کاکە حەمە بۆچی دەست لە کەرکوک دەشوات؟!

26.06.2019

لڤین: لە هەژماری ئەحمەد رەفیق

محەمەدیی حاجی مەحمود سکرتێری حزبیی سۆسیالیست دیمۆکراتیی کوردستان لە گفتوگۆیەکییدا لەگەڵ دەنگی-ئەمریکا دەڵێت: (دۆخی كەركوك بە شەڕ گەیشتوەتە ئاستی ئێستا و تەنها بە شەڕیش كۆنتڕۆڵدەكرێتەوە. هەروەها دەشڵێت: من پێم وایە جارێكی تر كەركوك ناگەڕێتەوە سەر هەرێمی كوردستان و ژێر دەستی كورد-یش، چونکە كەركوك كۆتایی هاتووە، دەبێت ڕوداوێكی گەورە ڕوبدات هەروەك چۆن لە 2003 ڕژێمی بەعس ڕووخا یا شەڕی داعش ڕوویدا، دەبێت كورد چاوەڕێی ڕووداوی گەورەتر بكات لە عیراق جا ڕەنگە سەد ساڵی تر یا پەنجا یا بیستی تر بێت نازانرێت چۆن دێت ئەگەر ڕوداوی گەورەتر ڕونەدات ئەوا كورد لەكەركوك كۆتایی هاتووە، چونكە كورد بەشەڕ چۆڵی كردووە بە شەڕ نەبێت قەت ناگەڕێتەوە بۆ لە5% ی پێش 16ی ئۆكتۆبەر)!؟

گەر بە وردیی لە وشە و رستەکانیی ئەم قسانەی کاکە حەمە وردبینەوە، بە رونیی لە رادە و ئەندازەی مەترسیی ئەو وشانە تێدەگەی!. لە واقیعدا ئەم قسانەی کاکە حەمە، گریمان راستیش بن، لە بەر کۆمەڵێک هۆکار هەر نابێ بوترێن! چون هەم زیان بە مەسەلەی کورد و کەرکوک دەگەیەنێ، هەمیش وا لە دانیشتوانیی کوردیی کەرکوک و ئەو ناوچانە دەکات؛ کە دەستبەرداری کەرکوک بن و، بە ناچاری بەرەو ناوچەکانیی هەرێم و شوێنەکانیی دیکە رەو بکەن!. کە ئەمەش بە نەتیجە مەترسیی گەورە لە سەر دۆزی کورد لەو ناوچانە دروست دەکات و پرسیی کەرکوکیش وەک مەسەلەیەکی نەتەوەیی و نیشتمانیی لە زاکیرەی کورد بە گشتیی و کوردستانییانیی ئەو ناوچانە بە تایبەتیی دەسڕێتەوە. له راستیدا ئەم گوتارە ئێجگار مەترسیدار و دەبێ هەڵوەستەی جددیی لەسەر بکرێ، چون لانیکەم دەبێ لە هۆکار و مەترسیی ئەم گوتارە بکۆڵدرێتەوە و بزانرێ بۆچیی-ش لەم تەوقیتەدا کاکە حەمە ئەم قسانە دەکا و، بە ئاشۆرا دەست لە کەرکوک دەشوات؟!

جێی سەر سوڕمانە! سەرکردەیەک کە کوڕی خۆی لە کەرکوکدا بە شەهیدکردن دابێ، کەچی ئەم قسانە بکا و ئەمەش هەڵوێستیی بێ!؟ چون سەرتاپای قسەکانیی راستەوخۆ دەچێتە خزمەتکردنیی شۆڤێنیی و تۆرانییەکان و، زیانیی گەورەش بە مەسەلەی کورد و کەرکوک دەکەیەنێ کە عەیامێکە هەوڵی چارەسەرکردنیی دەدرێ!

1383 جار بینراوە

زیاتر

copyright 2019, All Rights Reserved Developed by TeraTarget for Digital Intelligence and IT Innovations