مام جه‌لال به‌ ماندووبونی خۆی گه‌یشته‌ ترۆپك

03.10.2019

لڤین: 
مام جه‌لال كوڕ‌ی شێخ حیسامه‌دین كوڕ‌ی شێخ نوری كوڕ‌ی شێخ غه‌ فوورە، هاوینی ساڵی 1933 له‌ گوندی ( كه‌لكان )ی قه‌تپاڵی چیای كۆسره‌ت له‌ دایكبووه‌، كه‌ ده‌ڕ‌وانێته‌ ده‌ریاچه‌ی دوكان.

چه‌ند ساڵێك ته‌مه‌نی منداڵی له‌و گونده‌ به‌سه‌ر بردووه‌و دواتر باوكی بووه‌ به‌ رێبه‌ری ته‌كیه‌ی تاڵه‌بانی له‌ كۆیه‌. له‌وێ چۆته‌ قوتابخانه‌ی سه‌ره‌تایی و به‌ سه‌ركه‌وتوویی خوێندنی ته‌واو كردووه‌. 

كه‌ گه‌یشته‌ پۆلی چواره‌می سه‌ره‌تایی یه‌كێك بوو له‌ پێشه‌نگه‌كانی خوێندكاران كه‌ به‌ په‌رۆشه‌وه‌ به‌شداری له‌ چالاكیه‌كانی قوتابخانه‌د ده‌كرد و به‌شداری له‌ وتار خوێندنه‌وه‌و شانۆدا ده‌كرد. 

له‌ساڵی 1945 ئاهه‌نگێكی میللی له‌ كۆیه‌ بۆ نه‌ورۆز سازكرا، تاڵه‌بانی كه‌ له‌ ته‌مه‌نی سیانزه‌ ساڵیدا بوو به‌شداری تێدا كرد و وته‌ی حه‌ماس ئامێزی خوێنده‌وه‌، بووه‌ مایه‌ی سه‌رس،ڕ‌مانی مامۆستا و به‌شداربووان. 

ساڵی 1946 له‌ته‌مه‌نی 13 ساڵیدا په‌یوه‌ندیی به‌ئه‌ڵقه‌یه‌كی رۆشنبیریی پارتی كۆمۆنیستی عیراقه‌وه‌ كرد كه‌ فاتیح ره‌سوڵ سه‌رپه‌رشتی‌ ده‌كرد، به‌ڵام هه‌مووی چه‌ند مانگێكی نه‌برد وازی له‌ئه‌ڵقه‌كه‌ هێنا، چونكه‌ رێكخه‌ره‌كانی دژی بیروباوه‌ڕی كوردایه‌تی بوون و باوه‌ڕیان به‌وه‌ نه‌بوو كه‌ كورد نه‌ته‌وه‌ پێكدێنێ. 

له‌ ساڵی 1946 دا له‌گه‌‌ڵ چه‌ند هاوڕ‌ێیه‌كی به‌ ئامۆژگاری یه‌كێك له‌ مامۆستاكانی كۆمه‌ڵه‌یه‌كی فێركاری نهێنی دامه‌زراند به‌ ناوی (كۆمه‌ڵه‌ی پێشخستنی خوێندنه‌وه‌) مام جه‌لال به‌ سكرتێری هه‌ڵبژاردرا، ئامانجێكی كۆمه‌ڵه‌كه‌ هاندانی خوێندكاران بوو بۆ خوێندنه‌وه‌ی ده‌ره‌كی.  

له‌ هه‌مان ساڵدا و دوای دامه‌زراندنی پارتی دیموكراتی كورد له‌ 16 / ی ئابی 1946 كه‌وته‌ ژێر كاریگه‌ری به‌رنامه‌ی پارتی و له‌ چوارچێوه‌ی رێكخستنه‌كانیدا كه‌وته‌ چالاكی خوێندكارانه‌. 

