یازدە ساڵەی دامەزراندنی بزوتنەوەیەكی هیواكوژ

25.07.2020

لڤین: شیكاری/ كەمال چۆمانی

رۆژانی دوای دروستبوونی بزوتنەوەی گۆڕان لە ٢٥ی تەموزی ٢٠٠٩، لەگەڵ نوسەر و رۆماننوس كاروان كاكەسور لەبارەی سیاسەت و ئۆپۆزسیۆنەوە تێڕوانینەكانمان ئاڵوگۆڕكرد. ئەوكات من، وەك زۆر لە رۆژنامەنوسان و نوسەران، پێموابوو دەرفەت بدەین بزوتنەوەی گۆڕان و كەمتر رەخنەی لێ بگرین تا كەمێك بەهێز ببێت بەرانبەر یەكێتیی و پارتیی كە ٢٠ ساڵ بوو گۆڕەپانی سیاسییان داگیركردبوو و هیچ هیوایەك نەبوو كە ئەو دوو هێزە ببنە دوو هێزی دیموكراتخواز و حوكمڕانیی چاك پێشبخەن. كاروان كاكەسور بەپێچەوانەوە گوتی ”نا، پێویستە ئەگەر زیاتر رەخنەی ئۆپۆزسیۆن نەكەین، لای كەم بە ئەندازەی هێزە حوكمڕانەكان رەخنەیان بكەین ئەگەرنا ئۆپۆزسیۆن بە ئاراستەی ئەو هێزانە دەڕوات كە چەندین ساڵە رەخنەیان لێ دەگرین.”


من هەڵە بووم، تێڕوانینەكانی كاروان كاكەسور بەجێبوون، سەرەڕای بەهێزیی پاساوەكانی من و نوسەر و رۆژنامەنوسانی تریش. لەگەڵ ئەوەشدا، رەخنەی من و نوسەران و رۆژنامەنوسان لە بزوتنەوەكە زوو دەستیپێكرد، بەڵام رەخنەكردنی بزوتنەوەكە دادی ئەو بزوتنەوەیەی نەدا، چونكە لە بنەڕەتەوە كاراكتەرەكانی ئامانجی دیكەیان هەبوو. لەوانەشە درەنگ بزوتنەوەكە بەجددیی رەخنەكرابێت.

سیاسەت گەمەیەك نییە تەنها چوار ساڵ لە هەڵبژاردنەكاندا دووبارە ببێتەوە. هەرگیزیش سیاسەت تەنها هەڵبژاردن و دروستكردنی حیزب و بزوتنەوەی سیاسیی نییە. دروستبوونی هەر حیزبێكی سیاسییش بێ هەبوونی پڕۆژەیەكی بەدیلی درێژ-مەودا و خاوەن فیكر و پۆڵسیی و ستراتیژ، لەوانەیە بتوانێت چەند كورسییەك لە هەڵبژاردنێك بباتەوە، یان تەنانەت هەڵبژاردنیش بباتەوە، بەڵام ناتوانێت گۆڕانكارییەكی ریشەیی لە سیستەمی سیاسیی و ئیداریی و ئابووریی دروستبكات. ئەگەر زوو ئامانجت لە سیاسەت بردنەوە بێ لە هاوڕێیانی پێشوو و نەیارانی ئێستا و رابردووت، بردنەوەش لات تەنها بردنەوەی ژمارەی ئەو كورسییانە بێت كە لە هەڵبژاردندا بۆ پارلەمان دیاریكراون، لەوانەیە بیانبەیتەوە، بەڵام داهاتوو دەدۆڕێنیت.


