ئیخوانەكان لە سەنای سیاسەتی نێچیرەڤاندا

ماجد خەلیل
22.05.2019

با مەولود باوەموراد تەنها دوو دێڕی كۆتایی ئەم بابەتە بخوێنێتەوە

ئایا نێچیرەڤان كەسێكی بە ئەزموونە؟ 

ئایا نێجیرەڤان بارزانی هەناسەیەكی ئەدەبی پێیە؟ ئایا نێجیرەڤان بەزمانی حزبایەتی نادوێ؟ ئایا گوێگرێكی بەتاقەو توانایە؟ ئایا لەمپەرەكان دەبڕێ؟ ئایا كارەكان جێبەجێ دەكات؟ وەڵامی  هەموو ئەم پرسیارانە لەزاری مەولود باوەمورادەوە دەرچوون؟ بێ ئەوەی كەس لێی بپرسێ

لەیەكێك لە پانێڵەكانی سەرۆكی هەرێمی كوردستان، چوار ساڵی ئایندە. بەشداریكرد. بەشداریكردو ئەم وەڵامی پرسیارانەی دایەوە.

مەولود باوەموراد. ئەندامی مەكتەبی سیاسی یەكگرتووی ئیسلامی كوردستان، پیاوێكی سەر سافی ڕیش تاشراو، تەمەن وەستاوی مەیلەو ئەسمەر، دەنگ نیمچەگیراوێكی جموجوڵكەر. زیندووی زەمینەی ئیخوایزم وكادێرێكی دێرینی یەكگرتوو. پیاوێكی زاڵی سەرشاشەكان و گیرفان پڕ لە پۆست پێناوە حكومی و حزبییەكان، هەر لە پەرلەمانەوە تاوەزارەت. پیاوێك چالاكترینی چوارچێوەیەكی حزبی سنووردار، پیاوێك بەلیغ و باش لە ئەدای ئۆپۆزسیۆنی ناو تۆڕی كۆمەڵایەتی و ئۆپۆسیۆنی ئیمان و باوەڕی هەمو پارت و پەیڕەوەكانی تر. ئێستە یەكێك لە سەرارەكانی پارتێكی ئۆپۆزسیۆنە لە هەرێمدا، باسی سەرۆكی هەرێمی چوار ساڵی ئایندە دەكات. سەرۆكێك كە لە دوستبوونی دەیان ساڵی ئەم ئەزموونەوە لە پلەی یەكەمدا بووە. گریمان خوێنكارێ تاقیدەكەینەوە. پێی دەڵێین ئەم بۆشاییە پڕبكەرەوەو بنوسە كێیە. سەركردەیەكە ئەزموونی هەیە، تاڵ و ترشی و ئاوارەیی و ناسۆری دیوە. دیپلۆماسە، گوێكرە، ڕاشكاوە، بوێرە، بەئیرادەیە، دەیان وەسفی تر كە مەولود ریزیكردن. دەبێ خوێنكارەكە كێ بنوسێ بۆ ئەوەی وەڵامەكەی راستبێ.

گەر بنوسێ بسمارك. هێشتا دەكەوێ. چون وەزیری فەرهەنگی سەردەمی بسمارك لە بارەی بسماركەوە وتی، سەركەوتوو نیە، چون لە شەقامەكانی بەرلیندا خەڵكی پێناكەنن. بسماركێ ئەڵمانیای یەكخست. بسماركێ سیاسەتی ئەڵمانیای كرد بە هەوەڵ، بسماركێ ئابوری ئەڵمانیای كرد بە سیحری گەشەسەندن، بسماركێ دەستوری وڵاتی چاند و لەناوەڕاستی ئەوروپادا مافی مرۆڤ بووە درەختێ سێبەری دنیای داپۆشی. گەر خوێنكارەكە بنوسێ، گاری باڵدی  و ماتزینی ئیتاڵیا بوو، مامۆستا بەرد بارانی دەكا. راستە ئەوان ئیتاڵیایان كرد بەشاخ، كردیان بە پەیداخی جوانی و یەكگرتن. كردیان بە ئیستیعمارێكی زەبەلاح، نا چون ناسیۆنالیستەكان كە لە كوتایی سەدەی نۆزدەدا خۆپیشاندانیان دەكرد دەیانوت ئەوان بە نەفرەت بن، چون نەیانتوانی ئیتاڵیا بكەنەوە بە ڕۆمای پیرۆزی پێش زایین. گەر خوێنكارەكە بنوسێ میتەرنیخ، هێشتا دەكەوێ، چون وەختێ شۆڕشی نەمساوییەكان روویدا وێنەی وییان بەخەیاڵ كێشابوو، چۆن نەمسای غەرقی قوڕاوی ئایین كردووە. لەكاتێكدا میتەرنیخی نەمسا، مێژوو دیپلۆماتێكی تری وا بەخۆوە نابینێ. من خوێنكاربم نازانم چ سەركردەیەكی سەركەوتوو بنوسم، گریمان دامەزرێنەری ئیسرائیل دەنوسم. باوەركەن دەكەوم، چون ئیسرائیلی كرد بەدەوڵەت، جولەكەیەك وەسفی نەكرد، دەیانوت دەبوو لە نیلەوە بۆ فورات بێ. دەزانن یەك كەس لەو وەزیرانەی كابینەكەی چەرچڵ كە یاداشتیان نوسیوە دانی خێریان بە چەرچڵدا نەنا.

