وردەكاری رێككاری كردنەوەی سۆپەر ماركێت و نانەواخانەكان

06.04.2020

لڤین: 
قائیمقامیەتی سلێمانی لیستی نوێی رێنماییەكانی بۆ كردنەوەی نانەواخانە و سەمونخانەكان، ماركێتەكان، دەرمانخانەكان، كارگەكانی بەرهەمی شیرەمەنی، دوكانی فرۆشتنی گۆشت و كۆمپانیاكانی دابەشكاری بڵاوكردەوە.

بەگوێرەی ئەو رێنماییانەی بلاوی كردووەتەوە وردەكاریەكانی باس كردووە و چەندین رێكاری توندی تیادایە بۆبابەتی خۆپارێزی . 

رێنمایی نوێ بۆ كردنەوەی نانەواخانە و سەمونخانەكان:

بەمەبەستی توند كردنەوەی رێكارەكانی خۆپارێزی لە بڵاونەبونەوەی ڤایرۆسی كۆرۆنا، لیژنە هاوبەشەكانی قائیمقامییەتی سلێمانی بڕیاری نوێی سەبارەت بە نانەوا و سەمونخانەكان دەردەكات و هەرشوێنێكش پابەند نەبێت روبەڕوی رێكاری یاسایی توندی دەكاتەوە‌.

لیژنە هاوبەشەكانی قائیمقامیەتی سلێمانی كۆمەڵێك بڕیاری نوێی بۆ نانەوا و سەمونخانەكان دەركردوە كە مەبەسەت لێی توند كردنەوەی رێكارەكانی خۆپارێزییە لە ڤایرۆسی كۆرۆنا و پاراستنی سەلامەتی هاوڵاتیان، كە لەم خاڵانەی خوارەوەدا پێكهاتووە‌:

١- هەمو ئەوكەسانەی لە نانەوا و سەمونخانەكان كاردەكەن پێویستە پابەندی سەرجەم رێنماییەكانی تەندروستی بن و لەكاتی كاركردنیشدا (دەستكێش، دەمامك و كڵاو) بەكار بهێنن.

٢- ئەو كەسەی لە نانەوا و سەمونخانەكاندا كاری پارە وەرگرتن دەكات، نابێت هیچ بەركەوتنێكی لەگەڵ هەویر، نان و سەموندا هەبێت.

٣- پێویستە سەرجەم نانەوا و سەمونخانەكان زەرفی كاخەز بەكاربهێنن لەبری زەرفی نایلۆن.

٤- لەنانەواخانەكاندا نابێت بەهیچ جۆرێك سۆدە بەكار بهێنرێت.

٥- رۆژانە و بەرەدەوام شوێنەكە بە مادەی پاكژكردنەوە (تعقیم) خاوێنبكرێتەوە.

٦- بێجگە لەو كارمەندانەی لە نانەوا و سەمونخانەكان‌ كاردەكەن، نابێت هیچ كەسێك بچێتە شوێنی هەویر و شێلان و برژاندنی نان و سەمونەكان.

٧- كێشانی جگەرە لە نانەوا و فڕنی سەمونخانە قەدەغەیە.

٨. پێویستە ماوەی نێوان هەركەسێك بۆ كەسێكی تر لە 2 مەتر كەمتر نەبێت .

هەر شوێنێكیش پابەند نەبێت بە رێنماییەكانەوە شوێنەكە و خاوەنەكەشی روبەڕوی رێكاری یاسایی توند دەكرێتەوە.

رێنمایی تایبەت بەشێوازی كاركردنی ماركێتەكان:

١. كاتی كردنەوەی ماركێتەكان لە كاتژمێر (8)ی بەیانی بۆ (6)ی ئێوارە دەبێت، بەڕەچاوكردنی جێبەجێكردنی سەرجەم رێنمایەكانی خۆپاراستن و تەندروستی.

٢. پێویستە سەرجەم ماركێتەكان رۆژانە كاری پاكژكردنەوه ‌(تعقیم)ی ناو ماركێتەكە بكرێت.

٣. سەرجەم ماركێتەكان رەچاوی ئەم خاڵانەی خوارەوە بكەن:

أ‌- پێویستە سەرجەم كارمەندان و كرێكاران هەریەك لە دەستكێش و دەمامك بەكاربهێنن.

ب‌- دانانی بابەتەكانی پاكژكەرەوە (تعقیم) و دەستكێش بۆ كڕیاران، بەبێ بەكارهێنان رێگری بكرێت لە چونە ژورەوە.

ت‌- رێگری كردن لە دروستبونی قەرەباڵغی لەناو ماركێتەكاندا.

پ‌- پێویستە كڕیاران بەژمارەیەكی گونجاو بچنە ناو ماركێتەكانەوه، بەپێی روبەری گەورە و بچوكی شوێنەكە.

ج‌- پێویستە ماوەی نێوان هەركەسێك بۆ كەسێكی تر لە 2 مەتر كەمتر نەبێت.

