وەزیری تەندروستی: هیچ نەخۆشێك بەهۆی نەمانی ئۆكسجینەوە نەمردووە

30.07.2020

لڤین:  
وەزیری تەندروستی دواین دۆخی كۆرۆنا لە هەرێمی كوردستان ئاشكرا دەكات و دەڵێت تەنها لە ماوەی 24 كاتژمێری رابردوودا 368 تووشبوو تۆماركراوە و هیچ نەخۆشێكیش بە هۆی نەمانی ئۆكسجینەوە نەمردووە. 


سامان بەرزنجی، وەزیری تەندروستی حكومەتی هەرێمی كوردستان، رایگەیاند، لە 24 كاتژمێری رابردوودا، 368 حاڵەتی نوێی تووشبوو تۆمار كراوون. 3048 پشكنین ئەنجامدراوە. 78 حاڵەتی چاكبوونەوە هەیە. 5 حاڵەتی مردن لە هەولێر هەیە و یەكێكیان لە فریاكەوتن بووە و 4 حاڵەتیش لە رزگاری بووە. 4 حاڵەتیش لە سلێمانی و 2 حاڵەت لە گەرمیان تۆمار كراوون و كۆی گشتی 11 حاڵەتی مردن بووە.


ناوبراو لە كۆنگرەیەكی رۆژنامەوانیدا لەباری كێشەی نەمانی ئۆكسجین لە نەخۆشخانەی رزگاری هەولێر وتی، زیاد لە قەبارەی خۆی گەورە كراوە و راستی نەگەیشتە هاوڵاتیان و پشێوی درووست كرد.


ئەو گلەیی لە میدیاكان كرد كە رەوشەكەیان بە گەورەتر لە خۆی پیشانداوە وتیشی: كێشە لە كارگەی ئۆكسجینی نەخۆشخانەكە هەبووە و بۆ ماوەی دوو كاتژمێر كێشە هەبووە و 400 بتڵی ئۆكسجین هەبووە و سەرەتا ئەم نەخۆشخانەیە كە درووستكراوە، تەنیا 72 قەرەوێڵە ئۆكسجینی بۆ دابینكراوە. بۆیە قەبارە و توانای ئەم نەخۆشخانەیە بە بەردەوام 300 نەخۆش ئۆكسجینی لەسەر بووە. 


ئەو وتیشی: رۆژانە 300 بتڵی ئۆكسجین بەكار دەهێنرێن و ئۆكسجینی شلیش لە كارگەیەكی دەرەوەی هەولێر رەوانە دەكرێت. هێنان و بردنی 300 بتڵی ئۆكسجین لە لایەن هاووڵاتییانەوە لەسەر پلیكانەی نەخۆشخانە، بێ متمانەیی و پشێوی درووست دەكات. ئۆكسجین لە هەر شوێن نەمێنێت، ئۆكسجینی بەدیل هەیە. خۆشبەختانە ئەوەی بینیمان خەڵكێكی زۆری خێرخواز دەستبەجێ پەیوەندیان كردووە و ئامادەییان دەربڕیوە هاوكاری بكەن و دوای دوو كاتژمێر ئۆكسجینی سەنتراڵی نەخۆشخانەكە چاكبووەتەوە و لە بەیانییەوە كاردەكات.


ئەو وتیشی مردن بە هۆی نەمانی ئۆكسجین نەبووە. تەنیا لەونەخۆشخانەیە رۆژانە 4 تا 8 كەس گیانیان لەدەستداوە، ئەو باسی ئەو پارانەی رد كە بۆ روبەڕبوونەوەی كۆرۆنا تەرخانكراوە و دەڵێت "بودجەی تەرخانكراو مانگانە 6 ملیار دینار بووە لە 5 مانگی كاركردندا 30 ملیار دینار دەكات و بودجەی تایبەتی كۆرۆناش 18 ملیار دینار خەرج كراوە و تا ئێستا نزیكەی 40 ملیار دینار بۆ بواری بەرەنگاربوونەوەی كۆرۆنا خەرج كراوە و حكومەتی هەرێم هیچ درێغییەكی نەكردووە".


وەزیری تەندروستی راشیگەیاند، لە جەژندا دەبێت رەچاوی رێنماییەكان بكرێت و بە توندوتۆڵی جێبەجێ بكرێن و خۆپارێزی و رزگاربوون تەنیا بە ئۆكسجین نییە، كۆمەڵێك ئامێر و پێداویستی هەیە بەیەكەوەن. تكایە خۆتان مەگەیەننە ئەو حاڵەتەی تووشی كۆرۆنا بن. تكاتان لێ دەكەین، خۆتان بپارێزن. بە جددی وەری بگرن. بەرامبەرەكانتان بێ ئەوەی نیشانەیان هەبێت رەنگە هەڵگری كۆرۆنا بن. تكایە سەردان و بەركەوتن و قەرەباڵغی درووست مەكەن. 

544 جار بینراوە

زیاتر

copyright 2019, All Rights Reserved Developed by TeraTarget for Digital Intelligence and IT Innovations