نەوشیروان مستەفا كە بزوتنەوەكەی دامەزراند، بزوتنەوەیەكی دامەزراند كە ئامانجی دەستكەوتی خێرا بێ، بتوانێت بە دۆست و نەیارانی رابردووی بڵێت كە ئەو چۆن سەركردەیەكی باڵای شۆڕش بووە، ئاواش سەركردەیەكی باڵای سیاسەتە. بێگومان جەماوەریش هەمیشە دەیەوێت بەرهەمی پڕۆژەیەكی سیاسیی زوو ببینێت، بەڵام ئەوە عەقڵی سیاسیی سەركردەكانی پشت بزوتنەوەكە و فەلسەفەی سیاسیی بزوتنەوەكەیە كە وا دەكات باڵانسێك دروستبكات لەنێوان ویستی خەڵك بۆ بینینی ئەنجامەكانی هەوڵەكانیان و ویستی درێژخایەنی بزوتنەوەكە بۆ بەدەستهێنانی گۆڕانكارییەكی گشتگیر. نە نەوشیروان مستەفا توانی ستراتیژێكی درێژمەودا بۆ بزوتنەوەكە دابڕێژێت، نە بزوتنەوەكەش توانی تەنانەت لەسەر ئەو بنەڕەتانەش بەردەوام بێت كە بزوتنەوەكەی لەسەر بنیاتنرا. لە پڕۆسەی سیاسییدا دەتوانی بدۆڕێیت، بەڵام هەرگیز نابێت جەماوەر بدۆڕێنیت. ئەوەی گۆڕانی دروستكرد، ناڕەزایەتییە كەڵەكەبووەكانی خەڵك بوون، كەچی لە بزوتنەوەكەدا، ناڕەزایەتییەكان فرۆشران بەوانەی كە هۆكاری ناڕەزایەتیی خەڵك بوون. دۆڕانی جەماوەر دۆڕانی كۆی یارییەكەیە.

دۆڕان، نەبردنەوەی هەڵبژاردن نییە، تەنانەت نەبردنەوەی كورسیی زیاتریش نییە لەدوای ئەوەی لە هەڵبژاردنێك باش دەبیت و دوواتر خراپ. دۆڕان لە سیاسەتدا بریتییە لە وازهێنان لەو مەبدەئانەی حیزبێك یان بزوتنەوەیەكی سیاسیی لەسەری دامەزراوە و نوێنەكردنەوەی بزوتنەوە و حیزبەكەیە. یەكێتیی و پارتیی ئەو رۆژە دۆڕان كە نەیانتوانی عەقڵییەتی چەكداریی و میلیشیایی و فیوداڵیی و دەستەڵاتخوازیی و تۆتالیتێری خۆیان بگۆڕن بە عەقڵییەتێكی دیموكراتیك تا “شۆرش” لە بزوتنەوەیەكی چەكداریی یاخیبوونەوە بگۆڕن بە رەوتێكی دیموكراتیكی نیشتیمانسازیی و حوكمڕانیی چاك. گۆڕان لە خۆیەوە دەستیپێنەكرد، لە پارتیی و یەكێتییەوە دەستیپێكرد. راستە بۆ هەڵبژاردن پێویست بوو یەكێتیی و پارتیی هەڵبووەشێنرێنەوە، بەڵام ناكرێت دووای چوار ساڵ، دووای هەشت ساڵ، هەمان كەس و هەمان دوونیابینیی و هەمان سیاسەت و هەمان كاركردن بزوتنەوەكە رابكێشێت. دۆڕان تەسلیمبوونە بەو نەیارە سیاسییانەی كە لەدژیان دروستبوویت. دۆڕان پشتكردنە جەماوەر و روكردنە دەستەڵاتە تەنها لەپێناو دەستەڵات و قازانجەكانی، كە بێگومان بە گەندەڵیی دەستپێدەكات و بە توانەوە كۆتایی دێت. دۆڕان سازشكردنە لەسەر كۆی باوەڕ و دوونیابینییەكان و بەجێهێشتنی جەماوەر و رووكردنە كۆشكەكانی سوڵتانەكانە. دۆڕانی هەرە گەورە تەسلیمكردنی ناڕەزایەتیی گەلە بە فەرمانڕەوا نادیموكرات و گەندەڵەكان.


