وەزارەتی دارایی هیچ زانیارییەک لەسەر دابەشکردنی مووچە نادات

07.09.2019

لڤین:
هەرچەندە وا بڕیارە هەموو 30 رۆژ جارێک مووچە دابەشبکرێت کە دەکاتە 5ی هەموو مانگێک، بەڵام ئەمڕۆ 7ی ئەیلولە تا ئێستا مووچەی مانگی حوزەیران دابەشنەکراوە و دیاریش نییە کەی دابەشدەکرێت.

بە پێی خشتەی دابەشکردنی مووچەی مانگەکانی رابردوو بێت، دەبوو ئەمرۆ سێ رۆژ بوو مووچە دابەشبکرایە، بەڵام تا ئێستا دیار نییە مووچە کەی دابەشدەکرێت و وتەبێژی وەزارەتی داراییش ئامادە نیە هیچ زانیارییەک لەسەر دابەشکردنی مووچە بدات.

لڤین پەیوەندی بە ئەحمەد عەبدولرەحمان، وتەبێژی وەزارەتی داراییەوە کرد، بەڵام ئامادەنەبوو هیچ لێدوانێک بدات، تەنها وتی کە مووچە راگەیەندرا خشتە دەنێرین بۆ هەموو کەناڵەکان.

لای خۆشییەوە حەسەن رەشید، بەڕێوەبەری گەنجینەی یەكی سلێمانی بە (لڤین پرێس)ی راگەیاند، هیچ بڕیارێکمان بەدەست نەگەیشتووە بۆ دابەشکردنی مووچەی فەرمانبەران و چاوەڕوانی وەزارەتی دارایی دەکەین بۆ دابەشکردنی مووچە.

وەزارەتی دارایی بۆ دابەشکردنی مووچە پشت بە 317 ملیار دیناری وەزارەتی سامانە سروشتییەکان و 478 ملیار دیناری بەغدا دەبەستێت کە بۆ مووچەی فەرمانبەرانی هەرێمی دەنێرێت.

ئەمە لە کاتێکدایە نۆ مانگ بەسەر ساڵی ٢٠١٩دا تێپەڕیوە حکومەت تا ئێستا پێنج مووچەی بە تەواوی دابەشکردوە.



939 جار بینراوە

copyright 2019, All Rights Reserved Developed by TeraTarget for Digital Intelligence and IT Innovations