سەرۆكی فراكسیۆنی گۆڕان: پێویستە گۆڕان دوا قسە لەگەڵ دەسەڵات بكات

15.07.2020

لڤین: 
سەرۆكی فركسیۆنی گۆڕان نامەیەكی كراوە ئاراستەی سەرۆكایەتی حكومەتی هەرێم دەكات و دەڵێت فەساد و قەبارەی گەندەڵی لە خاڵە سنوریەكان نەك كەمی نەكردووە بەڵكو زیدی كردووە و داواش لە حزبەكەی دەكات دوا قسە لەگەڵ پارتی و یەكێتی بكات. 

عەلی حەمە ساڵح، لە نامەیەكی كراوەدا دەڵێت "ھەشت مانگ پێش ئێستا، لێكۆڵینەوەو بەدواداچونی وردمان كرد دەیان بەڵگەنامەمان ھێنا لە ئیبراھیم خەلیلەو فیشخابورەوە بۆ باشماخ، بە وردەكاری ئەوەی لەسەرجەم خاڵە سنوریەكان ڕودەدات خستمانە بەردەست بەڕێزتان، ئەوەبوو بەڵێن و بڕیاربوو چاكی بكەن، بەڵام تاوەكو ئەم ساتە زیادی كردوەو كەمی نەكردوە". 
ئاماژەی بەوە كردووە "حەجمی فەسادو گەندەڵی لە خاڵە سنوریەكان 150ملیۆن دۆلار زیاترە مانگانە" و دەڵێت 27 كۆمپانیا بە نایاسایی و گەندەڵی مانگانە دەیان ملیۆن دۆلار وەردەگرن و دەشڵێت قاچاغ لە دەروازەی باشماح مانگانە 25 ملیۆن دۆلارە.
ئەوەشی روونكردووەتەوە خاڵی سنوری لەگەڵ ڕۆژئاوا و سوریا بەتەواوی بەدەست كۆمپانیاوەیە لە بری حكومەت و مانگانە چەندین ملیۆن دۆلار داهاتیانەو دەشڵێت" بەفەرمی نوسینگەی قاچاخی لە بازاڕدا دانراوەو بە بارھەڵگرەكان دەڵێن: نیوەی بەھای گومرگی بدەو لەخەتی تایبەت داخڵی بكە، كۆدەكەشی ئەوەیە لە ھەموو بازگەكانی ئاسایش دەڵێن: باری تایبەیەتە". 
باس لەوە دەكات 85%ی هاوردەی جگەرە ھێزە ئەمنی و بەرپرس و كۆمپانیا دەسەڵاتدارەكان بە قاچاخ داخڵی دەكەن، گومرگی جگەرە نادرێت نیوی نرخەكەیەتی. 
ئەو باسی لەوەش كردووە كۆمپانیا هەیە بەبێ ئەوەی كارێك بكات كۆمپانیا هەیە دوو ملیۆن دۆلاری دەست دەكەوێت و "لە ھیچ خاڵێكی سنوری نیە بە كەمتر لە یازدە ڕێگا پارە لەخەڵك وەربگیرێت، ژمارەی كۆمپانیاكان كە سەرانە وەردەگرن لەم كابینەیە زیادی كرد". 
ئەو پێشیوایە ئەم كارە بە بڕیار چاكدەكرێت نەك بەلیژنە و دەشڵێت ڕەنگە ھەندێك بەڕێز بپرسن بڵێن: ئەركی گۆڕان لە حكومەت چیە؟ هەر خۆشی وەڵام دەداتەوە و دەڵێت هاوڕام. 
ئەو هیوادارە و بە پێویستیشی دەزانێت "بۆ ڕێگری لەم تاڵانیە گۆڕان دواقسە لەگەڵ دەسەڵات بكات، گۆڕان لە حكومەتدا بەشدارەو بەرپرسیاریەتی لەسەرەو ئەمە خراوەتە بەردەست وەزیرەكان و ڕایانگەیانداوە لە كۆبونەوە باسیان كردوە".

1042 جار بینراوە

زیاتر

copyright 2019, All Rights Reserved Developed by TeraTarget for Digital Intelligence and IT Innovations