نوێترین زانیاری سەبارەت بە که‌یسی سێوه‌ قادر

11.07.2019

لڤین:

پارێزه‌ری تۆمه‌تباری دووه‌م له‌ که‌یسی سێوه‌ قادر و منداڵه‌کانی،رایگەیاند کە تۆمه‌تبار ( س. م. أ ) بێتاوانی سه‌لمێندراو که‌یسه‌که‌ی لە دادگا داخرا، بەڵام بە پێی زانیاریەکان هاوسەری سێوە تا ئێستا کەیسەکەی یەکلایی نەکراوەتەوە.

ئێواره‌ی رۆژی ١٦ ی کانوونی یه‌که‌می ٢٠١٨ ، به‌هۆی ئاگرێکی گوماناوییەوە له ‌ماڵێکی گه‌ڕه‌کی ئاسووده‌ له ‌چه‌مچه‌ماڵ، سێ منداڵ به‌ناوه‌کانی (دارین – لارین و ده‌وه‌ن دیار) که‌ ته‌مه‌نیان له‌نێوان ٥ ساڵ و ٣ ساڵ و ٦ مانگدا بوو گیانیان له‌ده‌ستداو دایکیشیان به‌ناوی (سێوه‌ قادر) دوای هه‌فته‌یه‌ک ‌مانه‌وه‌ی له‌ نه‌خۆشخانه‌ به‌هۆی زۆریی و سه‌ختی برینه‌که‌یەوە به‌ره‌به‌یانی رۆژی ٢٤ ی هه‌مان مانگ گیانی له‌ده‌ستدا لەو رووداوەشدا (س. م. أ) تۆمەتباری دووەم بە رووداوی گیان لەدەستدانی سێوە قادر لەلایەن کەسوکارییەوە تۆمەتبارکرابوو.

هەرچەندە ‌ماوه‌یەک لەمەوبەر دادگا بڕیاری ئازادکردنی تۆمه‌تباری دووه‌می که‌یسی (سێوه‌ قادر) ی ده‌رکردو که‌سوکاره‌که‌شی ته‌مییزی بڕیاری ئازادکردنه‌که‌یان کردەوە، به‌ڵام ته‌میزه‌که‌ په‌سه‌ند نه‌کراو دۆسێی تاوانەکە داخرا.

ئه‌مڕۆ پێنج شه‌ممه رێکەوتی‌  ١١ی تەمووزی ٢٠١٩  سامی ساتی، پارێزه‌ری تۆمه‌تباری دووه‌م له‌ که‌یسی سێوه‌ قادر و منداڵه‌کانی بە میدیاکانی رایگه‌یاند "به‌هۆی نه‌بوونی هیچ به‌ڵگه‌یه‌ک دژی تۆمه‌تبار (س. م. ا)، دادگای لێکۆڵینه‌وه‌ی سلێمانی/١  رۆژی ٢٢ی نیسانی ٢٠١٩ ، بڕیاری ئازادکردن و داخستنی دۆسیێ ناوبرای ده‌رکرد، به‌ڵام که‌سوکاری (سێوه‌ قادر) داوای پێداچوونه‌وه‌ (ته‌مییز)ی ئه‌و بڕیاره‌یان کردەوە".

هەروەها پارێزەرەکە ڕایگەیاندووە"دادگای تاوانه‌کانی سلێمانی/١  به‌سیفه‌تی پێداچوونه‌وه‌ داواکاریی سکاڵاکاران به ‌مافی که‌سیی ره‌تکرده‌وه‌و بڕیاری ئازادکردنه‌که‌ی په‌سه‌ندکرد. دەشڵێت تۆمه‌تبار ( س. م. أ )یش بێتاوانی سه‌لمێندراو که‌یسه‌که‌ی داخرا".

6400 جار بینراوە

زیاتر

copyright 2019, All Rights Reserved Developed by TeraTarget for Digital Intelligence and IT Innovations