یەكێتی مامۆستایان پشتیوانی بۆ وەزارەتی پەروەردە راگەیاند

05.04.2020

لڤین: 
یەكێتی مامۆستایان پشتیوانی خۆی بۆ پلانی وەزارەتی پەروەدە راگەیاند و دەڵێت هیوادارین رێكاری پێویستی بگیرێتە بەر بۆ سەرخستنی پلانەكانی وەزارەتی پەروەردە. 

یەكێتی مامۆستایانی كوردستان دەربارەی ساڵی خوێندنی ٢٠١٩-٢٠٢٠راگەیەندراوێكی بڵاو كردەوە و تیایدا دەڵێت "پشتگیری لە راگەیاندنەكەی وەزارەتی پەروەردە دەكات كە بریتیە لە كاتی دەستپێكردنەوەی دەوام و خشتەی ئەزمونەكان و بەكارهێنانی سیستەمی ئەلكترۆنی بۆ وانەكان هەر چەندە ئەوە بۆ هەموو قۆناغەكان و دەڤەرەكان وەك یەك نابێت بە هۆی كێشەی ئەنتەرنێت و كارەباو كەمی شارەزاییەوە". 

ئەوە یەكێتیە لەو راگەیەندراوەدا دەشڵێت: پێویستە سود لە تەلەفزیۆنی پەروەردەییش وەربگیرێت بە پێی خشتەی وەزارەتی پەروەردە بۆ وانەكان و پۆلەكانی خوێندن، گرنگیشە هانی مامۆستا بەڕێزەكان بدرێت تاوەكو لە رێی كورتە نامەوە پەیوەندی بە خوێنكاران و قوتابیانەوە بكەن و رشدیان بكەن لەسەر خوێندنەوەی وانەكانیان".

یەكێتیەكە ئەوەشی وتووە، دابینكردنی موچە و كرێی وانەبێژی ئاسانكاری زۆر بۆ ئەو هەنگاوانە و سەركەوتنی ساڵی خوێندن دەكات، "هاوكات دەبێت بیر لە ئەگەر و پلانیتریش بكرێتەوە ئەگەر خوانەكردە ئەم دۆخە درێژەی كێشا كە ئومێدەوارە بە هەوڵی هەموو لایەك لە پێشەوەیاندا وەزارەتەكانی تەندروستی و ناوخۆ و ئاسایش و هێزی پێشمەرگە و لایەنەكانیتر ئەو بەڵایە تێپەڕێنرێت".

1158 جار بینراوە

copyright 2019, All Rights Reserved Developed by TeraTarget for Digital Intelligence and IT Innovations