بەریتانیا.. دەنگدان بەردەوامە

08.06.2017

پۆلەتیک:خەڵكی بەریتانیا 650 ئەندامی پەرلەمانی نوێ هەڵدەبژێرن‌و، كاتژمێر ٧ بە كاتی بەریتانیا، نزیكەی ٤٠ هەزار بنكەی دەنگدان بەڕووی دەنگدەراندا كرانەوە و دەنگدانەكەش تا كاتژمێر ١٠ بەردەوام دەبێت.

لە هەڵبژاردنەكەدا هەر پارتێك پێویستی بە بردنەوەی 326 كورسی پەرلەمانی هەیە بۆ پێكهێنانی حكومەتی نوێ. ئەمە لەكاتێكدایە كە ساڵی ٢٠١٥، پارتی پارێزگاران بە بردنەوەی ٣٣١ كورسی توانیان زۆرینەی پەرلەمانی بەدەستهێن.

جێی ئاماژەیە، كە هەڵبژاردن لە بەریتانیا بۆ ماوەی پێنچ ساڵە، ئەگەر پارتی پارێزگارانی دەسەڵاتدار هەڵبژاردنەكە بباتەوە، تاوەكو ساڵی 2022 حوكمی ئەو وڵاتە دەكات، كە ماوەی حەوت ساڵیشە لە دەسەڵاتدایە، ئەوەش دەبێتە زۆرترین  ماوە كە ئەو پارتە لە دەسەڵاتدا بووبێت لە مێژووی بەریتانیادا.

لای خۆشیەوە، جێرێمی كۆربینی، سەرۆكی پارتی كرێكاران، لەكاتی بەشداریكردنی لە پرۆسەی دەنگدان، رایگەیاند:   ئەو مەترسی تیرۆریستیانەی ڕوویان لە بەڕیتانیا كردووە  ڕاستەوخۆ پەیوەندی بەو جەنگانەوە هەیە كە حكومەتی بەریتانیا لە وڵاتانی وەك لیبیاو عێراق ئەنجامی داوە.

ئەنجامدانی هەڵبژاردنە گشتییەكان لە بەریتانیا لەكاتێكدایە كە لەماوەی ڕابردوودا بەریتانیا ڕووبەڕووی چەند هێرشێكی چەكداری بووەوەو لە دواینیاندا، كە شەوی ٣ ی ئەم مانگە بوو، سێ چەكدار لە لەندەن بریج بە ئۆتۆمبێل ھێرشیان كردە سەر پیادەڕۆیانی  شەقامەكان.

240 جار بینراوە

زیاتر

copyright 2019, All Rights Reserved Developed by TeraTarget for Digital Intelligence and IT Innovations