چۆنیەتی خەرجكردنی ٢٠ ملیار دینارەكەی پایتەختی رۆشنبیری ئاشکرا کرا

11.09.2019

لڤین:

بەڕێوەبەری گشتی رۆشنبیری سلێمانی ڕایگەیاندوە، بەڕێوەبەرایەتی گشتی ڕۆشنبیری و هونەری سلێمانی بەرپرسە بەرامبەر بە هەر دینارێک کە لەو منحەیە سەرفکرابێت و بەدەر لەوەش هەر دەزگاو بەرپرسێک لە ماوەکانی پێشوترا بەرپرسە بەپێی ئاست و کاریگەری بڕیارەکەی.

لە ڕاگەیەندراوێکدا کە وێنەیەکی دەست ( لڤین ) کەوتووە، بەڕێوبەری گشتی ڕۆشنبیری سلێمانی چۆنیەتی خەرج کردنی ( ٢٠ ملیار ) پایتەختی ڕۆشنبیری ئاشکرا کردووە".

لە بەشێکی ڕاگەیەندراوەکەدا بری پارە و ئەو بابەتەی بۆی خەرج کراوە ئاشکرا کراوە، بەمجۆرە" بۆ خەرجی بەرێز بەرێوەبەری گشتی بۆ كاروچالاكی ( ١ ملیار و ٦١٢ ملیۆن دینار)، بۆ خەرجی كاروچالاكی ( ١ ملیار و ٤٥٤ ملیۆن ) دینار ، خەرجی سەندیكاو كۆمپانیای مەستی فیلم ( ١ ملیار و ١٧٩ ملیۆن ) دینار، پارەی تەرخانكراو بۆ بەرێوەبەری گشتی ( ٦٤ ملیۆن ) دینار".

 لە کۆتای ڕاگەیەندراوەکەدا هاتوە" لە ڕۆژانی داهاتودا لیستی خەرجی و چالاکیەکانی بەڕێوەبەرایەتی گشتی ڕۆشنبیری سلێمانی ش بڵاودەکەینەوە".

دەقی ڕوونکردنەوەکە:.

بۆ ڕای گشتی و
سەرجەم ئەو کەسانەی پرسەکەیان لا گرنگ و بایەخدارە..

لیستی چۆنیەتی خەرجکردنی منحەی بیست ملیار دیناری سلێمانی وەک پایتەختی ڕۆشنبیری کوردستان لە سەرەتاوە تا ئێستا ئەخەینەڕوو...
شایانی باسە، تا ئەو شوێنەی پەیوەندی بە کارەکانی ئێمەو سەرجەم ئەو پرۆژانەوە هەیە کە لەو مەودای خزمەتی ئێمەدا ئەنجامدراون ( ٥ \ ٢٠١٥  تا ئێستە) ، بەڕێوەبەرایەتی گشتی ڕۆشنبیری و هونەری سلێمانی بەرپرسە بەرامبەر بە هەر دینارێک کە لەو منحەیە سەرفکرابێت و بەدەر لەوەش هەر دەزگاو بەرپرسێک لە ماوەکانی پێشوترا بەرپرسە بەپێی ئاست و کاریگەری بڕیارەکەی....
ئێمە لە سەرەتای کارکردنمانەوە لەم دەزگایە تا ئێستا، هاوکاری دەزگاکانی چاودێری بوین و هەرواش ئەبین چونکە ئەو بیرکردنەوە ڕەفتارە هەم لەگەڵ موراڵی خۆماندا ئەگونجێت و هەم یاساش پشتیوانی لێئەکات و ئەیسەپێنێ...
سوپاس بۆ گشت ئەو کەسانەی لە مڵکی گشتی ئەپرسنەوە و نایانەوێ لە ڕێگای میدیاکانەوە خۆڵ بکرێتە چاوی خەڵکەوە...
سوپاس بۆ سەرجەم ئەو دەزگایانەی کاتێک دەگەنە کرۆکی حەقیقەت ، ئیتر ڕاستیەکان وەک خۆی دەگەیەنن و سڵ لە هیچ کەس و لایەنێک ناکەنەوە...
تێبینی: لە ڕۆژانی داهاتودا لیستی خەرجی و چالاکیەکانی بەڕێوەبەرایەتی گشتی ڕۆشنبیری سلێمانی ش بڵاودەکەینەوە.

بابەكر دڕەیی

بەڕێوەبەری گشتی رۆشنبیری سلێمانی

 

912 جار بینراوە

زیاتر

copyright 2019, All Rights Reserved Developed by TeraTarget for Digital Intelligence and IT Innovations