گەنجێكی دیار كە دەرفەت هەیە بۆ ئەوەی قسەی لەسەر بكرێت لەلایەن میدیاوە كە میدیاكارە دەستگیر دەكەن، بەمەش دەیانەوێت ئەو پەیامە بدەن كە ئێمە وەك پارتی دەتوانین میدیاكاران دەستگیر بكەین بۆیە زۆر ئاسانترە ئەگەر كەسێكی ئاسایی دەستگیر بكەین.

زیاتری نوسەر

copyright 2019, All Rights Reserved Developed by TeraTarget for Digital Intelligence and IT Innovations