ژمارەیەك كەسایەتی ئێزدیەكان: دەزگای پاراستنی پارتی دەست لە كاروباری ئێزدیەكان وەردەدات

21.11.2020

لڤین: 
ژمارەیەك كەسایەتی ئێزدی رایانگەیاند، دەزگای پاراستنی پارتی دەستی وەرداوەتە كاروباری ئێزدیەكان و حازم تەحسین بەگ خۆی لەدەرەوەی ویست وخواستی ئێزدییەكان بە مەرامی ئەو دەزگایە پۆستەكەی پێدراوە. 


ژمارەیەك كەسایەتی رۆشنبیرو چالاكوان و ئۆلدار و پیاو ماقوڵی ئێزدیی وەڵامی وتەبێژی پارتی دەدەنەوە رایانگەیاندووە: لەدەرەوەی ویست و ئیرادەی ئێزدییەكان و داب و نەریتەئاینییەكان، لەشاری دھۆك لەكۆبوونەوەیەكی داخراو وناڕەوادا كەرێگەنەدرا ئێزدییەكان بەشداری تێدابكەن  و تەنھا كاندیدی مەبەستدارو ژمارەیەك لەئێزدییەكانی سەر بەپارتی دیموكراتی كوردستان  ئامادەیی بوون ، دوور لەھەموو عورف و بەھایەك ، بابەشێخێك دەستنیشانكرا.

ئەوان ئاماژەیان بەوە كردووە كە دەستنیشاندرنی بابە شێخی ئێستا لە دەرەوەی داوای زۆربەی ئێزدییەكانە، لە وڵات و دەرەوەی وڵات، دەشڵێن "حازم تەحسین بەگ خۆی لەدەرەوەی ویست وخواستی ئێزدییەكان بە مەرامی دەزگای پاراستنی پارتی دیموكراتی كوردستان سەپێنراو كرایە میر، لای ھەمووان روونە میری سەپێنراو، كەسێكی نەشارەزایە و توانای بەڕێوەبردنی ئەو پێگەیەی نیە، ئێستا چۆن مافی ئەوەی ھەیە سەرۆكی جڤاتی رۆحانی ئێزدییەكان دەستنیشان بكات".

ئەوان ئەوەیان رەتكردووەتەوە دەشڵێن "ئێزدییەكانیش رێگەنادەن جارێكی دیكە پارتی دیموكراتی كورددستان و هیچ پارتێكی تر یاری بەچارەنووس و ئایندەیان بكات. لەبەرامبەریشدا ببینەوە قوربانی سیاسەتە ھەلپەرست و قۆرخكارییەكان  و ئایندەمان بدرێتەوە دەست قەدەر".

لەو راگەیەندراوەدا كە كۆپیەكی بۆ (لڤین پرێس) نێردراوە ئاماژەیان بەوەكردووە "بەپیلانی دەزگای پاراستنی پارتی دیموكراتی كوردستان خەڵكی بێ گوناهی شنگال-یان  فرۆشتەوەو لەبری ئەوەی داوای لێبووردنیان بكردایە و  باری لاری سەرشانیان رێككردبایەتەوە،  كەچی بەداخەوە وتەبێژە بەناوەكەیان لەروونكردنەوەیەكدا كە سەرلەبەری  وشەی داتاشراو ھەڵبەستراوە، پاساو بۆ ئەم كارەنەشیاوەیان دەھێنێتەوەو منەتبارمان دەكەن".

لە وەڵامەكەدا ئەو كەسایەتیە ئێزدیانە دەشڵێن "پارتی و دەزگای پاراستن ، ھەر لەسەرەتای كۆچكردنی جەنابی میر تەحسین و جەنابی بابە شێخ سەرۆكی جفاتی رۆحانی ئێزدییەكان ،  راستەوخۆ دەستیان وەردایە ناو كاروباری ئاینی ئێزدییەكان و ھەموو داب و نەریتەئاینی و بگرە تێبینی و سەرنج و ھۆشداری كەسایەتی و پیاوانی ئاینی ئێزدییان فەرامۆشكرد، دوور لەھەموو بەھایەك، شوێنگرتنەوەی بابە شێخ یان لە مەراسیمێكی رووكەشدا پڕكردەوە بە مەرامی خۆیان".

‎ئەواندەڵێن پارتی لە 2003وە دەستیانكردووە بە سیاسەتی عەریب و تەرهیب و "لە دوای ڕادەستكردنی ئێزدیەكان لە شەنگال 3-8-2014 بەبەرنامە بۆداڕێژراو تر دەست لەكاروباری ئاینی و كۆمەڵایەتی ئێزدییەكان وەردەدات و بەسیاسەتی ترس و برسیكردن ھەڵسوكەوت لەگەڵ ئێزدییەكان دەكات".


242 جار بینراوە

زیاتر

copyright 2019, All Rights Reserved Developed by TeraTarget for Digital Intelligence and IT Innovations