دوای چوونه‌ ناو كاری سیاسییه‌وه‌، رۆژنامه‌ی (رزگاری) كه‌ پارتی دیموكراتی كورد به‌ نهێنی ده‌ریده‌كرد، كورته‌ وتاری له‌ژێر نازناوی (ئاگر)دا بۆ بڵاو ده‌كرده‌وه‌.
ساڵی 1947 بوو به‌ ئه‌ندام له‌ پارتی دیموكراتی كورد و چالاك و لێهاتوو بوو له‌و ئه‌رك و فه‌رمانه‌ حزبیانه‌ی پێی ده‌سپێردران. 

ساڵی 1948 خوێندنی سه‌ره‌تایی ته‌واو كرد و له‌ ناوه‌ندی كۆیه‌ بوو به‌ خوێندكار، هه‌ڵبژاردنێكی گشتی خوێندكاران ئه‌نجامدرا بۆ هه‌ڵبژادنی نوێنه‌رانی كۆنگره‌ی گشتی. جه‌لال تاڵه‌بانی به‌ نوێنه‌ری خوێندكارانی كۆیه‌ هه‌ڵبژێردرا و به‌شداری له‌ یه‌كه‌مین كۆنگره‌ی خوێندكارانی عیراقدا كرد كه‌ له‌ نیسانی 1948 له‌ گۆڕ‌ه‌پانی ( السباع ) ی شاری به‌غداد. 

ساڵی 1949 له‌ حزبدا سه‌ركه‌وت و بووه‌ ئه‌ندامی لیژنه‌ی ناوچه‌ی كۆیه‌. 

له‌ شوباتی 1951 دا و له‌ كۆنگره‌ی دووه‌می پارتی دیموكراتی كورد، به‌ ئه‌ندامی لیژنه‌ی ناوه‌ندی هه‌ڵبژێردرا، به‌ڵام له‌به‌ر پاراستنی ریزه‌كانی پارتی پله‌كه‌ی خۆی به‌ هه‌ڤاڵێكی خۆی به‌خشی كه‌ دوای ده‌رچوونی له‌ زیندان به‌شداری له‌ كۆنگره‌دا كردبوو. 

له‌ ساڵی 1951 دا له‌گه‌‌ڵ چه‌ند هه‌ڤاڵێكیدا گیرا و بۆ شاری موسڵ دوور خرایه‌وه‌، له‌وێش له‌ خه‌باتی سیاسیدا به‌رده‌وام بوو و دواتر چووه‌ كه‌ركوك بۆ ته‌واوكردنی خوێندن و سه‌ر له‌نوێ دامه‌زراندنه‌وه‌ی رێكخستنه‌كانی حزب و بووه‌ به‌رپرسی رێكخستنه‌كانی كه‌ركوك. له‌ هه‌مان ساڵیشدا ئه‌ركی چاپ و بڵاوكردنه‌وه‌ی بڵاوكراوه‌كانی به‌ شێوه‌یه‌كی نهێنی گرته‌ ئه‌ستۆ تا ئه‌و رۆژه‌ی گیرایه‌وه‌. 

ویستی له‌كۆلێجی پزیشكیی زانكۆی به‌غداد بخوێنێ، به‌ڵام داواكه‌ی ره‌تكرایه‌وه‌، چونكه‌ ده‌زگا ئه‌منییه‌كان به‌ڵگه‌ی پشتگیرییان پێ نه‌دا. بۆیه‌ رووی كرده‌ كۆلێجی یاساو له‌ساڵی خوێندنی 1952- 1953 وه‌رگیرا. 

له‌ كانوونی دووه‌می 1953 دا به‌شداریی كۆنگره‌ی سێیه‌می پارتی دیموكراتی كوردستانی كرد و به‌ ئه‌ندامی كۆمیته‌ی ناوه‌ندی هه‌ڵبژێردرا و له‌ مانگی شوباتدا سه‌رپه‌رشتی یه‌كه‌مین كۆنگره‌ی یه‌كێتی قوتابیانی كوردستانی كرد و له‌ كۆنگره‌یه‌دا به‌ سكرتێری گشتی قوتابیانی كوردستان هه‌ڵبژێردرا و له‌ هه‌مان ساڵیشدا یه‌كێك بوو له‌ دامه‌زرێنه‌رانی (یه‌كێتیی لاوانی دیموكراتی كوردستان)، هه‌ر له‌و كاتانه‌دا نوێنه‌ری پارتی بوو لای زۆربه‌ی حزبه‌ نهێنێ و ئاشكراكانی عیراقی. 

