مەترسی تەقینەوەی دۆخی عێراق

20.07.2020

لڤین: شیکاری سەنگەر سەیدقادر

پایەكانی دەوڵەتی قوڵ لە عێراق بریتین لە( مالیكی- عامری- سەدر- فالح فەیاز- قەیس خەزعەلەی) كە لەناو جومگە هەستیارەكانی عێراقدان و كازمی ناكرێت هەموو پایەكان لە یەك كاتدا بڕوخێنت چونكە عێراق دادەڕمێت

بەڵام ئەوەی دەتوانێت ئەم پایانە بێهێز بكات كازمی نیە بەتەنها بەڵكو علی سیستانیە كە ئێستا بەهۆی نەخۆشیی دڵ و شەكرەوە لە هەر چركە و ساتێكدا دەكرێت خۆری ئاوابێت

•- ئەگەر سیستانی بمرێت چی روودەدات..؟

مردنی سیستانی لەم دۆخەی ئێستای عێراقدا كارەساتێكی گەورەتر لە داعش دەخوڵقێنێت و عێراق دەكەوێتە ئاژاوەی سیاسی و پیكادانی چەكداری ناوخۆییەوە كە ناوچەكە دەكات بە گۆڕەپانی شەڕ و پێكادان

چونكە ئەوەی ئێستا باڵانسی هێزی ڕاگرتووە و كۆنترۆڵی تەقینەوەی لە دەستدایە سیستانییە ، لەلایەكی دیكەوە سیستانی دیواری بەرگرییە لەوەی ئێران سیستەمی ویلایەتی فەقهی خۆی لە عێراق بسەپێنت

جگە لەوەی دەیان مەرجەعی سیاسی و ئاینی شیعە چاویان لە كورسی سیستانیە لە دیارترین موقتەدا سەدرە چونكە كورسی سیستانی كورسی حوكمڕانی ڕاستەقینەی عێراقە

•- كازمی دەبێت چی بكات

لە ئێستادا سیاسەتی نەرم باشترین چارەسەرە تا ئەوكاتەی پایەی سوپا و هەواڵگری و دژەتیرۆر و دەسەڵاتی دادوەری دەبن بە پایەی ڕاگری عێراق و ئەوكات ئەم هێزانە خۆیان هەڵدێن( جگەلە سەدر چونكە سەدر لێزانە و توانای خۆگونجاندنی لەگەڵ باروودۆخی جیاواز دا هەیە و پیگەی جەماوەری عەقائیدیە و زۆر قوڵە)

هەر بۆیە ئەمەریكا و كازمی لەوە تێگەشتوون كە پێویستە دەست و برد بكرێت لە سەقامگیركردن و بە دامەزراوەی كردنی عێراق پێش مەرگی سیستانی، بەڵام سیستانی ڕۆژی ٢٠٢٠/٧/٢ لەنامەیەكدا بۆ كازمی هۆشداری داوە لەوەی نابێت ڕێگەبدات خوێن بڕێژرێت و دەبێت هێمنانە عێراق بگەیەنێتە كەناری ئارامی و هاوسەنگی لەنێوان نفوزی ئێران. و ئەمەریكا ڕابگرێت چونكە گۆڕینی دۆخەكە ئارامی و پشوو درێژی پێوستە

•-مەترسییە ناوخۆییەكانی بەردەم كازمی ..؟

لەسەر هەمان پرس ڕۆژی ٢٠٢٠/٧/٣ ناوەندی لێكۆڵینەوەی جیمس تاون و ناوەندی لێكۆڵینەوەی ئیمارات ڕاپۆرتێكیان بۆ وەزارەتی دەرەوەی ئەمەریكا ئامادەكردووە لە سەر جوڵەكانی دەوڵەتی قوڵی عێراق بۆ لادانی كازمی، كە بۆ ئەمەش دەیانەوێت چەكی میلیشیاكان بۆ دژایەتی كازمی و ئەمەریكا بەكار بهێنن هاوشیوەی ساڵانی ٢٠٠٤-٢٠٠٧بەڵام لە چوار چێوەیەكی سنوردار تردا