بەهای گۆڕان لە سیاسەتی كوردییدا، لەوەدا بوو بزوتنەوەیەكی ناڕازیی بوو، ئۆپۆزسیۆنێكی سیاسیی بوو. ئەگەریش ئەو بزوتنەوەیە ناتوانێت ویست و ئامانج و ستراتیژەكانی لەناو حكومەتدا جێبەجێ ببن، پێویستە هەر بە بزوتنەوەیەكی ناڕازیی و ئۆپۆزسیۆنێكی سیاسیی بمێنێتەوە. خۆ ئەگەریش بچێتە ناو حكومەتەوە، دەبێت تا ئەو كاتە بێت كە دەزانێت گۆڕانكاریی ریشەیی دەكرێت نەك چەند پۆستی سیاسیی لەناو حكومەتدا پێدەدرێت. خەڵكیش متمانەی پێبەخشیبوو، بۆئەوەی نوێنەرایەتیی ناڕەزایەتییەكان بكات. بۆ خودی هەردوو هێزی فەرمانڕەواش، بەهای گۆڕان و ترس لە گۆڕان لەوەدا نەبوو كێن و چی دەڵێن و چۆن سیاسەت دەكەن، لەوەدا بوو كە گۆڕان پشتئەستورە بە ناڕەزایەتیی گەل. ئەو ناڕەزایەتییە هەمو دەستەڵاتێكی نادیموكراتیك و گەندەڵ لێی دەترسێ. فەرمانڕەوایەتیی هەر وڵات و حكومەتێك تا تواندنەوەی ئەو ناڕەزایەتییانە، هەموو ئامراز و میكانیزمێك بەكاردێنێت بۆ كوشتنی. دەستەڵاتدارێتیی یەكێتیی و پارتیی نەیدەتوانی سەركەوتوو بێ بەسەر ناڕەزایەتیی گەلدا ئەگەر خودی گۆڕان تەسلیمی نەكردبووایە.


لەوانەیە دەربڕینێكی قورس بێ، هەندێك بە ناڕەواشی دابنێن، بەڵام دووای یازدە ساڵ لە دروستبوونی گۆڕان، بەڵام وەك چۆن دوای سی ساڵی یەكێتیی و پارتیی گەورەترین مەترسیین لەسەر حوكمڕانیی چاك و دیموكراتیك، ئاواش گۆڕان بووەتە گەورەترین مەترسیی لەسەر بزوتنەوەی ناڕەزایەتیی و كۆمەڵگەی مەدەنیی و تەنانەت میدیای ئازادیش لە هەرێمی كوردستاندا. نە پارتی و نە یەكێتی هەرگیز بە خەیاڵیاندا نەدەهات رۆژێك شەقامی ناڕازیی هەرێمی كوردستان بەو بێدەنگییە ببینن، پارلەمان ببێتە ئەو دۆڵەی كوند تێیدا دەخوێنێ و میدیاكان بەتەواوی كۆنترۆڵكراون و مزگەوت و تەكیە و تەنانەت كڵێساكانیش لە خزمەتی دەستەڵاتی سیاسیی دان.