لە كاتێكدا بەریتانیای لە جەنگی دووەمدا سەربەرزانە پاراست. لە كۆنگرەی یاڵتادا چەرچڵ وتی هێشتا شەرمەزاری هاوڵاتیانم. دەزانن ئەو وەسفانەی مەولود لە سەنای نێچیردا كردنی تا ئێستا كەس وا وەسفی سەركردەكەی خۆی نەكردووە. كەس لە دونیای ئەمڕۆدا، مەبەستم ئەمانوڵای زووی ئەڤغانو نەواز شەریفی پاكستان و سەدام وبنعەلی نییە. ئەوانیش وایان پێدەوترا. بەڵام ئەوەی دەیانوت لە زاری ئۆپۆزسیۆنەكانیانەوە نەدەهاتە دەر. تایبەتمەندی ماڵباتی بارزانی و نێچیر لەوەدایە كە لە هیچ سەركردەیەكی دیكتاتۆرو دیموكراتدا نییە. ئەویش ئەوەیە دەسەڵات و ئۆپۆزسیۆن وەسفیان دەكەن. باوەڕتان هەبێ. زۆر باسی شاعیرە دەربارەكانی بووەیهییە دەیلەمییەكانی  عەباسی دەكەن كە بەغدایان گرد. شاعیرێك لە وەسفی عەزدودەولەدا دەڵێ، هیچ، وەسفت ناكەم، وەسفی تۆ زمان ناتوانێ بیڵێ. گەر وەسفم كردی بمكوژە. گەر زمانم گۆی كرد بۆ ناوهێنانت بیبڕە. رێك بە خەیاڵ چوومەوە بۆ سەدان ساڵ بەر لە ئێستا. مەولودم بینی، لە ئاستانەی خەلیفەی بوەیهیدا شیعری دەخوێندەوە. لۆگۆكەی رووداو بیری دەخستمەوە كە ئەوە هەولێرەو ئەوە ئێستایە.

ئاخر باوە موراد. نێچیر چی كرد. راستە هەوڵی دا، راستە بارودۆخ نا هەموار بوو، راستە نەیارمان زۆرن. بەڵام ئەم پیاوە، جارێ لەبەر ئەوەی كوڕی كاك ئیدریسە لەو ڕۆژەوەی چاوی كردووەتەوە بەرپرسە. زاڕۆكانیشی بە هەمان شێوە. هەموو ئەوروپاو ئەمریكا گەڕاوە. لەو هەولێرا دام بە كن دیوارێكی سیاجا بە نیوكاتژمێر ماشین نەمبڕی، وتیان خانوی ئەوە. نە ئابوری سەربەخویە.نە ئیعترافمان پێكراوە. نە موچە جێگیرە، نە شەقام و رێگاوبان تەندروستە، نە خۆراكو دەرمانمان ئەسڵن، نە هیچ. چۆنە دەڵێی واو وایە. تكایە ئەم بابەتە مەخوێنەوە كاك مەولود، تەنها دوڕیزی كۆتایی بخوێنەوە. ئەویش پێشنیار دەكەم، دیدارەكەت رووداو لە یوتوب دایناوە. بە ویژدانەوە گوێ بگرەوە بۆ خۆت. تكایە با دەسڕێكت پێ بێ، گەر دەسڕەكەی دەست تەڕ نەبو لە ئارەقەی شەرمەزارییا، تكایە رۆژووەكەت بشكێنە، چوون وەك چۆن بە ناهەق وەسفی نێچیرت كرد، بەو جۆرەیش بە نا هەق وەسفی خوا دەكەی. لێرە چاوەڕێی بەهەشتی وەزارەت و پۆستیت و لەوێیش چاوەڕێی نازونوكی حۆریت

copyright 2019, All Rights Reserved Developed by TeraTarget for Digital Intelligence and IT Innovations