 ساڵی 1954 به‌ ئه‌ندامی مه‌كته‌بی سیاسی هه‌ڵبژێردرا. 

ساڵی 1955 سه‌ فه‌ری ده‌ره‌وه‌ی عێراقی كرد و له‌ فیستیڤاڵی لاوان و قوتابیانی جیهانی له‌ وارشۆ به‌شداری كرد و له‌وێوه‌ سه‌ردانی یه‌كێتی شووره‌وی ئه‌وسا و چینی كرد. 

ساڵی 1956 له‌به‌ر چاوان وون بوو، كه‌وته‌ خه‌باتی ژێر زه‌مینی و ناچار بوو له‌ پۆلی چواره‌می مافدا خوێندن به‌جێبهێڵێت. 

ساڵی 1957 سه‌فه‌ری سوریا و مۆسكۆی كرد و له‌ فیستیڤاڵی لاوان و قوتابیانی مۆسكۆ به‌شداری كرد و هاتنی بۆ سوریا به‌ فرسه‌ت زانی بۆ په‌یوه‌ندی به‌ كورده‌كانی ئه‌وێوه‌ و په‌یوه‌ندیه‌كی سیاسی دروستبوو. له‌ هه‌مان ساڵیشدا گه‌ڕ‌ایه‌وه‌ عیراق و به‌شداری له‌ كاره‌كانی مه‌كته‌بی سیاسی پارتی دیموكراتی كوردستانی یه‌كگرتوو كرد و بوو به‌ به‌رپرسی رۆژنامه‌ی (خه‌باتی كوردستان) كه‌ له‌ سلێمانی به‌ نهێنی ده‌ریان ده‌كرد. 

له‌ ساڵی 1958، به‌شداریی له‌ ده‌ركردنی گۆڤاری (رزگاری) (التحریر) دا كرد. 

ساڵی 1959 جارێكی تر به‌ ئه‌ندامی كۆمیته‌ی ناوه‌ندی پارتی دیموكراتی كوردستان و مه‌كته‌بی سیاسی هه‌ڵبژێردرا و له‌ هه‌مان كاتدا ئه‌فسه‌ری یه‌ده‌كی كه‌تیبه‌ی چواره‌می تانك بوو، هه‌روه‌ها به‌شداری له‌ ده‌ركردنی رۆژنامه‌ی ( خه‌بات )دا ده‌كرد كه‌ به‌ زمانی عه‌ره‌بی ده‌رده‌چوو، به‌ ناوی (پیرۆت)ه‌وه‌ وتاری تێدا بڵاوده‌كرده‌وه‌.
له‌ ساڵی 1959 به‌ ئه‌ندامی ئه‌نجوومه‌نی سه‌ندیكای رۆژنامه‌نووسانی عیراقی هه‌ڵبژێردرا كه‌ شاعیری مه‌زن محه‌مه‌د مه‌هدی جه‌واهیری نه‌قیبی بوو. 

ساڵی 1960 به‌رپرسی لقی سلێمانی پارتی و ئه‌ندامی مه‌كته‌بی سیاسی بوو كه‌ خولێكی هۆشیاری بۆ كادیره‌كان كرده‌وه‌. 

ساڵی 1961 بووه‌ سه‌رنووسه‌ری رۆژنامه‌ی (كوردستان). 

له‌ ئه‌یلولی 1961 دا كه‌ شۆڕ‌ش هه‌ڵگیرسا، به‌رپرسی ناوچه‌ی سلێمانی بوو، یه‌كه‌مین بنكه‌ی شۆڕ‌شی له‌ چه‌می رێزان كرده‌وه‌و سه‌رپه‌رشتی كرد و فه‌رمانده‌یی هێزی پێشمه‌رگه‌ی لیوای سلێمانی كرد.  

