گۆڕان پرسی کشانەوە لە حکومەت دەوروژێنێت

28.01.2020

لڤین:
میدیای نزیک لە بزوتنەوەی گۆڕان پرسی کشاندنەوەی بزوتنەوەکە لە حکومەتی هەرێم دەوروژێنێت و دەڵێت "رۆژی پێنجشەممەی داهاتوو جڤاتی نیشتمانی بزوتنەوەی گۆڕان كۆدەبێتەوەو گێمی یەكەمی یاریەكەی لەگەڵ پارتی بە پێدانی كارتێكی زەرد كۆتایی پێدێنێت"‌.

ماڵپەڕی زەمەنی نزیک لە بزوتنەوەکە لە راپۆرتێکدا رایگەیاند: نیگەرانی قوڵی گۆڕان لە پارتی گەیشتنیەتی بە دەرەنجامێك، ئەویش پاشەكشەو ساردبوونەوەی ئەو حزبەیە لە بەدیهێنانی خواستەكانی گۆڕان، كە بریتیە لە جێبەجێكردنی بەڵێنەكانی چاكسازی و پێدانی بەركەوتی هەڵبژاردنی 12%ی پۆستەكانی گۆڕان.

ئەو ماڵپەڕە هۆکارەکانی نیگەرانی بزوتنەوەکەی رون کردووەتەوە و گێڕاویەتیەوە بۆ چەند خاڵێک کە گرنگترینیان "جگە لە جێگری سەرۆكی هەرێم، هێشتا كەس لە ئەندامانی ستافەكەی دیاری نەكراوە. واتە جێگری سەرۆكی هەرێم بەتەنیا لەگەڵ پاسەوانەكانی دەوام دەكات.-بڕیار بوو جێگری سەرۆكی هەرێم لەسەر پشكی گۆڕان، سەرپەرشتیاری بواری پێشمەرگە بێت، بەڵام هێشتا ئیشوكار لەنێوان هەردوو جێگر دابەش نەكراوەو پێدەچێت دابەش نەكرێت، بەبیانووی ئەوەی وەك یەك ستاف كار بكەن".

ئەوەشی رونکردووەتەوە لە ئەنجومەنی وەزیران بڕیار وابوو یاریدەدەری سەرۆكی وەزیران بۆ كاروباری چاكسازی بدرێت بە گۆڕان، بەڵام تا ئەم ساتەوەختە دوو یاریدەدەری تر دانراون كە پێشتر گۆڕان بوون و ئێستا پارتین، كەچی نوێنەرەكەی گۆڕان دانەنراوە. دەبوایە یاسایەك بۆ ئەو دەستەیە دەربكرێت كە كارنامەو ئەركەكانی دیاری بكات، بەڵام تا ئێستا دێڕێكی لێ نەنوسراوە.

جگەلەوە باسی ئەوەشی کردووە "سەرۆكی دەستەی سندوقی داهاتە نەوتیەكان دەبێ لە پشكی گۆڕان بێت، ئەویش تا ئێستا دانەنراوە، لە پەرلەمان گۆڕان چەند بەڕێوەبەرو راوێژكارو فەرمانبەرێكی بەر دەكەوێت، بەڵام بە بیانووی گۆڕانكاری لە پەیكەرەی كارگێڕی پەرلەمان هێشتا كەس دانەنراوە".

6245 جار بینراوە

زیاتر

copyright 2019, All Rights Reserved Developed by TeraTarget for Digital Intelligence and IT Innovations