کوردستان بەرەو فاشیزم!

ئەحمەد رەفیق
19.06.2019

(بەشی دووەم)
چیرۆکی (حزبی پێشڕەو/حزبی قائید) لە هەرێمی کوردستانیی عیراقدا لێرەوە دەست پێدەکات؛ لە ماوەی سی ساڵی رابردو، پارتیی وەک حزبێکی سیاسیی چەکداری لە کوردستانیی عیراقدا، لە زیهن و خەیاڵدانی خەڵکی کوردستان بە گشتیی و کادیر و ئەندامەکانیی بە تایبەتیی وای تێگەیاندون؛ گوایە وەک رێکخراوێکی سیاسیی کوردستانیی، تاقە حزبی پێشڕەوە لە ساحەکەدا و، هیچ هاوتایەکی نییە، بەڵکو ئەو رکابەرییەی کە هەشە باردۆخێکی کاتییە و، بە مردنی خوالێخۆشبوان؛ [مام جەلال و کاک نەوشیروان] کۆتاییان پێدێت!؟.. واتا؛ رەگ و ریشەی ئەم بیروباوەڕە دەگەڕێتەوە بۆ سێ دەیە پێش ئێسا و، تیایدا ئەو بڕوایەیان لە لای خۆیا دروست کردوە کە حزبی سەردەست، بێ رکابەر، تاق و تەنیان و، هیچ هێزێکی سیاسێ دیکە بە هاوشان و رکابەری خۆیان نازانن لە دوای نەمانیی ئەو دوو سەرکردەیە.
ئەڵبەتە بە سەرنجدان لە ئەزمونی سیاسیی هەرێمی کوردستان، بۆت رون دەبێتەوە چۆن و بە چی شێوازێک وردە وردە سیستمی سیاسی و دیمۆکراسی هەرێمی کوردستان بەرەو (حزبی پێشڕەو/حزبی قائید/فاشیزم) هەنگاو دەنێ
ئەم بیرکردنەوەیە، هەمان بیرکردنەوەی سەرکردەی روحی نازییەکان (هیتلەر)مان بیردەخاتەوە کە پێی وابو؛ ئەو حزبانەی لە ئەڵمانیای "نازی"دا بونیان هەیە جگە لە نانخۆر و جێگر، شتێکی دیکەیان لە باردا نییە تاکو بە گەلی ئەڵمانیای ببەخشن! بۆیە هیتلەر وای دەبینی؛ رۆڵی ئەو حزب و رێکخراوانە سنوردار بکرێ، یاخود هەر نەمێنن و ساحەکە بۆ حزبەکەی ئەو جێبێڵن! مێژو دەریخست لە ئاکامدا هیتلەر سواری سەری حزبەکەی بو، حزبەکەشی (نازی) سواری سەری گەلی ئەڵمان بو، ئەڵمانیاش بەو دەردە چو!

ئەڵبەتە بە سەرنجدان لە ئەزمونی سیاسیی هەرێمی کوردستان، بۆت رون دەبێتەوە چۆن و بە چی شێوازێک وردە وردە سیستمی سیاسی و دیمۆکراسی هەرێمی کوردستان بەرەو (حزبی پێشڕەو/حزبی قائید/فاشیزم) هەنگاو دەنێ..! ئەوەی جێگەی سەرسوڕمانە ئەوەیە؛ لە بەرامبەردا هیچ هێز و کەس و گروپ و رێکخراوێکی سیاسی و مەدەنی و ناوەندێکی مەعریفی نابینیی رێگریی لەم ویستە شەڕانگێزییە بکا یان لانیکەم نەهێڵێ پڕۆژەیەکی ئاوا مەترسیدار بگات بە ئاکام!.ئەی چی بکرێ بۆ ئەوەی رێگری لە پڕۆژەیەکی وەها مەترسیدار بکرێ؟ چۆن روبەروی ئەم ویستە شەڕانگێزییە ببنەوە؟ کێن ئەوانەی دەتوانن ئەو کارە بکەن؟ لە بەشی سێیەمدا و بە وردیی وەڵامی ئەم پرسیارانە و، ئەگەر و پێشهاتەکانی بەردەم ئەو پڕۆژەیە دەدەینەوە.

ماوێتیی..

copyright 2019, All Rights Reserved Developed by TeraTarget for Digital Intelligence and IT Innovations