لە ڕاپۆرتەكەدا ئاماژە بە مەترسی فشار كردن لەكازمی كراوە بۆ خێراكردنی گۆڕانكارییەكان چونكە ئەمە بەریەكەوتنی ڕاستەوخۆی كازمی و میلیشیا ئیرانییەكانی لێدەكەوێتەوە و دۆخی عێراق ئاڵۆز دەكات و ئێران جارێكی تر كۆنترۆڵی ناوەندی بڕیاڕ و دەسەڵاتی عێراق دەكات

بۆیە پیشنیار كراوە كازمی دەستكراوە و سەرپشك بكرێت و لە ڕێگایی ڕاوێژكارە تایبەتەكانەوە ڕەنگڕێژی هەنگاوەكانی بكرێت و سیاسەتی( داخوران و بنكۆڵكردن لە بری داڕمان) بگرێتە بەر، تاكتیكی شڵەژان و شۆكی بەردەوام و چەكی كاریزمای ڕاگەیاندن بەكار بهێنێت بەجۆرێك هەفتانە گۆرانكاری بكرێت بێ وەستان و چەكی ترساندنی ڕاگەیاندن بەكار بهینێت

لە هەمان كاتدا هەنگاو و بڕیارەكان تاقیبكرێنەوە پێش ڕاگەیاندنیان، واتە بۆ هەر هەنگاو گۆڕانكارییەك سەرەتا ڕای شەقام و كاردانەوەكان تاقی بكرێتەوە لە ڕێگای ئاشكرا كردنیەوە لە میدیاكانەوە، كە ئەمە وادەكات ئەگەر هەڵە هەبێت پێش بڕیاردان ڕاست بكرێتەوە و توڕەی نەیاران و دژبەرانی بڕیارەكان دابەش و سارد دەكاتەوە، لە قۆناغی دووەمدا كە ڕاگەیەنرا كاردانەوە و دژایەیەتیەكان كەمتر دەبێتەوە چونكە بووە بە زانیاریەكی دووبارە

•- هێزە نەرم و بێ كاریگەرییەكان ...

هەرچی عەلاوی و حەكیم و عەبادی و هێزە سونەكانە ئەمانە بە هێزی نەرمی عێراق دەناسرێن كە با لە كوێوە هات لەوێوە شەن دەكەن و پیگەی قوڵیان لەناو دامەزراوەكاندا نیە و زیاتر بۆ قەرەباڵغ كردنن و هیچی تر

میلیشیاكانی حەشدیش جگە لە عەسائیب ئەوانی دیكە بوونیان پەیوەستە بە هێزی ئێرانەوە لە عێراق و زیاتر هێزی هەڵچوون و كارتی فشاری كاتین، لە ئەگەری بنیاتنانی پایەكانی عێراقدا دەپوكێنەوە، چونكە ئەم هیزانە بوونیان پەیوەستە بە بوونی ئاڵۆزییەوە لە عێراق

- هەرچی حیزبە كوردیەكانە هێزێكی داڕووخا و لاوازن لەناوخۆ و لەسەر ئاستی ناوچەكە كەنقر خراون و توڕەیی زۆر لە شەقامدا هەیە ئەمەش وایكردووە پشتیوانی كازمی بن و ئەم هێزانە توانایی ڕێگریان نیە لە كازمی تەنها دەتوانن بچنە بەرەی دەوڵەتی قوڵی دژەكازمیەوە، كە چاوەڕێ ناكرێت ئەم هەنگاوەش بنێن چونكە لە سزای ئەمەریكا دەترسن

لە ئێستادا بەهەمان ستراتیژی پۆڵ بریمەری ساڵی ٢٠٠٣ ڕامكردنیان ئاسانە و دەكرێت لە ڕێگەی دەستكەوتی دارایی كاتییەوە ڕازیبكرێن، چونكە لە گۆڕانكارییەكان ئاگادارنین و پرۆژەی پەڕاوێزی p21 بژاردەی پیشنیار كراوە