له‌ نه‌ورۆزی 1962 دا، سه‌ركردایه‌تی ئه‌و هێرشه‌ به‌ر فراوانه‌ی كرد بۆ سه‌ر ناوچه‌ی شارباژێڕ‌ و له‌ ماوه‌ی چه‌ند رۆژێكدا ده‌ست به‌سه‌ر هه‌موو بنكه‌ی پۆلیسی ناحیه‌ی بناوه‌سووته‌ و چوارتادا گیرا و هێزه‌كانی به‌ره‌و‌ قه‌زای پێنجوێن برد و ته‌واوی ناوچه‌كه‌یان ئازاد كرد. 

له‌ 1962 ـ 1963 زۆربه‌ی ناوچه‌كانی قه‌ره‌داغ و قه‌ڵاسێوكه‌ و گه‌رمیان و سه‌نگاو ئازاد كران. ئه‌و ده‌مه‌ مام جه‌لال فه‌رمانده‌ی هێزی رزگاری بوو، له‌ هه‌مان كاتیشدا سه‌رپه‌رشتی دامه‌زراندنی ناوه‌نده‌كانی به‌مۆ و هه‌ڵه‌بجه‌ و ته‌وێڵه‌ و بیاره‌ی ده‌كرد. 

ساڵی 1963 سه‌ردانی میسر و جه‌زائیری كرد و چاوی به‌ عه‌بدولناسر و بن بێلا كه‌وت و له‌ هه‌مان ساڵیشدا سه‌ردانی ئه‌وروپای كرد و له‌ وڵاتانی فه‌ره‌نسا، ئه‌ڵمانیا، روسیا، چیكسلۆ فاكیا و نه‌مسا كه‌مپینی كۆكردنه‌وه‌ی هاوكاری بۆ شۆِرش ئه‌نجامدا و ساڵی 1964 گه‌ڕ‌ایه‌وه‌ كوردستان. 

تاڵه‌بانی له‌ گه‌ڵ ھێرۆ ئیبراھیم ئه‌حمه‌د كچی ئیبراھیم ئه‌حمه‌د ژیانی ھاوسه‌رگیری پێكھێناوه‌ و دوو كوڕیان ھه‌یه‌ به‌ناوی قوباد و بافڵ كه‌ كوڕه‌ گه‌وره‌كه‌یان بافڵه‌.
ساڵی 1964 پاش ئاگربڕی نێوان شۆڕش و حكومه‌تی عه‌بدولسه‌لام عارف كه‌ توانیبووی كوده‌تا بكاو به‌عسییه‌كان له‌سه‌ر كار لادا. قه‌یرانی ناوخۆی پارتی دیموكراتی كوردستان له‌نێوان باڵی مه‌لا مسته‌فا بارزانی و باڵی مه‌كته‌بی سیاسی به‌سه‌ركردایه‌تیی برایم ئه‌حمه‌د ده‌ستی پێكرد. تاڵه‌بانی پشتگیریی له‌باڵی ‌مه‌كته‌بی سیاسیی كرد.

پاش ئه‌وه‌ی كه‌ هێزه‌كانی بارزانی په‌لاماری هێزه‌كانی مه‌كته‌بی سیاسییان دا له‌ماوه‌ت، هێزه‌كانی مه‌كته‌بی سیاسی كشانه‌وه‌ بۆ ناو ئێران و له‌هه‌مه‌دان گیرسانه‌وه‌. پاش ماوه‌یه‌ك باڵی مه‌كته‌بی سیاسی گه‌یشت به‌ڕێككه‌وتنێك له‌گه‌ڵ مه‌لا مسته‌فاداو ئه‌ندامه‌كانی‌ ده‌ستبه‌رداری هه‌موو لێپرسراوه‌تییه‌كانیان بوون و وازیان له‌هه‌ڵسوڕانی سیاسییان هێنا. به‌ڵام پاش زیادبوونی گوشار له‌سه‌ر باڵی مه‌كته‌بی سیاسی و په‌ره‌سه‌ندنی مه‌ترسیی له‌ناوبردنی ئه‌ندامه‌كانی، باڵی مه‌كته‌بی سیاسی‌ له‌ساڵی 1966دا گه‌یشت به‌ڕێككه‌وتنێك له‌گه‌ڵ حكومه‌تی عیراقدا كه‌ به‌هۆیه‌وه‌ حكومه‌ت ئازادیی هه‌ڵسوڕانی سیاسیی ئاشكرای له‌شاره‌كاندا به‌باڵی مه‌كته‌بی سیاسی داو مافی پێكهێنانی هێزی چه‌كداریشی بۆ سه‌لماند.

