دواین زانیاری لەسەر دەستپێکردنەوەی گەشتەکانی عەمرە لە کوردستان

22.10.2020

لڤین:
وتەبێژی وەزارەتی ئەوقاف و کاروباری ئایینی رایگەیاند، لە ئێستادا هیچ بڕیارێکی نوێ نییە لەبارەی دەستپێکردنەوەی گەشتەکانی عەمرە لە هەرێمی کوردستان.

نەبەز ئیسماعیل وتەبێژی وەزارەتی ئەوقاف و کاروباری ئایینی بە ئێن ئاڕ تی راگەیاند، لە ئێستادا وەزارەتی ئەوقاف هیچ بریارێکی نوێی نەداوە لەبارەی دەستپێکردنەوەی گەشتەکانی عەمرە و چاوەڕێی وڵاتی سعودیەن کە بریارە  لە رۆژی ١ی مانگی داهاتوو بڕیاری نوێ دەربکات لەسەر بەڕێوە چوونی عەمرە و چوونی عەمرەکاران بۆ ئەو وڵاتە.

باسی لەوەشکرد، دوای دەرکردنی بڕیار لە لایەن سعودیەوە، وەزارەتی ئەوقاف لەگەڵ لیژنەی روبەروبوونەوەی کۆرۆنا کۆدەبێتەوە و بریاری پێویست بۆ عەمرەکارانی هەرێم و رێکار و رێنمای خۆیان دەردەکەن.

لە پاش زیاتر لە ٧ مانگ بەسەر بڵاوبوونەوەی ڤایرۆسی کۆرۆنادا، لە ٤ی ئەم مانگەدا، یەکەم کاروانی عەمرەکارانی سعودی دەستیان بە ئەنجامدانی مەراسیمی عەمرە کردەوە.

لە سەرەتای ئەمساڵەوە بەهۆی بڵاوبوونەوەی ڤایرۆسی کۆرۆناوە لە جیهاندا، رێکاری خۆپارێزی گیرانەبەر و لەو چوارچێوەیەشدا سعودیە لە سەرەتای مانگی ئازارەوە پێدانی ڤیزای بەمەبەستی گەشتی عەمرە راگرت و لە مەراسیمی حەجی ئەمساڵیشدا تەنها رێگە بە ژمارەیەکی دیاریکراو لە هاوڵاتیانی ناوخۆی سعودیە درا کە بە پابەندبوون بە رێنماییەکانەوە حەج بکەن.

354 جار بینراوە

زیاتر

copyright 2019, All Rights Reserved Developed by TeraTarget for Digital Intelligence and IT Innovations