ئەنجومەنی فتوای هەرێم شێوازی مەولوودی گۆڕی

18.10.2020

لڤین:
ئەنجومەنی باڵای فتوا رایگەیاند بەهۆی بڵاوبوونەوەی كۆرۆنا شێوازی مەولوود ئاساییە بگۆڕدرێت بۆ بە دەربڕینی دڵخۆشی بە بڵاوكردنەوە و هەڵواسینی لافیتە و دروشمەكان لە شوێنە گشتیەكان و هەروەها لە سۆشیال میدیا.


لەگەڵ هاتنەوەی مانگی مەولوود ئەنجومەنی باڵای فتوای هەرێم روونكردنەوەیەكی بڵاوكردەوە و تیایدا دەڵێت: لەبەر بارودۆخی ناجێگیری تەندروستی گشتی لە كوردستان بەهۆی ڤایرۆسی كۆرۆنا كە رێنماییە تەندروستیەكان وا دەخوازن گردبوونەوە نەكرێت بۆ هیچ بۆنەیەك.

ئەنجومەنەكە روونیكردووەتەوە "لەو روانگەوە وەك ئەنجوومەنی باڵای فەتوا پێمان باشە بۆ ئەمساڵ شێوازی ئاهەنگگێڕانەكە لە گردبوونەوە لە ماڵ، مزگەوت، خانەقا و تەكیەكان بگۆڕدرێت بە دەربڕینی دڵخۆشی بە بڵاوكردنەوە و هەڵواسینی لافیتە و دروشمەكان لە شوێنە گشتیەكان و هەروەها لە سۆشیال میدیا".

ئەوەشی راگەیاندووە "مەولوودكردن واتە دەربڕینی خۆشحاڵی و خۆشەویستی و ئەنجامدانی خێر، سەدەقە و چاكە بۆ رۆحانیەتی پیرۆزی پێغەمبەر (درودی خوای لەسەر بێت)، ئاساییە ئەو سەدەقە، خێرو چاكانەش، كە موسڵمانان دەیكەن، بدرێنە هەژاران و بەشێوەی خۆی بڵاوبكرێتەوە، چونكە سەدەقە دەفعی بەڵا و موسیبەت دەكات بەپێی دەقەكانی شەریعەتی پیرۆزی ئیسلام".

1335 جار بینراوە

زیاتر

copyright 2019, All Rights Reserved Developed by TeraTarget for Digital Intelligence and IT Innovations