ساڵی 1967 به‌شداری له‌ كۆڕ‌ی ( ئیشتراكیه‌كانی عه‌ره‌ب ) كرد له‌ جه‌زائیر و لێكۆڵینه‌وه‌یه‌كی زۆر به‌ پێزی ده‌رباره‌ی كێشه‌ی كورد و شه‌رعیه‌تی بزووتنه‌وه‌ی رزگاریخوازی گه‌لی كورد و دۆستایه‌تی نێوان كورد و عه‌ره‌ب پێشكه‌شكرد. 

ساڵی 1970 رۆڵی كاریگه‌ری بینی له‌ یه‌كگرتنه‌وه‌ی هه‌ردوو باڵی پارتی دیموكراتی كوردستان كه‌ پێشتر ببوونه‌ دوو باڵ و ناكۆكیه‌كی تاڵ و خوێناوی له‌ نێوانیاندا هه‌بوو.
ساڵی 1972 سه‌فه‌ری ده‌ره‌وه‌ی عێراقی كرد و ماوه‌یه‌ك له‌ لوبنان و میسر و سوریا مایه‌وه‌ و دوای رووخاندنی شۆڕ‌شی كورد كه‌ له‌ ئه‌نجامی رێكه‌وتننامه‌ی نێوان سه‌دام و شای ئێران له‌ ئاداری 1975 له‌ جه‌زائیر ئیمزا كرا، تاڵه‌بانی هه‌ر له‌و ناوچانه‌دا مایه‌وه‌. 

سێ مانگ پاش هه‌ره‌س هێنانی شۆڕش له‌كوردستان، یه‌كێتیی نیشتمانیی كوردستانی له‌سوریا دامه‌زراند. له‌م سه‌روبه‌نده‌دا له‌ساڵی 1975دا توانی دوو هه‌نگاوی گرنگ بۆ سه‌قامگیركردنی پێگه‌ی یه‌كێتی بنێ. یه‌كێكیان، هێنانی كۆمه‌ڵه‌ی ره‌نجده‌رانی كوردستان و بزووتنه‌وه‌ی سۆشیالیستی كوردستانه‌ بۆ ناو یه‌كێتی و ئه‌وی تر بردنی یه‌كێتییه‌ بۆ ناو كۆڕی نیشتمانیی عیراق كه‌ هاوپه‌یمانییه‌كی سیاسیی‌ دژ به‌ڕژێمی به‌عس بوو. 

له‌ 01 / 06 / 1975 له‌ دیمه‌شق له‌گه‌‌ڵ ده‌سته‌یه‌ك له‌ هه‌ڤاڵانیدا یه‌كێتیی نیشتمانیی كوردستانیی دامه‌زراند و نه‌خشه‌ی بۆ هه‌ڵگیرسانه‌وه‌ی شۆڕ‌شی نوێ دانا كه‌ له‌ 01ی حوزه‌یرانی 1976 راگه‌یه‌نرا و بووه‌ سكرتێری گشتی یه‌كێتی. 

ساڵی 1980 كاتێك عیراق هێرشی كرده‌ سه‌ر ئێران، دژی ئه‌م سیاسه‌ته‌ شه‌ڕخوازییه‌ی عیراق وه‌ستاو هه‌مان ساڵ به‌شداری‌ له‌پێكهێنانی به‌ره‌ی نیشتمانیی نه‌ته‌وایه‌تیی دیموكراتی عیراق كرد كه‌ له‌ 8 گروپ پێكهاتبوو و ئامانجه‌كه‌ی روخاندنی رژێمی به‌عس بوو. 

