دەقی ئەو وتارەی ماكرۆن كە ناڕەزایی لێكەوتەوە

25.10.2020

لڤین: 
ئیمانوێل ماكرۆن، سەرۆكی فەرەنسا رۆژی 21ـی ئەم مانگە وتارێكی لە رێوڕەسمی رێزگرتن لە مامۆستای سەربڕاوی فەرەنسی سامۆئێل پاتی كە بە دەستی موسڵمانێكی چیچانی لە پاریس كوژرا پێشكەش كرد و وتارەكەی كاردانەوەی گەورەی لێكەوتەوە. 


ئەو وتارەی ماكرۆن  لە زانكۆی سۆربۆن لە پاریس پێشكێشكرد لە دوای چەند رۆژێك كاردانەوەی لێكەوتەوە و بەشێك لە وڵاتانی ئیسلامی  ناڕەزاییان دەربڕی. 

ئەم وتارەی ماكرۆن كاردانەوەی زۆری لێكەوتەوە، هەروەك وتارەكەی لە رۆژی 2ـی ئۆكتۆبەر، كە تێیدا رەخنەی لە "گۆشەگیریی ئیسلامی" گرت و هەروەها گوتی "ئیسلامی سیاسی" هەوڵدەدات دەوڵەتێكی "هاوتەریب" لەنێو فەرەنسادا دابمەزرێنێ و یاساكانی خۆی جێبەجێبكات نەك یاساكانی فەرەنسا.
 
دەقی وتارەكەی سەرۆكی فەرەنسا : 
 
سامۆئێل باتی رۆژی هەینی بووە رووی كۆمار، بووە رووی ئارەزووی ئێمە بۆ لەنێوبردنی تیرۆریستان و سەركوتكردنی ئیسلامیستەكان و ژیان وەك كۆمەڵگەیەك لە هاونیشتمانیانی ئازاد لە وڵاتەكەماندا. بووە رووی پێداگیری ئێمە لەسەر زانین، بۆ فێربوون و درێژەپێدانی فێربوون و ئازادیخوازبوون، چونكە ئێمە بەردەوام دەبین ئەی مامۆستا. 
 
ئێمە بەردەوام دەبین لە بەرگریكردن لە ئازادی كە خۆت زۆرت فێركردن و بەیداخی عەلمانیەت بەرز رادەگرین. واز لە كاریكاتۆر ناهێنین و واز لە وێنە دەستییەكان ناهێنین، ئەگەر ئەوانیدیكەش پاشەكشە بكەن. هەموو ئەو هەلانەی لەسەر شانی كۆمارن بۆ هەموو گەنجانی دەڕەخسێنین بەبێ جیاكاری. 
 
مامۆستا ئێمە بەردەوام دەبین لەگەڵ هەموو مامۆستا و وانەبێژان لە فەرەنسا، بەردەوام دەبین لەسەر گوتنەوەی وانەی مێژوو بە هەموو شانازییەكانییەوە و بەهەمانشێوە بەگشت گۆڕانەكانیشیەوە. وانەكانی ئەدەبیات، میوزیك و هەموو كارەكانی رووح و عەقل دەڵێینەوە. بەهەموو هێزمان حەز لە گفتوگۆ و گەنگەشە و بەڵگەی باوەڕپێكەر و باوەڕهێنان بە رێگەی ژیرانە دەكەین. حەز لە زانست و بابەتە مشتومڕ هەڵگرەكانی دەكەین. هەروەك تۆ، كولتووری لێبووردەیی دەچێنین. هەروەك تۆ بەبێ سنوور هەوڵی تێگەیشتن دەدەین، تاوەكو زیاتر تێدەگەین. هەر ئەوەشبوو كە دەیانویست ئێمەی لێ دووربخەنەوە.
 
خۆمان فێری كۆمیدیا دەكەین، خۆمان فێری جیاوازی دەكەین. هەمیشە بەبیر خۆمانی دەهێنینەوە كە ئازادییەكانی ئێمە پارێزراو نابن تەنیا لە رێگەی كۆتاییهێنان بە رق و تووندوتیژی نەبێت، تەنیا لە رێگەی رێزگرتنی ئەویدیكە نەبێت.
 
بەردەوام دەبین ئەی مامۆستا، سەدان لاو كە تۆ پێتگەیاندن بەدرێژایی ژیانیان ئەو بیركردنەوە رەخنەگرانەیە بەكاردەهێنن كە تۆ فێرت كردن. لەوانەیە ئەوانیش هەندێكیان ببنە مامۆستا و وانەبێژ و ئەوانیش هاونیشتمانییە لاوەكان پێدەگەیێنن. ئەوانیش خۆشەویستی كۆمار دەچێنن. كار لەسەر تێگەیشتنی نەتەوەكەمان دەكەن، كار لەسەر تێگەیشتنی بەهاكان و ئەوروپایەكەمان دەكەن.
 
بەدرێژایی سەردەمەكان ناوەستین. بەڵێ بەردەوام دەبین لەو تێكۆشانە لەپێناو ئازادی و لەپێناو عەقڵ كە تۆ لەمڕۆوە بووی بە رووەكەی. چونكە ئێمە قەرزداری تۆ و قەرزداری خۆمانین لەوڕووەوە. چونكە ئەی مامۆستا، چراكان هیچ كاتێك لە فەرەنسا ناكوژێنەوە، بژی كۆمار و بژی فەرەنسا.

2373 جار بینراوە

زیاتر

copyright 2019, All Rights Reserved Developed by TeraTarget for Digital Intelligence and IT Innovations