ئەو بزوتنەوەیە لەسەر بنەمایەكی فیكریی جێگیر و قووڵ دانەمەزرا، ئایدیۆلۆژیایەكی قوڵی رون و ئاشكرای نەبوو، ئێستاش نییەتی. كەوتە داوی هەندێك كەسەوە كە گوایە ئەمڕۆ لە دوونیا حیزبی سیاسیی ئایدیۆلۆژیای و هیچ هێڵێكی سیاسیی رونیان نییە. گۆڕانیان وا رێكخست و داڕشت كە بزوتنەوەیەكە داواكاریی چاكسازیی هەن، نەك دوونیابینییەكی سیاسی بۆ گۆڕانی سەرلەبەری حكومڕانیی و سیستەمی سیاسیی و ئابووریی كوردستان. ئەو حیزبانەی بێ ئایدیۆلۆژیان، بێ هێڵێكی فیكری سیاسیین، بزوتنەوەی پۆپیولیستین، مژدەی گەورە دەدەن و ناتوانن بەجێیانبگەیەنن، بەتایبەت لە وڵاتێكدا كە خۆی ژێرخانی ئابووریی و سیاسیی لاوازە و دیموكراسییەكەی تازەلەداییكبووە. زوو دەردەكەون و زوو دەڕۆن. كۆمەڵگا بەگشتی خۆپارێزە، ئاسان تەسلیمی دیدی نوێ نابێت، كەچی كۆمەڵگای كوردیی زۆر بەفراوانیی و بەگەورەیی پێشوازیی لە بزوتنەوەی گۆڕان كرد، بەڵام چونكە بزوتنەوەی گۆڕان تەركیزی لەسەر پرسە رۆژانەیییەكان بوون نەك ستراتیجییەكان، نەیتوانی بەردەوامیی بە گەشەكردنی سیاسیی خۆی بدات. پرسە رۆژانەیییەكان هەر رۆژ قوڵتر و زۆرتر دەبوونەوە، گۆڕانیش هەر رۆژ بچوكتر. گۆڕان بە رادەیەك بووە حیزبی پرسە رۆژانەیییەكان و سۆشیەڵ میدیا، لە پرسە گەورەكاندا هیچی نەبوو بۆ گوتن جگە لەوەی بەدووای یەكێتیی و پارتیی بكەوێت. گۆڕان هەرگیز لە بەغداد جیاواز نەبووە، بە ئێستاشەوە. گۆڕان نە لە ریفراندۆم و نە لە دووای ریفراندۆم، زیادەیەكی نەبوو، تەنانەت هێزێكی زۆر ترسنۆك و مەترسییداریش بوو چونكە جەماوەرەكەی لە چاوەڕوانییدا بەجێهێشت و رێینەدا لە دیدی ئەوانیدیەوە سودببینن. ئەمە خەڵكی هێندەی تر بێهیوا كرد لەو بزوتنەوەیە. گۆڕان پرسە ستراتجییەكانی تەنها بۆ ناچاركردنی یەكێتیی و پارتیی بەكاردەهێنا تا هەم دانوستانی لەگەڵ بكەن، هەمو حیسابی بۆ بكەن، هەمیش خەڵكی پێ تەیار و هانبدا دژیان. پرسی دەستور و قانونی خۆپیشاندان و نەوت و پێشمەرگە و سیستەمی سەرۆكایەتیی و پەیوەندییە هەرێمیی و ناودەوڵەتییەكان و چاكسازیی ریشەیی، پرسی ستراتیجیی بوون، كەچی گۆڕان هەمویانی وەلانا تەنها بۆ ئەوەی پارتیی لێ رازیبێت.


ئەگەر ئەو بزوتنەوەیە فیكری هەبووایە، لەسەر ئایدیۆلۆجیایەكی پتەو و هێڵێكی سیاسیی رون و رەوان بووایە، نە كەسەكانی دەبوونە پارتیی، نە بزوتنەوەكە تەسلیمی كوڕەكانی نەوشیروان مستەفا دەكرا. ئەوەی نەوشیروان مستەفا كردی كە بزوتنەوەكەی تەسلیمی كوڕەكانی كرد، نیشانیدەدا ئەو بزوتنەوەیە خاوەنی هیچ ستراتیژێكی دوور نەبوو، هەر بۆیە یەكێتیی و پارتییش زوو دەیانتوانی بە رێككەوتنی درۆیینە، وەك ئەو رێككەوتنەی ئێستا گۆڕان لە حكومەتدا كردوویەتی و بوونەتە فەرمانبەری مەسرور بارزانیی، گۆڕان مڕاوەغە بكەن. گۆڕان بەدووای دەنگەوە بوو، هەر كە دەنگیشی لەدەستدا، هیوای لەدەستدا. گۆڕان نەدەكرا تەنها بەدووای دەنگەوە بێ. گۆڕان تا ئەمڕۆش یەكلانەبۆتەوە چ سیستەمێكی ژیانی سیاسیی، ئابووریی و كۆمەڵایەتیی دەوێ. كاریگەرترین وەزارەت لە دوو حكومەتدا بەخشرایە گۆڕان، كەچی گۆڕان تەنها گلەیی هەیە. تەواوی ستراتیژی گۆڕانیش بۆ ئابووریی و دارایی كوردستان ئەوەیە كەی ئێن ئێن بتوانێت پێدانی موچە بە هەواڵی بەپەلە لە كەناڵەكەی بڵاوبكاتەوە. ئەو بزوتنەوەیە رەوتێكی پۆپیولیستانەی هەبوو، بەڵام لەو رۆژگاردا پۆپیولیزم پێویست بوو، بەڵام ئەو پۆپیولیزمە نەكرا ببێتە پڕۆژەیەكی جێگیر.

