(٢٣)ساڵ پێش ئێستا ھەیکەل چی بە مامجەلال گوت؟

عیماد ئەحمەد
14.11.2020

لە میسر دڵە زیندوه‌کەی عه‌رەب،  سەرچاوەكان  دوپاتی دەكەنەوە ژمارەیەك لە ناودارەكانی سیاسی وئەدەبی و هونەری ئەم وڵاتە، بە رچەڵەك كوردن ، ره‌نگه‌ هه‌ر به‌م هۆیه‌شه‌وه‌ بێت پەیوەندی نێوان بزوتنەوەی رزگاری خوازی کوردستان و میسر، بەهێز بووە تا ئەو رادەیەی کە یەکەم رۆژنامەی کوردی (کوردستان) لە میسر چاپ و بڵاوكراوەتەوە و یەکەم رادیۆی کوردی لەوێ په‌خش کرا و یەکەم دەسەڵاتی باڵای دەوڵەت ھەرلەوێ پێشوازی لە سەرکردایەتی سیاسی کوردستان کردووە.


  لە ئایاری ساڵی (١٩٩٧)لە سەر بانگهێشتی حکومەتی میسر، وەفدێکی باڵای یەکێتی، بە سەرۆکایەتی هەڤاڵ مام جەلال و بەئەندامێتی ھەریەک لە(دکتور فواد معصوم. عدنان موفتی. مصطفی سید قادر و بەندە)سەردانی قاهیرەی کرد، سه‌ردانه‌که‌ چەند رۆژێکی خایاند، بێجگە لە کۆبونەوە فەڕمی  و باڵاکان، بە حوکمی قورسایی مەسەلەی کوردستان و ناو و ناوبانکی هەڤال مامجەلال، زۆر لە دەزگاکانی دەوڵەت و کەسایەتیە ناودارەکانی ئەو وڵاتە وەفدەکەیان بینی، لە وانە، شێخی ئەزهەر  و محمد حسنین هەیكەل و ئەحمد حمروش و نبیل زکی و دکتۆر رفعت سعید و زکریا محیدین و چه‌ند که‌سایه‌تیه‌کی تریش وەکو ئەحمەد حەبوبی و بابەکر پشدەری کە ئەوکات سەرۆكی رێكخراوی كاری عەرەبی بوو سەردانی مامجەلال و وەفدەکەی كرد. هەر لەو سەردانەدا، بریاری كردنەوەی مەكتەبی پەیوەندیه‌كانی یەكێتی لە قاهیرە درا و كاك عدنان موفتی دەستنیشانكرا و بوو بە یەكەم نوێنه‌ری باڵای یەكێتی لە  قاهیرە،  كە بە حەق، خەیر الاختیار بوو، دواتریش جێدەستی دیاربوو لەماوەی نوێنەرایەتیدا لەئەوێ.

هەیكەل، نیوەرۆخوانێکی بۆ مام و وەفدەكە سازکرد لە ماڵی خویان لە دەرەوەی قاهیرە، باخ و ماڵەکەی زۆر جوان دانسقە بوو، خۆشیی زۆر بە ئەتەکێت و بەبایەخ و میواندۆست بوو، بە قسە و باس وشیکردەوەکانی مامجەلال دانیشتنەکە زۆر گەرموگوڕ بوو، میوانداریه‌کەش‌ شاهانە بوو،  چەند سەعاتێکی خایاند، مام زیاتر قسەی ئەکرد ئەویش تێبینیه‌کانی خوی ئەنووسی ، دواجار مام وتی: پێمان خۆشە ئێمه‌ش گوێ لە ئامۆژگاریەکانی تۆ بگرین ، هه‌یکەل
لە وڵامدا وتی : ئەستەغفوروڵا خۆت سەیدولعارفینیت،  بەڵام ئەتوانم چەند تێبینییەک بخەمەروو:-

١-پەیوەندی بزوتنەوەی سیاسی کوردستان لە گەڵ بزوتنەوەی سیاسی عەرەبی باشە و جەنابتان رۆڵی باشتان لەم مەسەلەیە بینیوە، پێویستە بەردەوام گەشە و پەرەیپێبدەن.


٢-پەیوەندیتان لە گەڵ ئێران جائز و پەسندە، به‌هۆی سنوری هاوبەشی دورو درێژی نێوانتان، بەڵام ئەبێت 


تورکیا لە یاد نەکەن، پێویستان بە تورکیا ئەبێت بۆ مسۆگرکردنی پشتیوانی ئه‌وروپا، چونکە تورکیا لە لێواری ئه‌وروپایە و هەوڵئەدا بچێتە ناو یەکێتی ئه‌وروپاوە(ئەمە بۆ تورکیای ئەوکاتەبوو).


٣-لەم کاتەدا کە خەریکی روخاندنی (رژێمی صدام )ن زۆر باسی سیستەمی دیموکراسی مەکەن بۆ عیراق، لە بەر ئەوەی دەوروبەرتان قبوڵیان نییە و لێیئەترسن و دژایە تیتان ئەکەن و له‌ ژێره‌وه‌ کاری لەدژ دەکەن و ناهێڵن سەربكەوێ، چونکە خۆیان دیموکراسی نیین،زۆر زەحمەتیشە لەم هەلومەرجەدا دەوڵەتێکی دیموکراسی لە جەنگەڵستانێکی وەها دروست ببێت.


٤-کارێکی باش ئه‌که‌ن بایه‌خ بە پته‌وکردنی پەیوەندیه‌کانتان لەگەڵ میسر  وەکو حکومەت و داموده‌زگای رۆشنبیری و میدیایی و ئایینی ئەدەن بۆ دروستکردنی رای گشتی عەرەبی  بۆ مەسەلەی کورد .


بۆچونەکانی هەیكەل لەو رۆژگارەدا زیاتر بۆ ئاستی دەرەوە بوو ،وەفدەکەو بەتایبەتی هەڤاڵ مام جلال بۆچونەکانی هه‌یکه‌ل-یان بەرز نرخاند و بە بایه‌خەوە وەرگیرا، لەدوای تەواوبونی میوانداریەکە مام دیاریه‌کی تایبەتی پێشکەش کرد کە لە خوێندنەوەی کتێبی (مدافع ایات اللە) بۆی دەرکەوتبوو.

ئێستا دوای (٢٣)ساڵ و گۆرانکاری زۆر لە کوردستان و عیراق و ناوچەکە و دونیا ھاتۆتە ئاراوە بەڵام ئاخۆ ئامۆژگاریەکانی ئه‌و نووسه‌رو رۆژنامه‌نوسه‌ ناوداره‌  بۆ ئه‌مرۆی کوردستان و سەرکردایەتیە سیاسیه‌که‌ی ئێستاش ناشێن٠٠٠!؟

copyright 2019, All Rights Reserved Developed by TeraTarget for Digital Intelligence and IT Innovations