ساڵی 1984 پرۆسه‌ی وتووێژی له‌گه‌ڵ رژێمی به‌عس ده‌ست پێكرد، به‌ڵام پاش بێ ئومێد بوون له‌گه‌یشتن به‌ڕێككه‌وتنێكی گونجاو بۆ چاره‌سه‌ركردنی مه‌سه‌له‌ی كورد.
له‌ناوه‌ڕاستی كانونی دووه‌می 1985دا هه‌ڵوه‌شانه‌وه‌ی وتووێژی راگه‌یاند. هه‌ر ئه‌و ساڵه‌، دوای ئه‌وه‌ی كه‌ ئێرانییه‌كان ئاماده‌یی ئه‌وه‌یان ده‌ربڕی كه‌ هه‌ڵوێستیان به‌رامبه‌ر به‌یه‌كێتی راست ده‌كه‌نه‌وه‌و خوازیاری ئاشتبوونه‌وه‌و هاریكارین، به‌پیریانه‌وه‌ چوو و پشتیوانیی له‌چاككردنی په‌یوه‌ندیی نێوان یه‌كێتی و ئێران كرد.  

له‌ساڵی 1986دا په‌یوه‌ندییه‌كان په‌ره‌یان سه‌ندو گه‌یشتنه‌ ئاستی هاوپه‌یمانی له‌دژی رژێمی به‌عس. لێره‌ به‌دواوه‌ كه‌وته‌ كاركردن بۆ یه‌كخستنه‌وه‌ی ناو ماڵی كورد و پرۆژه‌ی ئاشتبوونه‌وه‌ی گشتیی پێشنیار كردو به‌م پێیه‌ هه‌وه‌ڵ جار ئاشتبوونه‌وه‌ی له‌گه‌ڵ حزبی سۆسیالیستی كوردستاندا به‌ ئه‌نجام گه‌یاند، پاشان له‌گه‌ڵ پاسۆك و دواتر له‌گه‌ڵ حزبی كۆمۆنیستی عیراقدا، له‌كۆتاییشدا له‌گه‌ڵ پارتی دیموكراتی كوردستاندا له‌تاران. ئه‌م ئاشتبوونه‌وه‌ گشتییه‌ بووه‌ هه‌وێنی پێكهێنانی به‌ره‌ی كوردستانی كه‌ ساڵی 1988 له‌نێوان لایه‌نه‌ كوردستانییه‌كان هاته‌ كایه‌وه‌. 

پاش راپه‌ڕینی 1991، سه‌رۆكایه‌تیی شاندی به‌ره‌ی كوردستانیی كرد له‌وتووێژدا له‌گه‌ڵ رژێمی به‌عس بۆ دۆزینه‌وه‌ی چاره‌سه‌رێكی دیموكراتییانه‌و دادپه‌روه‌رانه‌ بۆ مه‌سه‌له‌ی كورد، به‌ڵام پاش ئه‌وه‌ی كه‌ بێ ئومێد بوو له‌توانای، دژی ئه‌وه‌ وه‌ستایه‌وه‌ كه‌ رێككه‌وتنێكی كرچ و كاڵ و نامسۆگه‌ر له‌نێوان كوردو رژێمی به‌عسدا واژۆ بكرێ. به‌هۆی بوونی دوو بۆچوونی جیاواز سه‌باره‌ت به‌شێوه‌ی مامه‌ڵه‌كردن له‌گه‌ڵ به‌غدادا، بڕیار درا هانا بۆ هه‌ڵبژاردنی په‌رله‌مان ببرێ. 

له‌هه‌ڵبژاردنی ساڵی 1992دا یه‌كێتیی نیشتمانی و پارتی دیموكرات زۆرینه‌ی ده‌نگه‌كانیان به‌ده‌ست هێناو دواتر پێكه‌وه‌ یه‌كه‌م كابینه‌ی‌ حكومه‌تی هه‌رێمی كوردستانیان پێكهێنا. 