گۆڕان چیی جیاواز بوو لەگەڵ پارتی و یەكێتی؟

گۆڕان نەیتوانی مۆدێلێكی حیزبی سیاسیی دروستبكات، خۆ ئەگەر لەڕوی شكڵیشەوە جیاواز بووبێت، لە جێبەجێكردن و ژیانی سیاسییدا، هەمان میكانیزم و هەمان جێبەجێكردن بوو. گۆڕان لە یەك كاتدا شێخ و مەلا و روناكبیر و پێشمەرگەی كۆن و بازرگان و گەنج و چەپ و فێمینیست و پاتریارك و ئیخوانیی و سۆفیی پێكەوە كۆكردنەوە، بەڵام تەنها نەخشەی بۆ كۆكردنەوەیان هەبوو نەك فیكر و ستراتیژێك دابڕێژێت هەموان پێكەوە كاربكەن و هەموان ئەو سیاسەتە پێشبخەن كە وردە-وردە كۆی پڕۆژەكە لە خزمەتی هەموان و گەل بێ. ئەزمونی زۆر هەن لە دوونیا؛ لە حیزبی دیموكراتیی ئەمریكییەوە بۆ هەدەپە لە توركیا كە هاوبەشییەكان چەندان رەوت و دوونیابینیی جیاواز لە یەك كۆدەكاتەوە، بەڵام هەموان لەناو بزوتنەوە و حیزبەكەدا خۆیان دەبیننەوە بێئەوەی ئەویان ببێتە مەترسیی بۆ سەر ئەمیان، یان ئەویان ئەم بتێوێنێتەوە یان پەراوێزبخات، بەڵام هەموانیش لەسەر ستراتیژە سیاسییەكە رێكدەكەون و بڕوایان بە پرسەكان هەیە. ناڕەزایەتییەكان دەبنە پڕۆژە نەك تەنها لە “تۆپخانەكەوە قەسف بكەیت.”


گۆڕان تەنانەت لە كاركردن لە بەغدادیش نەیتوانی بەتەواوی جیاوازییەوە لەگەڵ پارتیی و یەكێتیی كاربكات. ئەوەی گۆڕانی بەتەواوی جیادەكردەوە لە پارتیی، داواكردن بووە بۆ سیستەمێكی پارلەمانیی، كەچی دوواتر خۆیان قبووڵیان كرد و ئەو جیاوازییەشیان كوشت. بۆ نمونە، گۆڕان ئێستا لەناو حكومەتدایە، بەڵام لەسەر كارنامەی پارتیی كاردەكات نەك كارنامەیەكی هاوبەش.

ئێستا ئەگەر بپرسین گۆڕان ئێستا لە پارلەمانی كوردستان و حكومەتی هەرێمی كوردستاندا چی لە یەكێتیی و پارتیی جیادەكاتەوە؟ بەدڵنیایی شتێك نییە جێی ئاماژەدان بێت، هەربۆیەشە گۆڕان نەك هەر تەنها دەیەوێت لەگەڵ پارتیی لە حكومەتدا بمێنێتەوە، بەڵكو هەمو هەوڵێكیش دەدات مەسرور بارزانیی لێیان توڕە نەبێت.