ح‌- بەهەموو شێوەیەك بونی منداڵ لە نێو ماركێتەكان رێگە پێدراو نیە.

شێوازی كاركردن و كردنەوەی دەرمانخانەو كۆگاكانی دەرمان لە سلێمانی بەپێی ئەم مەرج و رێنماییانە رێگەبەكاركردنیان دەدرێت:

١. كردنەوەی سەرجەم دەرمانخانەكانی شاری سلێمانی بەپێی پێویستی گەڕەكەكان.

٢. كردنەوەی كۆگاكانی دەرمان تەنیا لە رۆژانی "دووشەممە و پێنج شەممە" و لەكاتژمێر (١) پاش نیوەڕۆ بۆ (٧) ئێوارە رێگەپێدراو دەبێت .

٣. پێویستە دەرمانخانە و كۆگاكانی دەرمان پابەندی سەرجەم رێكار و رێنماییەكانی تەندروستی و خۆپارێزی دەبن .

٤. گواستنەوەی دەرمان بۆ دەرمانخانەكان تەنیا لەرێگەی ئوتومبێلی ساردكەرەوە "بەراد" رێگەپێدراوە.

٥. ئەو دەرمانسازانەی كە لە دەرمانخانەكان كاردەكەن بەپێی چەند مەرج و رێنماییەك رێگە بە هاتوچۆ كردنیان دەدرێت.

٦. بۆ پابەندبون بە رێنماییە تەندروسییەكان، پێویستە سەرجەم دەرمانخانەكان ئەم خاڵانەی خوارەوە جێبەجێ بكەن:

أ‌- رێگری لە هاتنە ژورەوەی نەخۆش بكرێت بۆناو دەرمانخانە، لەڕێی كردنەوەی پەنجەرەیەكی بچوكەوە دەرمان و رێنماییەكانی بەكارهێنانی بە نەخۆش بدرێت.

ب‌- بەكارهێنانی مەرجەكانی خۆپارێزی (دەستكێش و دەمامك) و پاكردنەوەی سەرجەم كەلەوپەلەكانی ناو دەرمانخانە بەبەردەوامی.

ت‌- لەكاتی چاوەڕوانی وەرگرتنی دەرماندا رێنمایی نەخۆش بكرێت دور لە یەكتری بوەستن.

پ‌- لەكاتی وەرگرتنی رەچەتە و پارە و پێدانی دەرمان بەنەخۆش، دەستیان بە مادەی پاكژكردنەوە خاوێن بكەنەوە بۆئەوەی نەبن بە‌ سەرچاوەی بڵاوكردنەوەی ڤایرۆس و نەخۆشی.

ج‌- ئەو نەخۆشانەی گومانی توشبونیان بە ڤایرۆسی كۆرۆنا لێدەكرێت، چارەسەریان پێنەدرێت بەڵكو رێنماییان بكرێت سەردانی نەخۆشخانە بكات.

رێنمایی كردنەوەی كارگەكانی بەرهەمی شیرەمەنی:

١. تەنها رێگە دەدرێت بەو كارگانەی كە خاوەنی مۆڵەتی فەرمی لایەنە پەیوەندیدارەكانن.

٢. پێویستە بەرهەمەكانیان بە ئۆتۆمبێلی ساردكەرەوە بگوازرێتەوە.

٣. رۆژانە دوجار بەرهەمەكانیان بگوازنەوە بۆ ماركێت و شوێنەكان بەمجۆرە بەیانیان سەعات (7 بۆ 9) و دوانیوەڕوان لە سەعات (3 بۆ 5).

٤. هەمان رێكاری خۆپارێزی و تەندروستی لە ماركێت و دوكانی فرۆشتنی بەرهەمەكان رەچاوبكرێت لەلایەن ئەو كەسانەی لەوێ كاردەكەن بەكارهێنانی (دەستكێش، كەمامە، كڵاو و سەدرییە).

٥. رۆژانە سێجار (بەیانیان، نیوەڕوان و ئێواران) كاری پاكژكردنەوە (تعقیم) بكرێت بۆ كارگەكان و شوێنی فرۆشتنی بەرهەمەكان بە بەكارهێنانی دەرمانی (ڤێركۆن).

٦. جێبەجێكردنی سەرجەم رێنماییەكانی تەندروستی و ڤێتێرنەری كەبۆ پێدانی مۆڵەتی فەرمی لەكاتی كردنەوی كارگە و جێگاكانی فرۆشتنی بەرهەمەكان كاری پێكراوە.

٧. سەرپێچیكار روبەڕوی رێكاری یاسای دەكرێتەوە و رێگە نادرێت دوكانەكەی بكاتەوە.

رێنماییەكانی كردنەوەی دوكانی فرۆشتنی گۆشت:

١.  بەهیچ شێوەیەك رێگە بە سەربڕینی ئاژەڵ نادرێت لەناو شاری سلێمانی، تەنها لە كوشتارگەی سلێمانی نەبێت.

