مەسرور بارزانی پارە دەداتە بەشێك لە كارمەندانی نەخۆشخانەی رزگاری

09.08.2020

لڤین: 
سەرۆكی حكومەت خەڵاتی بەشێك لە كارمەندانی نەخۆشخانەی رزگاری هەولێر دەكات و پەرلەمانتارێكی دەستلەكاركێشاوەش داوا دەكات سەرجەم كارمەندانی سەنتەرەكانی كۆرۆنا داوای ئەو پارەیە بكەن. 


بەشێك لە كارمەندانی نەخۆشخانەی رزگاری خەڵاتی سەرۆكی حكومەت وەردەگرن و باس لەوەش دەكرێت بە گوێرەی نزیكی حزبیەوە پارەكە دابەشكراوە. 

بەگوێرەی هەندێك زانیاری باس لەوە دەكرێت كە مەسرور بارزانی سەرۆكی حكومەت بڕی 50هەزار دۆلاری بەخشیوە بۆ كارمەندانی نەخۆشخانەی رزگاری بەڵام بەشێك لە كارمەندەكان ئەو پارەیەیان وەرگرتووە. 

ئەو پارەیەی دابەشكراوە بەسەر كارمەندەكاندا سەرجەمیانی نەگرتووەتەوە، ئەو پارەیە لەلایەن چەند بەرپرسێكی نەخۆشخانەكە دابەشكراوە وەك باس دەكرێت ئەو كەسانەی گرتووەتەوە كە لە پارتیەوە نزیكن. 

سەرچاوەیەكی بەرپرسیش لە نەخۆشخانەكە رایگەیاند پارەكە بۆ ئەو كەسانە تەرخانكراوە كە بەركەوتنیان لەگەڵ تووشبووانی كۆرۆنا هەبووە نەك سەرجەم كارمەندانی نەخۆشخانەكە. 

لەو بارەیەوە سۆران عومەر، پەرلەمانتاری دەستلەكاركێشاوەی كوردستان لیستێكی كارمەندانی نەخۆشخانەكەی بلاو كردووەتەوە تیایدا دەردەكەوێت كە بەشێك لە كارمەندانی نەخۆشخانەكە لە پارەكە بێبەش كراون. 

لەو بارەیەوە ئەو پەرلەمانتارە دەستلەكاركێشاوەیە دەڵێت: ئەو كارمەندانەی نەخۆشخانەی ڕزگاری گوایە بۆ بەركەوتوانە لەگەڵ نەخۆشەكانی كۆرۆنا، دەوترێ كەسانێكی موستەحەقی لێ مەحروم كراوە، ئەم پارە مادام لە حكومەتەوە چووە پارەی باوكی كەس نیە بیكات بە پیاوەتی بەسەر ئەو كارمەندانەوە، پێویستە موچەكانیان بدەنێ نەك منەتی ھاوكاری!

ئەو بە پێویستی دەزانێت  "ھەركەس ئەو پارەی وەرنەگرتوە لە ھەموو نەخۆشخانەكانی كۆرۆنا پێویستە داوای بكات! ئەگەر نا ئێوە بەبێ موچە بۆ خۆتان دەكەنە قوربانی لەكاتێكدا سەرۆكی حكومەت خۆی لەپشتی كۆمپیتەرەوە حكومەت دەبات بەڕێوە."

736 جار بینراوە

زیاتر

copyright 2019, All Rights Reserved Developed by TeraTarget for Digital Intelligence and IT Innovations