فازل میرانی: تەنها مەسعود بازرانی سیفەتی ئەوەی تێدایە بکرێتە سەرۆکی ئەنجومەنی سیاسی

25.09.2019

لڤین:

سکرتێری مەکتەبی سیاسی پارتی رایدەگەیەنێت، پەیوەندی نێوان یەکێتی و پارتی ئەوەندە بەهێزە بە ئاسانی تێکناچێت، دەشڵێت" ئەگەر ئەنجومەنێکی سیاسی بۆ کوردستان دروستبکرێت دەبێت مەسعود بارزانی بکرێتە سەرۆکی ئەنجومەنەکە چونکە ئەو سیفەتانەی کە پێویستە هەبێت هەر لەودا هەیە".

فازل میرانی، سکرتێری مەکتەبی سیاسی پارتی  رایگەیاندوە" پەیوەندییەکانی ئێمە لە ئێستادا پاش نامە و نامە ئاڵوگۆڕکردن بەرە و ئارامی چووە، وە برادەرانی یەکێتی-ش هەندێک لای خۆیانه‌وه‌ هەوڵیان دا وە ئێمەش هەوڵماندا لای خۆمانه‌وه‌ وە ڕاستە ئێمە خاڵی جیاوازیمان لەزۆر مەسەلەدا هەیە، بەڵام خاڵی هاوبەشمان ئێجگار زۆرە دەکرێت جیاوازیمان هەبێت بەڵام دەبێت کۆببینەوە ناکرێت لەبەر ئەوەی جیاوازیمان هەیە کۆنەبینەوە".

سکرتێری مەکتەبی سیاسی پارتی دیموکراتی کوردستان دەشڵێت" لەڕاستیدا ئێمە خۆمان دژی "زۆنی زەرد و سەوز-ین" پێمان باشە زۆنەکان بکەینە یەک ببێتە زۆنێکی زەیتونی کوردستانی بۆ هەموو کوردستان، چونکە بەرنامەی هەڵبژاردنی ئێمە ئەوەبوو کە حکومەتێکی بەهێز لەکوردستانێکی بەهێزدا بێت، ئێمە پێمان باشە حکومەت حکومەتێتی خۆی بکات وە حیزبەکان پشتیوانی بکەن، ئێمە هەر چواردەورمان ئاگرە بەهەرلایەکدا با بێت ئاگرەکە بەر ئێمە دەکەوێت بۆ بەدبەختی ئێمە با-یەکە بەوجۆرە نایەت کە ئاگرەکە لە ئێمە دور بخاتەوە."

سەبارەت بە دروستکردنی ئەنجومەنێک بۆ لایەنە سیاسییەکان وتیشی" بۆچونی فەرمی ئێمەش پێویستی بە گفتوگۆکردن هەیە لە سەرکردایەتی کە هێشتا گفتوگۆمان نەکردووە لەوبارەیەوە، بەڵام ئێمە "من حیث مبدا) دژی دروستکردنی ئەو ئەنجومەنە نین چونکە ئەزمونێکی پێشتر هەبوو کە ئەسڵی پێشنیارەکە لە برایانی یەکگرتووی ئیسلامی کوردستانەوە بوو هەموو حیزبەکان ڕەزامەندبووین و کاری-شی بۆکرا".

میرانی، بە دەنگی ئەمریکای راگەیاندوە،" ده‌مه‌وێت ئه‌وه‌ش بڵێم ئەم ئەنجومەنە هەرگیز "بەدیلی" پەرلەمان و حکومەت و سەرۆکایەتی هەرێم نیە لەهەموو دنیادا ئەم ئەنجومەنانە هەن ئەمە بۆ بابەتی ستراتیژییە شەخسی یەکەمی حیزبەکان دادەنیشن کە ڕاسپاردەیەک بدەنە سەرۆکایەتی حکومەت و هەرێم و پەرلەمان ئەوە بەهێزکردنی ئەم حکومەتەیە ناتوانێت بڕیار بدات، هەندێک توانج هەیە کەدەڵێن سودی چیە کە بڕیار نەدات؟ وه‌ڵام ئه‌وه‌یه‌ خۆ هیچ قازانجی نەبێت ئەو قازانجە گرنگەی هەیە کە بەشێوەیەکی دەوری کە ئەو ئەنجومەنە بەپێی پەیڕەوی ناوخۆی خۆیان دایدەنێن کەسی یەکەمی حیزبەکان لە شوێنێک کۆدەبنەوە کە قسە و گللەیی و گازاندەی خۆیان دەکەن و نانێك پێكه‌وه‌ ده‌خۆن کە بێ ئەو ئەنجومەنە ڕەنگە بە مانگ و ساڵەکان ئەو حیزبانە پێکەوە کۆنەبنەوە."

سەبارەت بەوەی چ کەسێک سەرۆکایەتی ئەو ئەنجومەن بکات وتیشی" بۆچونی من ئەگەر ئەو ئەنجومەنەمان پێکهێنا سەرۆکایەتیەکەی گرفت نیە، لەناو خەڵکی کوردستان و حیزبه‌كاندا خەڵکی زانا و شایستە زۆرن بەڵام من دەڵێم "مێژوو، جوگرافیا ، توانا واته‌ ئەزمون" خۆی فەرز دەکات کە "ئەولەویەت" بۆ ئەو بێت واتە بۆ خاوەنی ئەو سیفەتانە بێت ، ئه‌ویش "جەنابی سەرۆک بارزانی" یە، "ئێ خۆ ئه‌گه‌ر "سه‌رۆك بارزانی" نه‌بێت ئه‌ی كێ بێت؟ خۆ من نابم، ده‌تانه‌وێت من بم ئێ وه‌ڵا من نابم !" هه‌رده‌بێت جه‌نابی سه‌رۆك بارزانی بێت ئه‌و سیفه‌تانه‌ له جه‌نابیاندایه‌."


582 جار بینراوە

زیاتر

copyright 2019, All Rights Reserved Developed by TeraTarget for Digital Intelligence and IT Innovations