كە گۆڕان نەیتوانی یەكێتیی و پارتیی تێبپەڕێنن، یەكێتیی و پارتیی بەهێزتر بوون، ناڕازییانی ناو پارتیی و یەكێتیی بۆ ماوەیەكی دوورتر بێدەنگ بوون چونكە بە بیانوی گۆڕانبوون، یەكێتیی و پارتیی هەرچی دەنگی ناڕازاییە كوشتیان لە ناوخۆیاندا، لە دەرەوەی خۆشیاندا، گۆڕانیان كوشت، لە كوشتنی گۆڕاندا پارتیی و یەكێتیی ناڕازیی دەرەوەی حیزبەكەیان ئامانج بوو نەك خودی گۆڕان. گۆڕان بە رادەیەكی گەورە نەك هەر جێی ناڕازییانی دەرەوەی یەكێتیی و پارتیی بوو، تەنانەت جێی هوای ناڕازییەكانی ناو یەكێتیی و پارتییش بوو، هی حیزبە ئیسلامییەكانیش، بەڵام دووای ئەوەی گۆڕان بەتەواوی شكستیهێنا لە بەردەوامییدان بەوەی بۆی دامەزرابوو، یان بانگەشەی بۆ دەكرد، ناڕەزایەتییەكانی ناو پارتیی و یەكێتیی و حیزبەكانی دیش بچوكتر بوونەوە. كۆمەڵگای كوردستان دوای بیست ساڵ توڕەیی و گومانكردن و پرسیاركردن لە حوكمڕانیی یەكێتیی و پارتیی، متمانەی بەخشییە بزوتنەوەیەكی سیاسیی چاكسازیخواز، بە فرۆشتنی ناڕەزایەتییەكانی خەڵك بە یەكێتیی و پارتیی لەلایەن گۆڕانەوە، رەوتی ناڕەزایەتیی توشی تڕاومایەك بووە هێشتا نەیتوانیوە بەتەواوی هەڵسێتەوە. هەستانەوە لەو تڕاومایە پەیوەستە بەوەی كە خەڵك چیتر بزوتنەوەی گۆڕان وەك بزوتنەوەیەكی ناڕەزایەتیی و ئۆپۆزسیۆنی سیاسیی و بەدیلی سیاسیی نەبینێت، بەڵكو پێویستە بەتەواوی وەك بزوتنەوەیەكی ناو سیستەم ببینرێت، وەك حیزبێكی سیاسیی كە بەرژەوەندییەكانی ئەو كڵاسە سیاسییە دەپارێزێك كە لە دەوری كوڕەكانی نەوشیروان مستەفا كۆبوونەتەوە و ئەوان بڕیاردەدەن كێ لە گردی زەرگەتە ژوری هەبێت و كێ بۆی نەبێ سەردانی گردەكە بكا و كێ لە پارلەمان دەبێ و كێ لە حكومەت دەبێت.

