بارەگاکانی حەشدی شەعبی لەلایەن ئیسرائیلەوە بۆردومان کراوە

23.08.2019

لڤین:

رۆژنامەی نیویۆرک تایمز بڵاویکردەوە، مانگی تەمموزی رابردو ئیسرائیل بۆردومانی کۆگایەکی چەک و تەقەمەنی بارەگایەکی سەرەکی چەکدارانی حەشدی شەعبی کردوە لە باکوری بەغدا.

لە ڕاپۆرتێکدا رۆژنامەی نیویۆرک تایمزی ئەمەریکی، لەسەر زاری سەرچاوەیەکی هەواڵگریی رۆژهەڵاتی ناوەڕاستەوە بڵاوی کردەوە" مانگی تەمموزی رابردو ئیسرائیل بۆردومانی کۆگایەکی چەک و تەقەمەنی بارەگایەکی سەرەکی چەکدارانی حەشدی شەعبی کردوە لە باکوری بەغدا، هاوکات دو بەرپرسی باڵای ئەمەریکا زانیارییەکانیان پشتڕاستکردوەتەوە و رایانگەیاندوە: مانگی رابردو ئیسرائیل ژمارەیەک هێرشی ئاسمانیی لە عێراق ئەنجامداوە".

ڕۆژنامەکە ئاشکرای کردوە" بەپێی سەرچاوەکانیان و دوای بەدواداچون دەرکەوتوە کە رۆژی ( ١٩ )ی تەمموز، ئیسرائیل هێرشی ئاسمانیی کردوەتە سەر ناوچەیەک لە سنوری ئامرلی سەر بە پارێزگای سەڵاحەدین لە باکوری شاری بەعدا".

مانگی رابردو چوار بارەگای سەرەکیی حەشدی شەعبی لە عێراق کەوتنە بەر هێرش و بەهۆیەوە ژمارەیەک کۆگای چەک و تەقەمەنییان سوتان، لەماوە چەند رۆژی رابردوشدا ژمارەیەک کۆگای چەک و تەقەمەنیی حەشدی شەعبی لە ناوچە جیاوازەکانی عێراق تەقینەوە.

هەروەها بنیامین ناتانیاهۆ، سەرۆک وەزیرانی ئیسرائیل ئاشکرای کردبو" وڵاتەکەی دژی بەرژەوەندییەکانی ئێران لە چەندین بەرەی جیاواز دەوەستێتەوە، ئەوەش وەک ئاماژەیەک بۆ هێرشەکانی ماوەی رابردوی سەر بنکە و بارەگاکانی حەشدی شەعبی".

سەبارەت بە تەقاندنەوەی کۆگانی حەشدی شەعبی، مەهدی موهەندیس، سەرۆکی دەستەی حەشدی شەعبی رایگەیاند" ئەوەی رودەدات لە بەئامانجگرتنی بنکە و بارەگاکانی حەشدی شەعبی بەهۆی ئاسانکاریی سوپای ئەمەریکاوەیە لە بواریی ئاسمانی عێراق کە مۆڵەت دەدات بە فڕینی فڕۆکەکان".

موهەندیس رونیشیکردەوە" زانیاریی ورد و پشتڕاستکراوەیان هەیە کە ئەمەریکییەکان لە ئەمساڵدا چوار فڕۆکەی بێفڕۆکەوانی ئیسرائیلییان لەرێگەی ئازەربایجانەوە گواستوەتەوە بۆ بۆردومانکردنیان لە عێراق، هەروەها زانیاریان لەبارەی نەخشە و تۆمار و جۆرەکانی فڕۆکەکان هەیە".

هەروەها دوێنێ پێنج شەممە،لە ڕاگەیەندراوێکدا حەشدی شەعبی ڕایگەیاند" هێزی بەرگری ئاسمانی حەشد توانیویانە فڕۆکەیەکی چاودێری بەسەر بارەگای لیوای ( ١٢ )ەوە لە ناوچەی حەزامی بەغدا بکەنە ئامانج و بیخەنە خوارەوە بەبێ ئەوەی هیچ وردەکارییەکی دیکە ئاشکرا بکەن".

2034 جار بینراوە

زیاتر

copyright 2019, All Rights Reserved Developed by TeraTarget for Digital Intelligence and IT Innovations