كۆمپانیای بەڕێز سكاڵای یاسایی تۆمار دەكات

20.10.2019

لڤین:
گروپی كۆمپانیاكانی بەرێز لەسەر بڵاوكردنەوەی راپۆرتێكی رۆژنامەوانی لەسەر خاوەنی گروپەكە و شێوازی دەوڵەمەند بونی داوای یاسایی تۆمار دەكات و بەرێوەبەرانی ئەو میدیایەی راپۆرتەكەی بڵاوكردووەتەوە تۆمەتبار دەكات. 

گروپی كۆمپانیاكانی بەڕێز لە ڕوونكردنەوەیەكدا كە وێنەیەكی بۆ (لڤین پرێس) نێردراوە، وەڵامی راپۆرتێكی پەڕەی مۆر دەداتەوە و دەڵێت "سەرە ڕای ڕاسپاردنی ڕاوێژكاری یاسایی بۆ تۆماركردنی داوا لەسەریان، بە هەموو لایەكی ڕادەگەیەنین كە دێڕ بە دێڕی ئەو ڕاپۆرتە بە مەرام و چەواشەكاریەیان بە بەڵگەی یاسایی وەڵام دەدەینەوە".

لەو رونكردنەوەیەدا كە هیچ وەڵامێكی تیادا نەهاتووە بۆ ئەوەی كە لە راپۆرتەكەدا خاڵی لاوازی چی بووە و كامە زانیاری هەڵەبووە، تەنها هەڕەشەی تۆمار كردنی سكاڵای كردووە و وتوشیەتی وەڵام دەدەینەوە. 

لە رونكردنەوە فەرمیەكەی كۆمپانیای بەرێزدا هێرش دەكاتە سەر سەرنوسەری پەڕەكە و تۆمەتباری دەكات بە مەبەستی جیاواز. 

 

دەقی ڕوونكردنەوەكەی گروپی كۆمپانیاكانی بەڕێز:
ڕوونكردنەوەیەك بۆ ڕای گشتی
وەڵامێك بۆ چەواشەكارییەكانی پەیجی (مۆر)

پاش ماوەیەكی زۆر و چەند جار دووبارەكردنەوەی ڕیكلامێكیان لەسەر پڕۆژەكانی كۆمپانیای بەرێز و چیرۆكی دەوڵەمەند بوونی (مەلا یاسین)، دوای نائومێدبوونیان لە داواكارییە بە مەرامەكانیان، دوای ئەوەی دڵنیا بوون هیچیان لە كۆمپانیای بەڕێز و مەلا یاسین دەست ناكەوێت، لە چەند ڕۆژی ڕابردوو پەیجی (مۆر) ڕاپۆرتێكی چەواشەكاریی و دوور لە ئیتیكی كاری ڕۆژنامەگەریی و بێ گوێدانە پێوەر و بنەما یاساییەكان و وەرگرتنی بۆچوونی بەرامبەر بڵاو كردەوە.

هەرچەندە ئەم جۆرە پەیجە سێبەرانە یەكەم جار و دوا جاریان نابێت لەسەر ناو زڕاندن و تەشهیركردن و بە كارهێنانی شێوازی فریودەرو وتەی بێ‌ بنەما بەرامبەر بە كۆمپانیا و كەسایەتی خودی مەلا یاسین و كەسانی تر بەگشتی بۆ دەستكەوتنی بەرژەوەندییە تایبەتیەكانیان، لە رێگەی بردن و بڵاوكردنەوە كۆمەلێك وێنەو ڤیدیۆ، لە سۆشیال میدیاوە كورد وتەنی: (ئەڵێی هەنگوینیان لە كلۆری دارا دۆزیوەتەوە)، ئێمە لەگروپی كۆمپانیاكانی بەڕێز سەرەڕای ڕاسپاردنی ڕاوێژكاری یاسایی بۆ تۆماركردنی داوا لەسەریان، بە هەموو لایەكی ڕادەگەیەنین كە دێڕ بە دێڕی ئەو ڕاپۆرتە بە مەرام و چەواشەكاریەیان بە بەڵگەی یاسایی وەڵام دەدەینەوە، وە هۆكاری هەڵبژاردنی كۆمپانیای بەڕێز و خاوەنەكەی لەم كاتەدا لەلایەن سەرنوسەری پەیجی (مۆر)ەوە ئاشكرا دەكەین، هەموو ئەو دیكۆمێنتانەش دەخەینە ڕوو، كە ئەم بەڕێزانە لە ژێر پەردەی كاری ڕۆژنامەوانیدا بە تەمای چی بوون و چیان دەوێت لە كۆمپانیا و سەرمایەدارەكان.


بەشی ڕاگەیاندن و پەیوەندیەكانی گروپی كۆمپانیای بەڕێز
19/10/2019


1625 جار بینراوە

زیاتر

copyright 2019, All Rights Reserved Developed by TeraTarget for Digital Intelligence and IT Innovations