مستەفای سەید قادر كە وەزیری پێشمەرگە بوو، بڕیار بوو حیزبایەتیی نەهێڵێ كەچی لە دامەزراندنی ١١ هەزار پێشمەرگەدا، نۆ هەزاریان پارتیی بوون و بە ناوی بێلایەنەوە دایمەزراندن. كادیرەكانی گۆڕان بوونە وەزیرەكانی گۆڕان لەناو حكومەتدا كە هەڵبژاردەی خودی نەوشیروان مستەفا بوون، كەچی ئەو وەزیرانە بەشێكیان بوونە پارتیی، بەشێكیان گەندەڵ بوون. دەیان دۆكیومێنت لەسەر هەندێ بەرپرسی باڵای گۆڕان لەناو حكومەت كۆكرانەوە، بەڵام خودی مەسعود بارزانی قبووڵی نەكرد ئەوكات دۆكیومێنتەكان بجوڵێنرێن. نەجوڵاندنی دۆكیومێنتەكان لەلایەن مەسعود بارزانییەوە پەیوەست بوو بەوەی ئەو بەرپرسانەی گۆڕان وێنەیەكی جوانیان بەخشیبووە حكومەت، بەتایبەت وەزارەتی پێشمەرگە، لەلایەن كۆمەڵەگای نێودەوڵەتییەوە؛ بۆ نمونە وەزیری پێشمەرگە كە ئێستا جێگری سەرۆكی هەرێمە كۆنە پێشمەرگە بوو، و گۆڕانیش بوو. ئەو سەرمایە شۆڕشگێڕییە و ریفۆرمخوازییەی مستەفای سەید قادر، وایكردبوو هاوپەیمانێتیی نێودەوڵەتیی بۆ تێكشكاندنی داعش بەهایەكی دی بداتە وەزارەتی پێشمەرگە. لەولاشەوە، پارتیی و یەكێتیی باشتر جێ پێی میلیشیاییی خۆیان دەچەسپاند. كەچی گۆڕان پێیوابوو چاكسازیی دەكرێت، بێئاگا لەوەی تەنها هێزێك بوو بەكاردەهێنرا.


كە شنگال لەلایەن پێشمەرگەكانی پارتییەوە بەجێهێلدرا و داعش جینۆسایدی ئەنجامدا، پارلەمان بە سەرۆكایەتیی د یوسف محەمەد نەیتوانی لیژنەیەك پێكبێنێت بە بیانوی ئەوەی مەسعود بارزانی خۆی لیژنەی پێكهێناوە، لە كاتێكدا مەسعود بارزانی خۆی سەرۆكی هێزە چەكدارەكان بوو، چۆن دەبێ پێكهێنانی لیژنە و لێكۆڵینەوە لە كارەساتێكی وا گەورە بۆ خودی ئەو كەسە بەجێبهێڵدرێ كە پێویستە لێی بپرسرێتەوە. (باسكردن لەو دوو نمونەیە تەنها لەبەرئەوەیە بەڕێوەبردنی وەزارەتی پێشمەرگە و سەرۆكایەتیی پارلەمان لەلایەن گۆڕانەوە بە دوو باشترین ئەزمونی گۆڕان دادەنرێن لەناو حكومەت و پارلەماندا، تا ئێستاش). ئەو دوو نمونەیە، دوو نمونەن كە كەمتر لە میدیا باسكراون، من لێرە ناگەڕێمەوە سەر دەیان روداوو بۆ ئەوەی نیشانیبدەم گۆڕان لەناو حكومەت و پارلەماندا، نەیانتوانی بانگەشەكانی گۆڕانكاریی ریشەیی بەردەوامیی پێبدەن.


لەگەڵ ئەوەیدا دەیان هۆكار ریزدەكرێن بۆ ئەوەی بۆچی گۆڕان بە ئەمڕۆ گەییشت، هۆكاری سیاسیی، نێودەوڵەتیی، عەسكەریی، دارایی و رێكخراوەیی، بەڵام هیچ لەو هۆكارانە لەوە ناگۆڕێت كە تەنها خودی گۆڕان و سەركردەكانی گۆڕان، بە خودی رەحمەتیی نەوشیروان مستەفاشەوە، لەو شكستە تراژیدییە بەرپرسیارن. ئێستا گۆڕان بووەتە بارێكی قوڕس بەسەر پڕۆسەی سیاسیی هەرێمی كوردستاندا. بۆشایییەكی گەورەی سیاسیی تەنها لەڕوی شكڵییەوە پڕكردۆتەوە بێ ئەوەی بتوانێت لە ئاست ئەو چاوەڕوانییانەی خەڵك بێت.

گۆڕان هیوای گەورەی دروستكرد، هەر خۆشی هیواكانی كوشت.


*ئەم شیكاریە لە كوردستان تایمز وەرگیراوە

1133 جار بینراوە

زیاتر

copyright 2019, All Rights Reserved Developed by TeraTarget for Digital Intelligence and IT Innovations