دوا به‌دوای هه‌ڵگیرسانی شه‌ڕی ناوخۆ له‌كوردستاندا، هه‌موو هه‌وڵی خۆی خسته‌ گه‌ڕ بۆ گێڕانه‌وه‌ی ئاشتی بۆ كوردستان. ساڵی 1998 به‌ سه‌رپه‌رشتیی ئه‌مریكا، رێككه‌وتننامه‌ی واشنتۆنی له‌گه‌ڵ مه‌سعود بارزانیی سه‌رۆكی پارتی دیموكراتی كوردستاندا ئیمزا كرد. دوا به‌دوای ئه‌مه‌ هه‌وڵه‌كانی چڕكرده‌وه‌ بۆ یه‌كخستنه‌وه‌ی ئیداره‌ له‌كوردستاندا.

دوای ئازادكردنی عیراق به‌ ئه‌ندامی ئه‌نجوومه‌نی حوكم هه‌ڵبژێردرا و له‌ مانگی نۆڤه‌مبه‌ری 2003 دا سه‌رۆكایه‌تی ئه‌نجوومه‌نی كرد و له‌م ماوه‌یه‌دا كارامه‌یی خۆی له‌ هه‌ڵسوڕ‌اندنی كاروباری حوكم نیشاندا.

له‌ 6ی نیسانی 2005، مام جه‌لال 227 ده‌نگی له‌ كۆی 248 ده‌نگی ئه‌ندامانی كۆمه‌ڵه‌ی نیشتمانی عیراقی به‌ ده‌ستهێنا و به‌ هه‌ڵبژاردنێكی راسته‌وخۆ به‌ یه‌كه‌مین سه‌رۆكی هه‌ڵبژێراوی عیراق هه‌ڵبژێردرا.

ساڵی‌ 2007 بۆ رێكخستنه‌وه‌ی‌ په‌یوه‌ندییه‌كانی‌ نێوان یه‌كێتی‌ نیشتیمانی‌ كوردستان و پارتی‌ دیموكراتی‌ كوردستان، رێككه‌وتننامه‌ی‌ ستراتیجیی‌ له‌گه‌ڵ پارتی‌ دیموكراتی‌ كوردستان واژۆ كرد.

له‌ته‌موزی 2008دا له‌بیست و سێهه‌مین كۆنگره‌ی رێكخراوی سۆسیالیست ئینته‌رناسیۆنالدا به‌جێگری سه‌رۆكی رێكخراوه‌كه‌ هه‌ڵبژێردرا.

له‌ساڵی 2010دا بۆ دووه‌م جار له‌لایه‌ن ئه‌نجومه‌نی نوێنه‌رانی عیراقه‌وه‌ بۆ پۆستی سه‌رۆكی كۆماری عیراق هه‌ڵبژێردرایه‌وه‌.

له‌ 17ی كانونی یه‌كه‌می 2012دا له‌ به‌غدا نه‌خۆشی تینی بۆ هێنا و به‌په‌له‌ گه‌یه‌ندرایه‌ نه‌خۆشخانه‌ی شاریته‌ له‌ به‌رلینی پایته‌ختی ئه‌ڵمانیا. 

له‌ 19ی ته‌موزی 2014دا گه‌ڕایه‌وه‌ بۆ سلێمانی و له‌ ده‌باشان گیرسایه‌وه‌. له‌و ماوه‌یه‌دا نه‌خۆشی رێی پێ نه‌دا به‌شداری له‌ ژیانی سیاسیدا بكات.
له‌ رۆژی 3ی تشرینی یه‌كه‌می ساڵی 2017 له‌ ته‌مه‌نی 83 ساڵیدا له‌ ئه‌ڵمانیا كۆچی دوایی كرد. 

له‌ڕۆژی ٦ی تشرینی یه‌كه‌می ٢٠١٧ واته‌ دوای سێ ڕۆژ له‌كۆچی دواییكردنی ته‌رمی جه‌لال تاڵه‌بانی له‌ڕێگای فڕۆكه‌خانه‌ی نێونه‌ته‌وه‌ییی سلێمانی له‌ ئه‌ڵمانیاوه‌ گه‌ڕێندرایه‌وه‌ ھه‌رێمی كوردستان، ته‌رمه‌كه‌ش له‌ گردی ده‌باشان به‌خاكسپێردرا.

 

499 جار بینراوە

زیاتر

copyright 2019, All Rights Reserved Developed by TeraTarget for Digital Intelligence and IT Innovations