دەرئەنجام:

١- هەنگاوەكانی لە دوو مانگی یەكەمی كازمی دروست بووە (P9)

٢- هەنگاوەكانی هەفتەی یەكەمی مانگی سێهەم بەپەلەبووە و كاردانەوەی خراپی هەبوو

٣- بەپێی هەڵسەنگاندنی زیاتر لە ١١٥ پەیج و ئەكاونتی سۆشیاڵ میدیا و وەرگرتنی ڕای ٣٥٠ كەسایەتی سیاسی و ڕۆشنبیر و چاودێری سیاسی لەسەدا ٨١% ئومێدیان بە چاكسازی كازمی هەبووە سەدا ١٤% دژی چاكسازیەكان بوون سەدا ٥% باوەڕیان بە چاكسازییەكان نەبووە

٤- نابێت كازمی دەست بە پورەی هەنگدا بكات و سەرەتا دەبێت بە دووكەڵی ترس گێژیان بكات ئەوكات شا كان بەئاسانی دەگیرێن)P34)

٥-بڕینی سەرچاوەی دارای میلیشیا ئێرانییەكان كاریگەری گەورەی دەبێت، لە دوای دەروازە سنورییەكان گرنگە بازگە ناوخۆییەكان بە تایبەت بازگەی پردی دیالە و عەبایچی و دەروازەی ڕۆژهەڵاتی بەغداد كۆنترۆڵ بكرێت چونكە لەساڵی ٢٠١٩رۆژانە ١٠٠ هەزار دۆلار داهاتی هەبووە بۆ عەسائیبی ئەهلی حەق و حیزبوڵا و سەرایایی خوراسانی

٦- ئەو میلیشیایانەی ئێستا مەترسی گەورەن بۆسەر كازمی و ئەمەریكا بریتین لە ( عەسائیب و نوجەبا- سید شوهەدا- سەرایای خوراسانی- حیزبوڵای عێراق-) كە نزیكەی ٤٥ هەزار چەكداریان هەیە و تەنها ١١ هەزاریان چەكدارن و لەخزمەتدان

٧- میلیشیاكانی ئیمام عەلی و بەدر هەڵوێستیان گۆڕاوە و ناچنە شەڕی ڕاستەوخۆوە و تەنها شەڕی ڕاگەیاندن دەكەن

٨- هاوكار ئەمەریكا و هاوپەیمانان لە ئۆپەراسیۆنی شەڕی عشدا لە دوو مانگی ڕابردوو پشتیوانی ئەمەریكا و هاوپەیمانانی لە شەقامی عێراقیدا بەهێزكردووە

٩- لە شەقامی كوردستاندا هاوسۆزییەكی زۆر بۆ چاكسازییەكانی كازمی هەیە و ئەمەش ئاسانكاری بۆ كازمی دەكات فشاری زیاتر بۆسەر حكومەت و حیزبە كوردییەكان بكات( ئەمە مەترسیە بۆسەر كوردستان-ڕای كەسییە)

١٠- ڕای گشتی لە هەرێمی كوردستان پێچەوانەی خواستی یەكێتی و پارتیە، لە كۆی ٢٤٠٠ ئاكت بەڕێژەی سەدا ٦٥% هاوسۆز و پشتیوانی پرۆژەكەی ئەمەریكان بۆ زیادكردنی دەسەڵاتی ناوەندی لە هەرێمی كوردستان

 

تێبینی: ئامادەکار بەرپرسی دیسكی عێراق و كوردستانی ناوەندی ئیمارات بۆ لێكۆڵینەوەی ستراتیژیە

1106 جار بینراوە

زیاتر

copyright 2019, All Rights Reserved Developed by TeraTarget for Digital Intelligence and IT Innovations