ئەوپەڕی دەبەنگییە

29.08.2020

لڤین: وەرگیراوە لە پەڕەی عەبدوڵا پەشێو
ئەوپەڕی دەبەنگییە تۆ سیستێمێكی جێگیر و متمانەپێكراوی بانكت نەبێ، كەچی ڕووقایمانە باسی گەشەی ئابووری و سەرمایەگوزاری بكەی و تەلارێكت ناو نابێ "وەزارەتی دارایی و ئابووری"!


كارەساتە تۆ كەرتی گشتیی تەندروستیت وێران كردبێ، نەخۆشخانەی چڵێسی تایبەتت بەردابیتە گیانی گەلێكی دەردەدار، دابینكردنی ئامێر و دەرمانت بە قاچاخچییان سپاردبێ، ئاوت جێی گومان و كارەبات دەمدەمی و گڕەگڕی ژەنەراتۆر"مووەللیدە"ی ژاردەرفرتێنت بێسرەوت بێ، كەچی باسی تەندروستیی بكەیت و وەزارەتێكیشت بەو ناوە بۆ دۆست و ئەحباب دانابێ.

نەخوێندەوارییە بەدرێژایی ٣٠ ساڵی ڕەبەق یەك سەرژمێریی دووپێ و چوارپێیەكانی وڵاتت نەكردبێ، كەچی "وەزارەتی پلاندانان"ت هەبێ!

تۆ ڕێوبانت هی سەردەمی مەلیك و قاسم و سەددام بێ، نە مێترۆیەكت هەبێ نە ترامێك، نە ڕێیەكی ئاسنت هەبێ نە باسێكی كەرتی گشتی، نە تۆڕێكی سەردەمیانەی هاتوچۆی نێوان شارانت هەبێ نە پۆستەخانەیەكی سەردەمیانەی دەوڵەت، كەچی چەند وەزارەت و بەڕێوەبەرایەتییەكت بۆ ئەو سێكتەرانەی خزمەگوزاری قیت كردبێتەوە!

تۆ لەسەردەمی شۆرشی زانیاری و جەنگی بێبەزەییانەی فەرهەنگ و زماناندا، هێشتا تاكە فەرهەنگێكی گشتیی زمانی نەتەوەت نەبێ، كە سادەترین مەرجی زانستیی تێدا بێ...
تۆ شكۆی زمانت تێكشكاندبێ، ڕێنووست لەبار بردبێ، تاكە كەناڵێكت نەبێ دوو ڕستەی ڕەوانی كوردیی لە دەم دەرچێ، تۆ... تۆ... زانكۆ و فێرگەی كەرتی گشتیت وێران كردبێ، وڵاتت بە قوتابخانەی عاجباتیی ئەمەریكایی و فەرەنسایی و ئینگلیزی و سوێدی و توركی و عەرەبی و و چی و چی تەنی بێ، كەچی، هێندە بلیمەت بیت، تەلارێك بۆ "ئەكادێمیا" و دوو تەلاریش بۆ "پەروەردە" و "ڕۆشنبیری" ی كوردی تەرخان بكەی!

تۆ دەیان ساڵ ڕەوەیەك نەهەنگی تێرنەخۆرە و مافیای سەرسەری و چەنەبازی دەستوپێسپیت بە ناوی "حیزب" لە سامانی گشتی بەردابێ و ژیانێكی شاهانە و كەڵەگایانەت بۆیان مسۆگەر كردبێ، لەولاش كارمەندانی كارزانی ڕاستەقینە برسی بن، كەچی تەلارێكی پۆشتە و پەرداخیشت بۆ "داد" ئاوا كردبێ!


781 جار بینراوە

زیاتر

copyright 2019, All Rights Reserved Developed by TeraTarget for Digital Intelligence and IT Innovations