ئامانج رەحیم؛ سزای ئەو كەسانەی لە هەولێر پرسەیان دانا ئاشکرا دەکات

06.04.2020

لڤین: 
سكرتێری ئەنجومەنی وەزیرانی هەرێم لەبارەی ئەو هاوڵاتیانەی لە شاری هەولێر پرسەیان داناوە سزاكەیان بەند كردنە كە لە ماوەی 3 ساڵ زیاتر نەبێت.

ئامانج رەحیم، سكرتێری ئەنجومەنی وەزیران حكومەتی هەرێمی كوردستان رایگەیاند "ئەوانەی پرسەیان داناوە بە نابەرپرسیارانە و بێ گوێدانە بڕیارەكانی قەدەغەكردنی پرسە و بونەتە ھۆی توشبونی خەڵكێكی زۆر بەڤایرۆسی كۆرۆنا". 

ناوبراو رونیكردووەتەوە: ئەو كەسانە سەرەڕای ماڵوێرانی بۆ خۆیان و خێزان و منداڵ و كەسوكار و ھاوشاریەكانیان تاوانێكی گەورەیان ئەنجامداوە كە سزاكەی بەندكردنە، بە گوێرەی دوو ماددەی یاسایی.

ئەو ماددە یاساییە روندەكاتەوە  و دەڵێت "ماددەی 368 دەڵێت: ئەو كەسانەی بە ئەنقەست مەترسی دروستدەكەن لەسەر تەندروستی گشتی و بەهۆیانەوە نەخۆشیەكی مەترسیدار لەسەر ژیانی خەڵك بڵاودەكەنەوە، ئەوا سزا دەدرێن بە بەندكردن بۆ ماوەیەك لە سێ ساڵ زیاتر نەبێت، بەڵام ئەگەر ببنەهۆی مردنی كەسێك یان لەكاركەوتنی درێژخایانی ھەر بەشێكی جەستەی ئەوا سزاكەی توندتر دەكرێت". 

ئامانج رەحیم دەشڵێت ماددە یاساییەكە باس لەوەش دەكات "ئەگەر ئەو كردارانە بەئەنقەست نەبێت و ئەنجامدانی ئیھمالی و گوێپێنەدان بێت، ئەوا سزاكەی بەندكردن و غەرامەیە، بەڵام ئەگەر بەهۆی ئەو هەڵەی ئیھمالی و گوێپێنەدانەوە كە مەترسی لەسەر تەندروستی خەڵك دروستكردوە كەسێك بمرێت یان توشی لەكاركەوتنی درێژخایەنی ھەر بەشێكی جەستەی بێت ئەوە حوكمی بكوژ یان ئازاردەری بەھەڵەی بەسەردا دەسەپێندرێت".

9071 جار بینراوە

copyright 2019, All Rights Reserved Developed by TeraTarget for Digital Intelligence and IT Innovations