٢. تەنها دوكانی گۆشتفرۆشەكان لە گەڕەكەكاندا دەكرێته و لەناو بازاڕ و سەنتەری شاردا ناكرێتەوە‌.

٣. تەنها ئەو گۆشتفرۆشانە دەكرێنەوە خاوەنی مۆڵەتی تەندروستی و ڤێتێرنەرین.

٤.ئەو كەسانەی لە دوكانەكان كاردەكەن، پێویستە ناسنامەی تەندروستی هەبێت.

٥. پێویستە لە دوكانەكەدا، بەشێوەیەكی بەردەوام كارەبای تێدابێت و دیوارەكانی كاشی بێت و بەئاسانی خاوێن بكرێتەوە، جامخانە و ساردكەرەوەی هەبێت.

٦. نابێت گۆشت لەدەرەوەی جامخانە دابنرێت و هەوای بەربكەوێت.

٧. پێویستە ئەو كارمەندانەی لە دوكانی گۆشفرۆشەكان كاردەكەن، هەمو پێداویستیەكانی خۆپارێزی (دەستكێش، كەمامە، سەدرییە و كڵاو) بەكاربهێنن بۆیەكجار، واتە (دیسپۆزەبڵ)بێت.

٨. رۆژانە سێجار كاری پاكژكردنەوە (تعقیم) بكرێت بۆ دوكانەكان بە دەرمانی (ڤێركۆن) بەم جۆرە، بەیانیان كاتی كردنەوە، نیوەڕوان و ئێواران دوای داخستن.

٩. بەهیچ شێوەیەك كڕیار نابێت بچێتە دوكانی گۆشتفرۆشەكەوە، ئەویش بەدانانی بەربەستێك لەبەردەم دوكانەكەیدا.

١٠. كەسێكی تایبەت دابنرێت بۆ وەرگرتنی پارە و پێدانی گۆشت بە كڕیارەكان واتە نابێت ئەو كەسانەی كاری پارچەكردنی گۆشت دەكەن بەركەوتەی هەبێت لەگەڵ كڕیار.

١١. هیچ بەرهەمێكی گۆشتی فرێش لە ماوەی (72) سەعات زیاتر نەمێنێتەوه ئەویش بەڕەچاو كردنی سەرجەم رێنمایی و مەرجە تەندروستی و ڤێتێرنەریەكان.

١٢. بەرهەمی گۆشتی سەبڕدراو لە كوشتارگە شەوانە بە ئوتومبێلی ساردكەروە دەهێنرێت بۆ شاری سلێمانی رێگە بەهیچ ئوتومبێلێكی تر نادرێت كە گۆشت بگوازێتەوە.

١٣. سەرپێچیكار روبەڕوی رێكاری یاسای دەكرێتەوە و رێگە نادرێت دوكانەكەی بكاتەوە.

رێنمایی تایبەت بەشێوازی كاركردنی كۆمپانیاكانی دابەشكاری:

١.  جوڵەی دابەشكردنی بابەتەكانی خۆراك و پاكەرەوە بۆ ماركێتەكان لەرێگەی كۆمپانیاكانەوە تەنها لە كاتژمێر (8)ی بەیانی بۆ (1)ی پاشنیوەڕۆ دەبێت.

٢. رێگەپێدان بەپێی توانای كۆمپانیاكان و پشت بەستن بە زانیاری تۆماركراو لەلایەن لایەنە پەیوەندارە‌ حكومی و ناحكومییەكان و دیاریكردنی ژمارەی ئەو ئۆتۆمبێلانەی كە خۆراك و پاكەرەوە لە كۆگای كۆمپانیاكانەوە بۆ ماركێتەكان دەگوازنەوە.

٣. هەموو چالاكییە ئابووری و بازاڕگەری و دارایی و عەلوە و یەكەكانی نیشتەجێبون و سیتییەكان و كۆمپانیاكانی دابەشكاری و ماركێت و خزمەتگوزاری رۆژانە پێویستە لەلایەەن قائیمقامیەتی سلێمانی و (یەكە كارگێڕییەكانەوە) بەهاوبەشەی لەگەڵ بەڕێوەبەرایەتی چاودێری بازرگانی و بەڕێوەبەرایەتی ئاسایشی ئابوریدا، رێكدەخرێنەوه، بەمەرجێك پابەندی رێنماییە تەندروستی و كارگێڕی و ئارامییەكان بن.

ئەمەش لەكاتێكدایە، ئەمڕۆ، لیژنەی باڵای روبەڕوبوونەوەی كۆرۆنا لە هەرێم رایگەیاند، تاوەكو كاتژمێر ١٢ی ئەمشەو قەدەغەی هاتوچۆی گشتی درێژكراوەتەوە و دواتر بە رێكاری نوێوە ماركێت و نانەواخانە و بازاڕەكان دەكەنەوە.

1297 جار بینراوە

زیاتر

copyright 2019, All Rights Reserved Developed by TeraTarget for Digital Intelligence and IT Innovations